ۇلكەن شاراعا قاتىسقانداردى قۇتتىقتاعان قىزىلوردا وبلىسىنىڭ اكىمى ق.كوشەرباەۆ «بايقوڭىر ينۆەست» فورۋمى تابىستى ارىپتەستىك ورناتۋ الاڭىنا اينالعانىن اتاپ ءوتتى.
- مەملەكەت باسشىسىنىڭ جولداۋىنان تۋىندايتىن بالامالى ەنەرگەتيكانى دامىتۋ جونىندەگى مىندەتتەردى ورىنداۋ ماقساتىندا ءبىز بۇگىنگى «جاسىل» ەكونوميكاعا - ءوڭىر دامۋىنىڭ جاڭا باعىتى رەتىندە ارنادىق. ءبىزدىڭ وبلىسىمىز كۇننىڭ بەلسەندىلىگى جوعارى ايماق ەكەنىن اتاپ وتكىم كەلەدى. وبلىستا كۇن ساۋلەسىنىڭ ورتاشا جىلدىق ۇزاقتىعى 3 مىڭ ساعاتتان ارتىق. بۇل كۇن ەلەكتر ستانتسيالارىن سالۋ مەن دامىتۋ ءۇشىن ۇلكەن مۇمكىندىك. سوندىقتان «جاسىل» ەكونوميكا تاقىرىبىن ءبىز كەزدەيسوق تاڭداپ العان جوقپىز, - دەدى ول.
وبلىس اكىمى كەلەسى جىلى وڭىردە جالپى قۋاتى 170 مۆت بولاتىن 4 كۇن ەلەكتر ستانتسياسىنىڭ قۇرىلىسى باستالاتىندىعىن ايتتى. قۋاتى 60 جانە 10 مۆت بولاتىن قىزىلوردا قالاسىنىڭ سول جاعالاۋىندا جانە جاڭاقورعان اۋدانىندا "HydroEnergy" اق (بولگاريا), جالاعاش اۋدانىندا قۋاتى 30 مۆت – "Total Eren" (فرانتسيا) كومپانياسى, شيەلى اۋدانىندا قۋاتى 70 مۆت – "Samruk Kazyna – United Green" كومپانياسى جانە "اۆەلار سولار تەحنولودجي" جشق (رەسەي) كۇن ەلەكتر ستانتسياسىن سالاتىن بولادى.
فورۋمنىڭ پلەنارلىق وتىرىسىندا ديپلوماتيالىق ميسسيا وكىلدەرى, مەملەكەتتىك ورگاندار مەن قارجى ينستيتۋتتارىنىڭ باسشىلارى ءسوز سويلەدى. قر ينۆەستيتسيالار جانە دامۋ مينيسترلىگى ينۆەستيتسيا كوميتەتىنىڭ توراعاسى ەرلان قايىروۆ قىزىلوردا وبلىسىنداعى نەگىزگى كاپيتالعا سالىنعان ينۆەستيتسيا ءوسىمىنىڭ وڭ ترەندتەرىن اتاپ ءوتتى. سونداي-اق, ايماقتىڭ وڭدەۋ ونەركاسىبىندە 1,9 ەسەگە وسكەنىن ايتتى. ناتيجەسىندە, ءوڭىر سالانىڭ نەگىزگى كاپيتالىنا ينۆەستيتسيالاردىڭ ءوسۋ قارقىنى بويىنشا كوشباسشىلاردىڭ ۇشتىگىنە ەندى.
باقتيار تايجان,
«ەگەمەن قازاقستان».
قىزىلوردا وبلىسى
