جاقىندا وبلىستى وتاندىق ءسۇت ونىمدەرىمەن قامتاماسىز ەتىپ وتىرعان كاسىپورىننىڭ جۇمىس بارىسىمەن تانىسىپ قايتتىق. ءوندىرىس ورنىنىڭ تاريحىنا از-كەم توقتالساق. مۇندا ءسۇت ءوندىرۋ 1997 جىلدان باستالسا, 1999 جىلدان باستاپ ايران سەكىلدى قىشقىل ءسۇت ونىمدەرىن ءوندىرۋ جولعا قويىلىپتى. ال 2003 جىلى بالقىتىلعان ىرىمشىك ءوندىرىسى ىسكە قوسىلدى. زاماناۋي جابدىقتارمەن جاراقتالعان تسەحپەن وسكەمەنگە كەلگەن جۇمىس ساپارىندا ەلباسى دا تانىستى. 2013-2015 جىلدارى كاسىپورىندا اۋقىمدى جاڭعىرتۋ جۇمىستارى جۇرگىزىلىپ, 2014-2015 جىلدارى Le’Vital جانە «يو-حو-حو» برەندتەرى نارىققا شىعارىلدى. 2015 جىلى زىريان, سەمەي جانە الماتى قالالارىندا فيليالدارى اشىلدى. 2017 جىلى كاسىپورىن ءسۇت ونىمدەرىنىڭ 15 ءتۇرىن وندىرىسكە جىبەردى. بۇگىندە كۇنىنە 120-130 توننا ءونىم وندىرسە, الداعى ۋاقىتتا بۇل كورسەتكىشتى 180 تونناعا جەتكىزۋدى جوسپارلاپ وتىر. «وسى ماقساتتا قازىر ەكىنشى وندىرىستىك الاڭ سالىپ جاتىرمىز. جۇمىس باستالدى. ء«وندىرىس» باعدارلاماسى ارقىلى مەملەكەتتەن 6 پايىزبەن نەسيە الدىق. جارتى قاراجاتى – وزىمىزدەن. جوبا ساتىمەن جۇزەگە اسقان كەزدە 100-دەن استام جاڭا جۇمىس ورنى اشىلادى. قازىر ءبىز وبلىستى 100 پايىز ءسۇت ونىمدەرىمەن قامتاماسىز ەتىپ وتىرمىز. ماقسات – وبلىسقا عانا ەمەس, ەلىمىزدىڭ باسقا وڭىرلەرىنە دە ساپالى ءسۇت ونىمدەرىن شىعارۋ. قازىر بۇل جۇمىستارمەن شۇعىلدانىپ جاتىرمىز», دەيدى «ەميل» جشس باس ديرەكتورى اننا ابەرلە.
«ەميل» جشس وندىرىستىك دەپارتامەنتىنىڭ ديرەكتورى ليۋبوۆ گالۋشكونىڭ ايتۋىنشا, كاسىپورىن ءوڭىردىڭ ەڭ ءىرى دەگەن 13 شارۋاشىلىعىمەن تىعىز جۇمىس ىستەيدى. ياعني, ولاردان ءسۇت ساتىپ الادى. «شەمونايحا اۋدانىنداعى «كامىشينسكوە» شارۋا قوجالىعى كۇنىنە 24-25 تونناعا دەيىن ءسۇت وتكىزەدى. باسقا شارۋا قوجالىقتارىنان دا ءارتۇرلى كولەمدە ءسۇت قابىلدايمىز. سىزدەردىڭ داستارقاندارىڭىزدا تۇرعان ءسۇت پەن ايران, باسقا دا ونىمدەرىمىز ءبىر قاراعاندا وڭاي دايىندالعانداي كورىنۋى مۇمكىن. بۇلاي ويلاساڭىز استە قاتەلەسەسىز. كاسىپورىندا 1 مىڭنان استام ادام كۇنى-ءتۇنى تىنباي جۇمىس ىستەيدى. ءۇش تسەحىمىز بار. ءبىر عانا ءسۇت تسەحىندا 230 ادام ەڭبەك ەتەدى. 2014-2015 جىلدارى كاسىپورىندا اۋقىمدى جاڭعىرتۋ جۇمىستارى جۇرگىزىلگەننەن كەيىن ءوندىرىس كولەمى ۇلعايدى», دەيدى ول.
مۇنداعى جۇمىس پروتسەسى ءسۇت قابىلداپ الىپ, ونى زەرتحانادان وتكىزۋدەن باستالادى ەكەن. ءارى قاراي قات-قابات شارۋا. ءسۇتتى تازالاۋ, سۇزگىدەن وتكىزۋ, مايلىلىعىن انىقتاۋ, ايران, يوگۋرت بولسا, ونى اشىتۋ, ءارتۇرلى دامدەۋىشتەر قوسۋ... وسىلاي جالعاسىپ كەتە بەرەدى. ەڭ سوڭى, ونىمدەردى قاپتاۋمەن, سەرتيفيكاتتاۋمەن اياقتالادى. ارعى جاعى – بەلگىلى. دۇكەن, بازارلارعا جول تارتادى. دەپارتامەنت ديرەكتورىنىڭ سوزىنەن تۇيگەنىمىز, مۇنداعى ەڭ جىلدام دايىندالاتىن ءونىم – ءسۇت پەن بالمۇزداق. ءسۇت ءبىر تاۋلىككە جەتپەي ءازىر بولادى ەكەن. ال ەڭ ۇزاق دايىندالاتىنى – ايران. ءونىم سۇيىلىپ كەتپەۋى ءۇشىن تەك 18 ساعات بويى سۋىقتا تۇرۋ كەرەك. ءونىم قاپتاماعا قۇيىلعاننان كەيىن ءبىراز ۋاقىت قوزعالماي تۇرۋى قاجەت. ويتپەسە قۇرىلىمى وزگەرىپ كەتەدى-مىس. وسىنداعى ءسۇت تسەحىندا ماي دا وندىرىلەدى.
قازىر «ەميل» جشس-ءنىڭ الماتى, استانا, سەمەي, وسكەمەن قالالارى مەن التاي (زىريان) جانە شەمونايحا اۋداندارىندا 37 فيرمالىق دۇكەنى جۇمىس ىستەيدى. فيرمالىق دۇكەندەردەگى ونىمدەر ازىق-ت ۇلىك دۇكەندەرىنەن تومەن باعادا ساتىلادى.
ازامات قاسىم,
«ەگەمەن قازاقستان»
وسكەمەن
