بۇل قوسىمشانىڭ ەرەكشەلىگى, جۇمىسسىز جۇرگەن جاندار بوس جۇمىس ورىندارى مەن ءارتۇرلى قىزمەتتەر جونىندە تەگىن اقپارات الىپ, وزدەرى تۋرالى مالىمەتتەردى دە وسىندا ورنالاستىرا الادى. قاراپايىم تۇرعىندار دا قوسىمشانى پايدالانىپ, وزدەرىنە قاجەتتى مامانداردى (سانتەحنيك, ەلەكتريك, سىلاقشى, تاعى باسقا) تابۋىنا مۇمكىندىك بار.
«بۇل قوسىمشا جۇمىسسىز جۇرگەن كىسىلەرگە دە, قاراپايىم تۇرعىندارعا دا پايدالى. ماسەلەن, ءسىز سانتەحنيك نەمەسە ەلەكتريك بولساڭىز, ۇيدەن شىقپاي-اق قوسىمشاعا ءوزىڭىز تۋرالى مالىمەتتەردى ەنگىزىپ قويۋىڭىزعا بولادى. ەلىمىزدىڭ كەز كەلگەن تۇرعىنى ءوزى تۇراتىن قالادان (اۋدان, اۋىلدان) سانتەحنيك نەمەسە ەلەكتريك ىزدەسە, وسىندا كىرىپ, اتالعان مامانداردى تاڭداي الادى. وزىنە قولايلى باعانى قويادى. ءموبيلدى قوسىمشا «بوس جۇمىس ورىندارى», «كومەك», «قىزمەت كورسەتۋ» سەكىلدى بولىمدەردەن تۇرادى. قوسىمشانى بارلىق قازاقستاندىقتار Play Market, App Store باعدارلامالارى ارقىلى كوشىرىپ, تەگىن قولدانا الادى. ەرەكشە ايتقىم كەلەتىنى, «كومەك» ءبولىمى ارقىلى ۇيىڭىزدەگى ارتىق زاتتار تۋرالى اقپاراتتى قوسىمشاعا ورنالاستىرىپ, مۇقتاج جاندارعا دا جاردەمدەسە الاسىز», - دەيدى قوسىمشا اۆتورى.
قالا, اۋدان, اۋىل تۇرعىندارىنىڭ پايدالانۋىنا قولايلى باعدارلامانى جاساپ شىعۋ ءۇشىن اۆتور ءبىر جىلداي تەر توگىپتى. تەگىن قوسىمشاعا 40 شاقتى بوس ورىن مەن 100-گە تارتا قىزمەت تۇرلەرى ەنگىزىلگەن. ونەرتاپقىش قوسىمشا قازاقستان بويىنشا جۇمىسىن باستاعانىن, ەلىمىزدە IT مامانداردىڭ ازدىعىنان ازىرگە ءتىلى ورىسشا بولعانىمەن, ءبىر-ەكى اي كولەمىندە قازاقشا نۇسقاسى ىسكە قوسىلاتىنىن جەتكىزدى. قاراپايىم تۇرعىندارعا قاجەتتى ءىستى قولعا العان كاسىپكەر جىگىت ەڭبەك جانە الەۋمەتتىك قورعاۋ مينيسترلىگى, وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارمالارى تاراپىنان قولداۋ بولسا, بىرلەسە جۇمىس ىستەۋگە دايىن ەكەندىگىن ايتادى.
ازامات قاسىم,
«ەگەمەن قازاقستان»
شىعىس قازاقستان وبلىسى
