اقتاۋدا وتكەن جارىستىڭ دەڭگەيى جوعارى بولدى. بىلتىر گەرمانيانىڭ گامبۋرگ قالاسىندا ۇيىمداستىرىلعان الەمدىك دودادا جەڭىس تۇعىرىنا كوتەرىلگەن التى بوكسشىمىزدىڭ بەسەۋى ەل بىرىنشىلىگىندە قارسىلاس شىداتپادى. اسىرەسە ءبىز 75 كيلو سالماق دارەجەسىندە كۇش سىناسقان جامبىل وبلىسىنىڭ تۇلەگى ءابىلحان امانقۇلدىڭ اسقان شەبەرلىگىنە ءتانتى بولدىق. نۇرلان اقۇرپەكوۆتەي بىلىكتى باپكەردەن ءتالىم-تاربيە العان قازاقتىڭ ءور مىنەزدى ۇلى بارلىق قارسىلاسىن بەت قاراتپاي ۇتىپ, جەڭىس تۇعىرىنىڭ ەڭ بيىك ساتىسىنا كوتەرىلدى. وزگەلەردى ايتپاعاندا, ازيا بىرىنشىلىگىنىڭ كۇمىس جۇلدەگەرلەرى – رۋستام سىباەۆ پەن ەرىك ءالجانوۆ, يسلام ىنتىماقتاستىعى ويىندارىنىڭ جەڭىمپازى تۇرسىنباي قۇلاحمەت سىندى ساقا سپورتشىلاردىڭ وزدەرى ابىلحانعا جارىتىپ قارسىلىق كورسەتە المادى.
ريو وليمپياداسى مەن الەم چەمپيوناتىندا جۇلدە العان 91 كيلو سالماقتاعى قوستانايلىق ۆاسيلي لەۆيت پەن بىلتىرعى دۇنيەجۇزىلىك دودادا كۇمىس مەدالدى موينىنا ىلگەن +91 كيلو سالماقتاعى قىزىلوردالىق قامشىبەك قوڭقاباەۆتىڭ قارقىنى وتە كۇشتى بولدى. بارلىق قارسىلاستارىن ءبىر دەممەن ۇتقان ولار باس جۇلدەنى قانجىعالارىنا بايلادى. 56 كيلو سالماقتاعى تۇركىستاندىق قايرات ەراليەۆتىڭ دە وزگە بوكسشىلاردان باسىمدىعى ەش كۇمان تۋعىزعان جوق.
كوپشىلىك 69 كيلو سالماق دارەجەسىندەگى قاراعاندىلىق ابىلايحان ءجۇسىپوۆ پەن تارازدىق اسلانبەك شىمبەرگەنوۆتىڭ جەكپە-جەگىن تاعاتسىزدانا كۇتتى. بۇگىنگى تاڭدا ەكەۋىنىڭ دە ءداۋىرى ءجۇرىپ تۇر. جاسوسپىرىمدەر مەن جاستار اراسىنداعى جارىستاردا التىن تۇعىردان تومەندەمەگەن ابىلايحان ەرەسەكتەر توبىنا دا ەركىن قوسىلدى. ول الەم جانە ازيا چەمپيوناتتارىندا اتوي سالدى. اسلانبەك – دۇنيەجۇزىلىك بوكس سەرياسى دوداسىنداعى ەڭ ۇزدىك بوكسشىلاردىڭ ءبىرى, جازعى ازيا ويىندارىنىڭ كۇمىس جۇلدەگەرى. ەكەۋارا تارتىس ءجۇسىپوۆتىڭ پايداسىنا شەشىلدى. باسەكە بارىسىندا ابىلايحان قارسىلاسىن ءبىر مارتە نوكداۋنعا جىبەردى. جەكپە-جەكتەن كەيىن ابىلايحانمەن تىلدەسكەنىمىزدە ول بۇل ايقاسقا بۇرىننان دايىندالعانىن ايتتى.
– اسلانبەك الەۋەتى جوعارى, تاجىريبەلى بوكسشى. 69 كيلودا ەكى دۇركىن ەل چەمپيونى. سوندىقتان ونى وسال دەۋگە بولمايدى. ءبىز سپاررينگتە دە وتە سيرەك كەزدەستىك. سەبەبى ول «استانا ارلاندارىنىڭ» ساپىندا جۇرگەندىكتەن, بىرلەسىپ وتكىزگەن جاتتىعۋلارىمىز از بولدى. ال جاتتىعۋ بارىسىنداعى جۇدىرىقتاسۋدا تولىعىمەن اشىلمادىق دەپ ويلايمىن. نەگىزگى قارسىلاس بولعاندىقتان كوبىنە جۇمباق كۇيدە جۇردىك. ءبىز رينگكە ءبىر-ءبىرىمىزدى تولىق زەرتتەپ شىقتىق. اسلانبەكتىڭ جەكپە-جەكتەرىن قالت جىبەرمەي قاراپ, تولىق نازاردا ۇستادىق. فينالدا كوپ قاتەلەستىم دەپ ويلامايمىن. الەكساندر سترەلنيكوۆ مەنىڭ ەكىنشى باپكەرىم. قازىرگى سالماعىم بويىنشا بوكسشىلاردى باپتاۋدا وڭ ناتيجە كورسەتىپ, وليمپيادا چەمپيونىن شىعارعان مامان. الدا بىرلەسىپ جۇمىس ىستەپ, اۋىز تولتىرىپ ايتارلىقتاي ناتيجەگە جەتەمىز دەپ ۇمىتتەنەمىن.
گامبۋرگتە وتكەن الەم چەمپيوناتىندا جۇلدە العان بوكسشىلار اراسىنان تەك اسا جەڭىل سالماقتاعى ەرجان جومارت قانا باس جۇلدەسىز قالدى. جاراقاتىنا بايلانىستى ول جارتىلاي فينالدىق سايىسقا شىققان جوق. بۇل سالماقتا اقمولالىق تەمىرتاس ءجۇسىپوۆ توپ جاردى. ال وسى جارىستىڭ وزگە جەڭىمپازدارى مىنالار: 52 كيلو – ءانۋار مۇزافاروۆ (الماتى وبلىسى), 60 كيلو – زاكىر سافيۋللين (شىمكەنت قالاسى), 64 كيلو – ءساناتالى تولتاەۆ (ماڭعىستاۋ وبلىسى) جانە 81 كيلو – بەك نۇرماعامبەت (تۇركىستان وبلىسى).
بايىپتاپ قاراساڭىزدار, بيىلعى قازاقستان چەمپيوناتىندا توپ جارعانداردىڭ دەنى ساقا سپورتشىلار. سولاردىڭ اراسىندا ەڭ ەرەسەگى – زاكىر سافيۋللين. ول – 32 جاستا. تەمىرتاس ءجۇسىپوۆ پەن ۆاسيلي لەۆيتتىڭ جاسى – 30-دا. قايرات ەراليەۆ – 28, قامشىبەك قوڭقاباەۆ – 27 جانە ءانۋار مۇزافاروۆ – 26 جاستا. ولاردىڭ بارلىعى دا وسى دەڭگەيگە وزدەرىنىڭ قاجىرلى ەڭبەگى مەن تاباندىلىعىنىڭ ارقاسىندا قول جەتكىزىپ وتىر. اقتاۋداعى ايقاس بارىسىندا سوعان انىق كوز جەتكىزدىك. ال قالعاندارى ورىمدەي جاستار. ماسەلەن, ءساناتالى تولتاەۆ نەبارى 19 جاستا. بەك نۇرماعامبەت ەندى عانا 20 جاسقا تولىپ وتىر. تالاي ءدۇبىرلى دودادا دارالانىپ, كورەرمەندەردىڭ كوزايىمىنا اينالىپ ۇلگەرگەن ابىلايحان ءجۇسىپوۆ پەن ءابىلحان امانقۇل 21 جاستا. سونداي-اق ەل بىرىنشىلىگىندە جۇلدەگەرلەر قاتارىنان كورىنگەن جاندوس نەسىپجان (49 كيلو), ورازبەك اسىلقۇلوۆ (56 كيلو), سەرىك تەمىرجانوۆ (60 كيلو), ءساماتالى تولتاەۆ (60 كيلو), امان قازانعاپوۆ (75 كيلو), ميحايل كوحانچيك (81 كيلو) جانە ايبولدى داۋرەن ۇلى (+91 كيلو) سىندى جالىندى جاستاردىڭ دا ونەرى جانكۇيەرلەر كوڭىلىنەن شىقتى. جاستارى ءالى 20-عا دا كەلمەگەن سول سايىپقىراندار ەرتەڭگى كۇنى ەل بوكسىن ورگە سۇيرەيدى دەگەن سەنىمدەمىز.
جالپىكوماندالىق ەسەپتە تۇركىستان وبلىسى ورەندەرىنىڭ كوشى ىلگەرى بولدى. ولار 2 التىن, 3 كۇمىس جانە 2 قولانى ولجالادى. ەكىنشى ورىندا – ماڭعىستاۋ وبلىسى. رينگ قوجايىندارى 1 التىن, 3 كۇمىس جانە 4 قولانى ەنشىلەدى. ءۇشىنشى ساتىعا جامبىل وبلىسى جايعاستى. تارازدىڭ تاستۇلەكتەرى 1 التىن, 2 كۇمىس جانە 3 قولانى يەلەندى. سونداي-اق جەڭىس تۇعىرىنا كوتەرىلگەندەر اراسىندا مىنا وڭىرلەردىڭ وكىلدەرى دە بار: اقمولا وبلىسى (1 التىن+1 كۇمىس+1 قولا), استانا قالاسى مەن قىزىلوردا وبلىسى (1+0+2), الماتى مەن قاراعاندى وبلىسى (1+0+1), شىمكەنت قالاسى (1+0+0), قوستاناي وبلىسى (0+1+0), اقتوبە وبلىسى (0+0+2), پاۆلودار مەن شىعىس قازاقستان وبلىسى (0+0+1).
ەل چەمپيوناتىن قورىتىندىلاعان ۇلتتىق قۇرامانىڭ باس باپكەرى مىرزاعالي ايتجانوۆ قۇراماداعى وزگەرىستەر مەن الداعى جوسپارلارىن ايتتى. «قۇراما ساپىنا الىنعان جاڭا بوكسشىلار ساكەن بيبوسىنوۆ پەن ورازبەك اسىلقۇلوۆ. تاعى ءبىر ايتا كەتەر جايت, قۇرامادا ءۇشىنشى ءنومىرلى بولىپ جۇرگەن بوكسشىلار ەكىنشى, ال ءتورتىنشى ساپتاعىلار ءۇشىنشى ءنومىر بولىپ اۋىسىپ جاتىر. 81 كيلودا ونەر كورسەتكەن ماقتانىشىمىز ادىلبەك نيازىمبەتوۆ بىلعارى قولعابىن شەگەگە ءىلدى. ونىڭ ورنىنا كەلگەن بەك نۇرماعانبەت بۇل سالماقتا ادىلبەكتىڭ ورنىن جوقتاتپايدى دەپ ويلايمىز. 49, 56, 75, 91 جانە اسا اۋىر سالماق دارەجەلەرىندە ونەر كورسەتىپ جۇرگەن سپورتشىلار ءوز ورىندارىندا قالدى. ۇلتتىق قۇرامانىڭ بيىلعى وقۋ-جاتتىعۋلارى 6-13 جەلتوقسان ارالىعىندا استانادا وتەدى. سول ۋاقىتتا ادىلبەك نيازىمبەتوۆتىڭ ورنىنا ۇلتتىق قۇرامانىڭ جاڭا كاپيتانىنىڭ ەسىمى دە بەلگىلى بولماق. كەلەر جىلعى الەم چەمپيوناتى مەن ازيا بىرىنشىلىگى ادەتتەگىدەي 10 سالماق بويىنشا وتەدى», دەيدى م.ايتجانوۆ.
عالىم سۇلەيمەن,
«ەگەمەن قازاقستان»
