پروفەسسور بيشتىگا اكادەميا ستۋدەنتتەرىنە, ماگيسترانتتارىنا, دوكتورانتتارىنا سالىستىرمالى كونستيتۋتسيالىق جانە ەۋروپالىق قۇقىق, ەۋروپا زاڭنامالارىنىڭ پولشانىڭ كونستيتۋتسيالىق جۇيەسىنە اسەرى, ەۋروپاداعى ءوزىن-ءوزى ايماقتىق باسقارۋدىڭ تەوريالىق جانە دوكترينالىق نەگىزدەرى, ال دوكتور ستەفان دىركا عالامدانۋدىڭ ۇلتتىق ەكونوميكانى ترانسفورماتسيالاۋ ۇردىسىنە ىقپالى, ۇيىمداردا دامۋ نەگىزدەرى رەتىندە زياتكەرلىك ءارى ادامي كاپيتالدى قالىپتاستىرۋ تاقىرىپتارىنا ارنالعان قىزىقتى دارىستەر وقىدى.
پولياك عالىمدارىنىڭ الماتىعا ساپارى بارىسىندا د.ا.قوناەۆ اتىنداعى ەۋرازيالىق زاڭ اكادەمياسى مەن زەلەنوگۋرسك ۋنيۆەرسيتەتى, Katowice Schoolof Economics اراسىندا كەلىسىمدەر جاسالدى. بۇدان بىلاي اكادەميا پروفەسسورلارىمەن عىلىمي جانە ديداكتيكالىق ءوزارا بايلانىس جالعاسىپ تۇرادى. ەلىمىزدەگى وسى ىرگەلى وقۋ ورنىنداعى ءتۇرلى باعىتتاعى كافەدرالاردىڭ قىزمەتكەرلەرىمەن, جۇمىستارىمەن تانىسقان قوناقتار ءبىزدىڭ عالىمدارىمىزدىڭ دەڭگەيى جوعارى ەكەنىن, سوندىقتان وسىناۋ تاماشا ۇجىممەن ىنتىماقتاستىقتى كەڭەيتۋگە مۇددەلى ەكەندىكتەرى تۋرالى ويلارىن ورتاعا سالدى. الداعى ۋاقىتتا پولشا عىلىمي جۋرنالدارىندا قوناەۆتىق عالىمداردىڭ ماقالالارى جاريالانباقشى, وسىلايشا بولاشاقتا وتاندىق عىلىمي ەڭبەكتەر اقش, كانادا, ەۋروپا كەڭىستىگىنە جول اشادى.
ءوز رەسپۋبليكاسىندا كورنەكتى قوعام ءارى عىلىمي قايراتكەرى رەتىندە تانىمال, وتاندىق ساياساتقا وزىندىك ىقپالى بار اندجەي بيشتىگا مىرزا «الەمدەگى رەفەرەندۋم ينستيتۋتى», «ادام قۇقىعى جونىندەگى ەۋروپالىق سوت», «ادام قۇقىعى جونىندەگى ەۋروپا كونۆەنتسياسىنىڭ بىرىككەن ۇلىبريتانيا كورولدىگىنىڭ قۇقىقتىق جۇيەسىنە ىقپالى», «ادام قۇقىعى مەن بوستاندىعى جانە ولاردىڭ كەپىلى», «ادام قۇقىعى جونىندەگى ەۋروپا كونۆەنتسياسى جانە ونىڭ ىشكى قۇقىقتىق جۇيەگە ىقپالى» باعىتىندا ماسەلەلەر كوتەرگەن. سونداي-اق پولياك عالىمى «قازاقستان رەسپۋبليكاسىنىڭ كونستيتۋتسيالىق جۇيەسى» تاقىرىبىندا دا تەرەڭ زەرتتەۋ جۇمىستارىن جۇرگىزگەن. 1992 جىلى گااگا حالىقارالىق قۇقىق اكادەمياسىنىڭ (گااگا, نيدەرلاندى), ءدال وسى ۋاقىتتا ادام قۇقىعى جونىندەگى پوزنان ورتالىعىنىڭ, زاڭ عىلىمدارى ينستيتۋتىنىڭ (پولشا عىلىم اكادەمياسى), 1998 جىلى بريتاندىق كەڭەس – لەستەر ۋنيۆەرسيتەتىنىڭ (لەستەرا, ۇلىبريتانيا سولتۇستىك يرلانديا بىرىككەن كورولدىگىنىڭ), 1998 جىلى امەريكالىق زەرتتەۋلەرگە بايلانىستى زالتسبۋرگ سەمينارىنىڭ (اۋستريا) ستيپەندياتى بولىپ, 80-گە جۋىق حالىقارالىق جانە وتاندىق كونفەرەنتسيالارعا قاتىسقان, اندجەي بيشتىگا مىرزا ء وز وتانىنداعى جانە شەتەلدەردەگى كوپتەگەن عىلىمي باسىلىمداردىڭ دامۋىنا ۇلەس قوسىپتى. ەڭبەگىنە وراي ءتۇرلى دارەجەدەگى سىي-ماراپاتتارعا, قۇرمەتكە بولەنگەن. دوكتور ستەفان دىركا دا ەرەن ەڭبەگىمەن كوزگە تۇسكەن, عىلىمنىڭ, قوعامنىڭ دامۋىنا سۇبەلى ۇلەس قوسقان ءوز ەلىنىڭ ايتۋلى ازاماتى ەكەن.
مىنە, وسىنداي مارتەبەلى مەيماندارعا ەرەكشە ءىلتيپات بىلدىرگەن قوناەۆتىقتار اكادەميا اياسىنداعى عىلىمي وتىرىستىڭ كەڭەيتىلگەن سالتاناتتى ماجىلىسىندە اندجەي بيشتىگا مەن ستەفان دىركا مىرزالارعا اكادەميانىڭ قۇرمەتتى پروفەسسورى اتاعىن بەرىپ, قازاقى داستۇرمەن شاپان جاپتى. الداعى ۋاقىتتا وسى ءبىلىم ورداسىنىڭ ستۋدەنتتەرى, ماگيسترانتتارى پولشاعا بارىپ, وسىنداي كورنەكتى تۇلعالاردان ءدارىس الماق. اكادەميالىق ۇتقىرلىق اياسىندا بەلگىلى ءبىر مەرزىم اراسىندا ديپلومدارى اقش, كانادا, ەۋروپا مەملەكەتتەرىندە مويىندالاتىن وسى وقۋ ورىندارىندا قوناەۆتىق ستۋدەنتتەر دە ىلىمدەرىن دامىتىپ, دۇنيەتانىمدارىن كەڭەيتىپ, قوس ديپلوم الاتىن كۇن دە الىس ەمەس. ا.بيشتىگا مىرزانىڭ ايتۋىنشا, الەمدىك ۇردىستە انىقتالعانداي, مەملەكەتتىككە قاراعاندا جەكەمەنشىك جوو شۇعىل شەشىمدەر قابىلداپ, ولاردى تەزىرەك جۇزەگە اسىرادى ەكەن. ەندەشە مەملەكەتتىگىمىزدىڭ مىزعىماس بەرىكتىگىنىڭ, باياندىلىعىنىڭ كەپىلى – زاڭ ۇستەمدىگىنىڭ ورنىعۋىنا قوناەۆتىق عالىمدار الداعى ۋاقىتتا دا سۇبەلى ۇلەس قوسا بەرمەكشى.
گۇلزەينەپ سادىرقىزى,
«ەگەمەن قازاقستان»
الماتى
