اۋىل ادامدارى وسى مالدىڭ سۇمەسىمەن كۇن كورىپ وتىر. كۇنى ەرتەڭ ۇلىمدى ۇيلەندىرىپ, قىزىمدى ۇزاتسام, پەرزەنتتەرىمدى قاتارىنان قالدىرماي وقىتسام وسى مالىم قاجەتىمە جارايدى دەپ ۇمىتتەنەدى. ال بار كۇنكورىسى سول مال بولىپ وتىرعان ەل قازىناسىن ايدىڭ-كۇننىڭ امانىندا تۇرە قۋىپ, ءىزىم-قايىم جوعالتىپ جىبەرۋ جاۋلىق ەمەي نەمەنە؟ كوكشەتاۋ قالاسىنىڭ تاپ ىرگەسىندەگى كەنەسارى, بايانباي جانە جامانتۇز اۋىلدارىنىڭ ءتامام جۇرتى جۇگەن ۇستاپ قالدى. جوعالعان جىلقىمەن بىرگە جىلقىشىنىڭ دا كوزدەن تاسا بولۋى كوپ كۇدىككە سەبەپ بولىپ تۇر. ويتكەنى جۇرت جىلقىسىن سەنىپ تاپسىرعان جىلقىشى ءبىر ءتۇننىڭ ىشىندە بەلگىسىز جاققا قوپارىلا كوشىپ كەتكەن. ۇرلىقتىڭ ءىزىن ىندەتىپ تاراتىپ ايتاتۇعىن بولساق, قىرۋار مال ءبىر كۇننىڭ ىشىندە جوعالماعان. اڭعال جۇرت جىلقىسىنىڭ ۇيىردە جوق ەكەندىگىن ءتىپتى بايقاماي دا قالىپتى. جىلقىشى ءبىر ءۇيىر جىلقىنى ايداپ اكەلىپ, ءتىزىم بويىنشا يەلەرىنە تاراتىپ بەرگەننەن كەيىن مالساق قاۋىم تابىندا 200 باس جىلقىنىڭ جەتپەيتىنىن ءبىر-اق بىلگەن.
– جىلقىنىڭ قولدى بولۋىنا بايلانىستى قىلمىستىق ءىس قوزعالدى, – دەيدى وبلىستىق پوليتسيا دەپارتامەنتى ءباسپاسوز قىزمەتىنىڭ مامانى اسەم ءابدىراحمانوۆا, – قازىر بۋراباي اۋدانىنىڭ بىرنەشە تۇرعىنى كۇدىككە ءىلىنىپ وتىر.
ءبىر قىزىعى, جىلقىشىنىڭ جالى دا جىعىلعان جوق. قاماۋعا الۋ جونىندە سانكتسيا بولماعان. وسى اراسىن اشىنعان جۇرت تۇسىنبەي, اڭتارىلىپ وتىر. جايلاعان جەرىنەن سۋ شىققانداي ءبىر تۇندە كوشىپ كەتكەن جىلقىشى كورشى اۋىلدا تۇراتىن كورىنەدى. ءبارى بەلگىلى بولعانىمەن, قاشاعانعا قۇرىق تۇسپەۋ سەبەبى بەيمالىم.
بايقال ءبايادىل,
«ەگەمەن قازاقستان»
اقمولا وبلىسى
