اتالعان جارىستا استانا قالاسىنىڭ رايىمبەك باتىر اتىنداعى №50 «قازعارىش» مەكتەپ-ليتسەيىنەن قاتىسقان 11 «ا» سىنىپ وقۋشىسى جۇماحان نۇرشات وزا شاۋىپ, جۇلدەلى 2-ورىن جانە كۇمىس مەدال يەگەرى اتاندى.
ءبىلىم جانە عىلىم مينيسترلىگىنىڭ مالىمەتىنشە وليمپيادانىڭ العاشقى ايماقتىق كەزەڭىنە 2461 وقۋشى قاتىسقان. قاتىسۋشىلارعا بەرىلگەن تاپسىرمالار جيىنتىعى جوعارى حالىقارالىق ستاندارتتارعا سايكەس دايارلانعان. ءبىرىنشى كەزەڭنىڭ قورىتىندىسى بويىنشا ەلىمىزدىڭ بارلىق ايماقتارىنىڭ 407 مەكتەپ ءبىتىرۋشى on-line رەجيمىندە وتكىزىلگەن وليمپيادانىڭ قاشىقتىق كەزەڭىنە قاتىسىپ, ولاردىڭ 161-ءى جارىستىڭ قورىتىندى كەزەڭىنە جولداما العان.
«بۇل وليمپيادا نەگىزىنەن 3 كەزەڭنەن تۇرادى. العاشقى ەكەۋىنەن ءوتىپ, جۇزدەن جۇيرىك, مىڭنان مىقتى شىققاندار رەسپۋبليكالىق جارىسقا جولداما الادى. وسى جولعى سايىستا وزىمە قيىن بولدى. سەبەبى, بۇل وليمپيادا بولسا دا ۇبت سياقتى تەكسەرۋ جاعى دا, باقىلاۋشىلار دا قاتال. سىناقتى نەگىزگى 4 ءپان بويىنشا تاپسىردىق. ولاردىڭ ىشىندە فيزيكا, ماتەماتيكا, حيميا, بيولوگيا بار. ايتا كەتەتىن تاعى ءبىر جايت, بۇل وليمپيادا تەك مەكتەپ ءبىتىرۋشى تۇلەكتەرگە ارنالعان. مەن ءوزىم فيزيكا-ماتەماتيكا ءپانىن تاڭداپ, بولاشاقتا وسى سالادا مۇعالىم بولسام دەگەن ويىم بار. ماعان ۇناعان تاعى ءبىر نارسە بۇل وليمپيادانىڭ تەمىرتاۋ قالاسىندا ءوتۋى. سەبەبى, ەلباسى نۇرسۇلتان نازارباەۆ ەڭبەك جولىن وسى شاھاردان باستاعان. بۇل ءبىزدىڭ بولاشاق ومىرىمىزگە ۇلكەن سەنىم مەن سەرپىن بەردى. بۇل جەتىستىك تەك مەنىڭ عانا جەتىستىگىم ەمەس. وسى بەلەستى ۇستازدارىمنىڭ بەرگەن ءبىلىمىنىڭ, جاقىندارىمنىڭ ارتقان ءۇمىتىنىڭ, مەكتەبىمنىڭ ماعان دەگەن سەنىمىنىڭ ارقاسىندا باعىندىردىم. ەڭ باستىسى جەڭىس ەمەس. مەن پرەزيدەنتتىك وليمپياداعا قاتىسىپ ەلىمىزدىڭ بولاشاعى بولاتىن دارىندى بالالارمەن تانىسىپ, وزىمە كوپ دوس تابا ءبىلدىم. ءبىلىم جولىن قۋعان ءاربىر وقۋشى ءۇشىن بۇل سوزبەن ايتىپ جەتكىزە المايتىن قۋانىش. بۇل مەنىڭ جانە مەنىڭ ۇستازدارىمنىڭ 11 جىلعى ەڭبەگى. ەندىگى بۇل جەتىستىك تەك باستاماسى عانا دەپ ويلايمىن. بولاشاقتا ۇستاز دەگەن ۇلى اتقا يە بولىپ, بىلىكتى مامان اتانىپ, ەگەمەندى ەلىمىزدىڭ بولاشاعى ءۇشىن ۇلكەن ۇلەسىمدى قوسامىن. ءبىلىم مەن عىلىمنان جەتكەن جەتىستىكتەرىمە اتا-انامنىڭ جانە تۋىستارىمنىڭ قوسقان ۇلەسىن ايتپاي كەتە المايمىن. سول جانداردان قانىما سىڭگەن وقۋعا دەگەن ىنتا مەنى جىگەرلەندىرەدى. ال ول كىسىلەردىڭ بالا نۇرشاتتىڭ بىلىمگە دەگەن قۇشتارلىعىن بايقاپ, ماعان دەمەۋ بولا بىلگەنىنە العىسىم شەكسىز», دەيدى رايىمبەك باتىر اتىنداعى №50 «قازعارىش» مەكتەپ-ليتسەيىنىڭ 11-سىنىپ وقۋشىسى جۇماحان نۇرشات.
قازىلار القاسىنىڭ شەشىمى بويىنشا التىن مەدالدار جانە ءى دارەجەلى ديپلومدارمەن 8 قاتىسۋشى, ءىى دارەجەلى ديپلومدار جانە كۇمىس مەدالدارمەن 12 قاتىسۋشى, ءىىى دارەجەلى ديپلومدار جانە كۇمىس مەدالدارمەن 18 قاتىسۋشى ماراپاتتالعان.
