ەلباسى « ۇلى دالانىڭ جەتى قىرى» ماقالاسىندا تۇركى الەمىنىڭ بەسىگى بولىپ, ەۋروپا مەن ازيانىڭ كوپىرىنە, شىعىس پەن باتىستىڭ قاقپاسىنا اينالعان ۇلى دالامىزدىڭ جەتى قىرىن ايقىنداپ بەردى. «ۇلت تاريحىنداعى كەڭىستىك پەن ۋاقىت» جانە «تاريحي سانانى جاڭعىرتۋ» دەپ اتالاتىن ەكى بولىمنەن تۇراتىن تولعاۋى تەرەڭ, ءمان-ماعىناسى شەكسىز, تۇعىرى بەرىك تۋىندى قازاقستاندىقتاردى عانا ەمەس, بۇكىل تۇركى حالقىن, كۇللى الەمنىڭ كوكىرەگى وياۋ, كوڭىلى جارىق تۇلعالارىن ەلەڭ ەتكىزدى.
تۇڭعىش پرەزيدەنتىمىز – ەلباسىنىڭ بۇل ماقالاسى «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ جالعاسى ەكەنى ايقىن كورىنىپ تۇر. بۇل جونىندە ەلباسى ماقالاداعى قورىتىندى سوزىندە دە اتاپ وتكەن. سوندىقتان بۇل تۋىندى ۇلتىمىزدىڭ, بارشا قازاقستاندىقتاردىڭ رۋحاني ءومىرىن جاڭعىرتۋدىڭ نەگىزگى تۇعىرى – ۇلت تاريحىنا ارنالعانىن بايقايمىز.
ارينە, كەز كەلگەن ۇلتتىڭ انا ءتىلى, عاسىرلار بويى قالىپتاسقان سالت-ءداستۇرى جانە تاريحى سول ۇلتتى وزگەگە تانىتاتىن, تانىستىراتىن جانە وزىندىك ەرەكشەلىكتەرىن ايقىندايتىن نەگىزگى بەلگىلەرى. دەمەك, اتاپ كورسەتىپ وتىرعان ەرەكشەلىكتەرىمىزدى كوزدىڭ قاراشىعىنداي قورعاپ, ساقتاپ, دامىتۋىمىز قاجەت. سونىمەن قاتار قازىرگى زاماننىڭ دامۋ ديناميكاسىن, كوممۋنيكاتسيالار قارقىنىن, قارىشتاپ دامىعان اقپاراتتىق قۇرالداردىڭ الەۋەتىن, تەرىس پيعىلداعى توپتاردىڭ كەرى تارتار جانە دەسترۋكتيزمگە قۇرىلعان ويلارى مەن ءىس-ارەكەتتەرىن ەسكەرەر بولساق, ءبىز ۇلتىمىزدىڭ ەرەكشەلىگىن انىقتايتىن بەلگىلەردى ساقتاپ قانا قويماي, ولاردى دارىپتەپ, ناسيحاتتاۋىمىز اسا ماڭىزدى. وسى ورايدا ۇلتىمىزدىڭ رۋحاني قازىناسىنىڭ بوس تۇرعان بولشەگىن مەملەكەت باسشىسىنىڭ « ۇلى دالانىڭ جەتى قىرى» اتتى ماقالاسى ءوزىنىڭ قۇندىلىعىمەن جانە ماڭىزدىلىعىمەن تولىقتىرىپ تۇر.
نۇرسۇلتان نازارباەۆ وسى ماقالاسى ارقىلى قازاق ۇلتى, ونىڭ الەمدىك وركەنيەتتى دامىتۋعا قوسقان ۇلەسى, ۇلى دالانى امانات قىلىپ كەيىنگى ۇرپاققا قالدىرعان كونە ءداۋىر تارلاندارىنىڭ ەۋرازيا كەڭىستىگىندەگى ۇلتتار مەن ۇلىستار مادەنيەتىن قالىپتاستىرۋداعى قولتاڭباسى جونىندە كوپتىڭ كوڭىلىندەگى سانداعان ساۋالدارعا جاۋاپ بەردى. ءبىز تىلگە تيەك ەتىپ وتىرعان باعدارلامالىق ماقالا تۇگەل تۇركى حالقى مەن ۇلى دالادان باستاۋ الاتىن ەجەلدەن تامىرلاس ۇلىستاردىڭ دا ورتاق يگىلىگىنە اينالارى انىق.
سونىمەن ءبىز ساقتاردىڭ, عۇنداردىڭ, تۇركى ەتنوستىق توپتارىنىڭ مۇراگەرىمىز. ارينە, ءبىز ۇلتجاندى حالىق ەكەندىگىمىزدى كورسەتە وتىرىپ, ءبىزدىڭ تاريحىمىزعا كوپتەگەن ءارتۇرلى ۇلت وكىلدەرى ەڭبەك سىڭىرگەنىن بىلەمىز. پرەزيدەنت ماقالاسىندا بۇل جونىندە دە ايتىلعان. سوندىقتان ۇلتتىق بولمىسىمىزدى, كودىمىزدى ءوزىمىز تانىپ قانا قويماي, وزگەلەرگە دە تانىتۋ ءبىزدىڭ يدەولوگيامىز بولىپ تابىلادى.
الداعى ماقساتىمىز – ءبىز ءوز تاريحىمىزبەن ماقتانىپ قانا قويماي, سول تاريحتىڭ قىر-سىرىن ساراپتاپ, عىلىمي نەگىزدە بولاشاققا باعدار جاساۋىمىز قاجەت. ءبىز جاھاندانۋ زامانىنا, رۋحاني جاڭعىرۋ داۋىرىنە تەرەڭدە جاتقان تامىرىمىزدى سولدىرماي ەنۋىمىز كەرەك. وسى ورايدا ءبىزدىڭ تاريحشىلارىمىزدىڭ, كونە ادەبيەتىمىز بەن مادەنيەتىمىزدى, جازۋ-سىزۋىمىزدى زەرتتەپ جۇرگەن عالىمدارىمىزدىڭ الدىنان جاڭا ءبىر ىزدەنىستەردىڭ شىڭى مەن شىڭىراۋى كورىندى, كۇن تارتىبىنەن ورىن الدى.
قازىرگى تاڭدا حالقىمىز تەك قانا ماتەريالدىق توقشىلىقپەن شەكتەلۋگە بولمايتىندىعىن ءتۇسىنىپ وتىر. ول – ۋاقىتشا. ال رۋحاني توقشىلىق – ماڭگىلىك. ەلباسىنىڭ ماقالاسى دا وسى قاستەرلى ۇعىمدى ەل ساناسىنا ءسىڭىرۋدى كوزدەيدى.
ەندىگى ءبىزدىڭ بارشامىزدىڭ مىندەتىمىز – پرەزيدەنت ايقىنداپ بەرگەن باسىمدىقتاردى ىسكە اسىرۋعا كوپ بولىپ, جۇدىرىقتاي جۇمىلۋ. بۇل – ءبىزدىڭ حالقىمىزدىڭ, قازاقستاندىقتاردىڭ قولىنان كەلەدى.
مۇحتار جۇماعازيەۆ,
پارلامەنت سەناتىنىڭ دەپۋتاتى
