ءىس-شارانى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى مەن 2005 جىلدان باستاپ «بالالىق شاقتان كوزقاراس» جوباسىن جۇزەگە اسىرىپ كەلە جاتقان يۋنەسكو كلۋبى ۇيىمداستىردى.
باعدارلاما قازاقستاننىڭ بارلىق ايماقتارىندا قوسىمشا ءبىلىم بەرۋ ۇيىمدارىنا باسا كوڭىل بولۋگە شاقىرادى. باعدارلامانىڭ العاشقى جىلىندا ەلباسىنىڭ كىتاپحاناسى مۋزەيىنىڭ كورمەسىنە سەمەي, پاۆلودار, شىمكەنت جانە ەكىباستۇز قالالارىنداعى بالالار كوركەمسۋەرت مەكتەبى تۇلەكتەرىنىڭ ديپلومدىق جۇمىستارى قويىلدى. استانانىڭ 20 جىلدىعىندا «تۋعان ولكەم» باعدارلاماسىنىڭ بارلىق كورمەلەرى ەلوردا مەرەيتويىنا ارنالادى. كورمە ناتيجەسى بويىنشا قازىلار القاسى ۇزدىك جۇمىستارمەن قاتار, سايىسقا قاتىسقان ءار مەكتەپتىڭ ۇزدىك مۇعالىمىن انىقتادى. ءتورت كورمەگە ءتۇرلى تەحنيكا مەن جانردا ورىندالعان 300-گە جۋىق جۇمىس قاتىستى. ولاردىڭ ۇزدىگى نازارباەۆ ورتالىعى عيماراتىنىڭ قورىتىندى كورمەسىندە ۇسىنىلدى.
– «تۋعان جەرىم» رەسپۋبليكالىق بايقاۋىنىڭ جەڭىمپازدارىمەن ەلباسى كىتاپحاناسىندا تاۋەلسىزدىك كۇنى قارساڭىندا قاۋىشۋ – ۇلكەن قۋانىش. «بالالىق شاقتان كوزقاراس» جوباسى مەن «تۋعان ولكەم» رەسپۋبليكالىق باعدارلاماسىن ويداعىداي جۇزەگە اسىرۋدىڭ دا قۋانتارلىق جاعداي ەكەنىن ايتا كەتكەن ءجون. وسى ورايدا ارىپتەستەرىمىزگە, ۇستازدار مەن وقۋشىلارعا اتقارىلعان ورتاق جۇمىس ءۇشىن ۇلكەن العىس ايتامىز. كەلەر جىل جاڭا كەزدەسۋلەر مەن تىڭ كورمەلەرگە تولى بولماق. دارىندى جاستارىمىزدىڭ جۇمىسى ۇسىنىلعان بۇگىنگى كورمە ولاردىڭ شىمىلدىعىن اشقالى وتىر, – دەدى ەلباسى كىتاپحاناسى ديرەكتورىنىڭ ءبىرىنشى ورىنباسارى ءامىرحان راحىمجانوۆ.
«تۋعان جەرىم» XIV حالىقارالىق بالالار شىعارماشىلىعى بايقاۋىنىڭ جەڭىمپازدارىنا ەستەلىك سىيلىقتار مەن ديپلومداردى قازاقستاننىڭ ەڭبەك سىڭىرگەن مادەنيەت قايراتكەرى نەللي شيرۆينا, قازاقستاننىڭ قۇراق قۇراۋ شەبەرلەرى قاۋىمداستىعىنىڭ پرەزيدەنتى تامارا شتروشەرەر, استانا قالاسى. بالالار كوركەمسۋرەت مەكتەبىنىڭ ديرەكتورى گۇلزيا يسەنوۆا, استانا سۋرەتشىلەرى وداعى باسقارماسىنىڭ توراعاسى جانۇزاق ءمۇساپىر تابىستادى.
بايقاۋدىڭ ءىىى دارەجەلى ديپلومىمەن الينا جالعاسقۇلوۆا, تۇمارحانىم سۇلتانبەك, ايدا ەركوباي, ارايلىم قايروللا, اناستاسيا بوروۆسكايا ماراپاتتالدى. ءىى دارەجەلى ديپلومدى اسەماي تۇگەلباەۆا, ماليكا دۋلاتوۆا, بالجان اكىمجانوۆا, زۋلفيا مۋفە يەلەندى.
I دارەجەلى ديپلومعا كارينا يلياحۋنوۆا, اقجول كاراعۇلوۆ, ساعىنىش قايروللا, پولينا حولەۆيچ يە بولدى. بايقاۋدىڭ باستى جۇلدەسىن قىمبات تىلەمىسوۆا, ەۆا شتروشەرەر, ەكاتەرينا كريۆيلەۆا قانجىعاسىنا بايلادى.
قوسىمشا ءبىلىم بەرۋ ۇيىمدارىن قولداۋ جونىندەگى «تۋعان ولكەم» رەسپۋبليكالىق باعدارلاماسىنىڭ لاۋرەاتتارى بولىپ زۋحرا تۇرسىنبەكوۆا, اناستاسيا پروكوپتسەۆا, مەيراش اسىلتاسوۆا اتالدى.
ەلباسى كىتاپحاناسى ديرەكتورىنىڭ ءبىرىنشى ورىنباسارى ءامىرحان راحىمجانوۆ ۇزدىك ۇستازدار رەتىندە جەڭىس مۇقىشەۆ, سۆەتلان رەين, قاليا قاراباەۆا, ولگا استاپەنكو, الەكسەي سميرنوۆ سىندى سۋرەتشىلەردى ماراپاتتادى.
ۇلاربەك نۇرعالىم ۇلى,
«ەگەمەن قازاقستان»
