ەكى ەلدىڭ مەملەكەت باسشىلارى ن. نازارباەۆ پەن ش. ميرزيوەۆتىڭ باستاماسىمەن وتكىزىلگەن فورۋم جۇمىسىنا قازاقستان مەن وزبەكستان وڭىرلەرىنىڭ باسشىلارى قاتىستى.
فورۋمنىڭ پلەنارلىق وتىرىسىندا ءسوز سويلەگەن قر ءبىرىنشى ۆيتسە-پرەمەرى 2018 جىلى ەكى حالىقتىڭ مادەني جانە ساۋدا-ەكونوميكالىق باعىتتاردا ءىس جۇزىندە جاقىنداي تۇسكەنىن اتاپ ءوتتى. اسقار مامين قازاقستانداعى وزبەكستان جىلىن ءساتتى وتكىزۋ تۇرعىسىنان فورۋمنىڭ ارنايى وتكىزىلگەنىن ايتىپ, بيىل ەكىجاقتى ىنتىماقتاستىقتى ودان ءارى دامىتۋعا سەپتىگىن تيگىزەتىن كوپتەگەن ءىس-شارالار ۇيىمداستىرىلعانىن تىلگە تيەك ەتتى.
قر مەن ءور اراسىنداعى ءوزارا ساۋدا-ساتتىق وڭ قارقىنعا يە. 2018 جىلدىڭ 9 ايىندا ساۋدا اينالىمى $2 ملرد استام سومانى قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 40% جوعارى.
«بولجامدارعا سايكەس, 2018 جىلدىڭ قورىتىندىسى بويىنشا ءوزارا ساۋدا-ساتتىق كولەمى $3 ملرد قۇرايدى. ەلباسى ساۋدا-ساتتىق كولەمىن ودان ءارى ۇلعايتۋدىڭ ۇلكەن الەۋەتىن ەسكەرە وتىرىپ, 2020 جىلعا قاراي ساۋدا اينالىمىنىڭ كولەمىن $5 ملرد جەتكىزۋ تۋرالى مىندەت قويدى», — دەدى قر ءبىرىنشى ۆيتسە-پرەمەرى.
اسقار مامين مەن اچيلباي راماتوۆ قازاقستان مەن وزبەكستان شەكاراسىنداعى — «جىبەك جولى» جانە «ياللاما» وتكىزۋ پۋنكتەرىن تەكسەردى.
تەكسەرۋ بارىسىندا تسيفرلىق تەحنولوگيالاردى قولدانۋمەن شەكارادان وتەتىن پۋنكتتەردىڭ ينفراقۇرىلىمىن جاڭعىرتۋ, قولدانىستاعى وتكىزۋ پۋنكتتەرىن جەدەلدەتىپ رەكونسترۋكتسيالاۋ, ەكى جاڭا وتكىزۋ پۋنكتتەرىن اشۋ ماسەلەلەرىن پىسىقتاۋ, سونداي-اق اۆتوۆوكزال سالۋ قاجەتتىگى ەسكەرىلدى.
ا. مامين شەكارالىق وتكىزۋ پۋنكتەرىندە ينفراقۇرىلىمدىق شەكتەۋلەردى الىپ تاستاۋدىڭ, ازاماتتاردىڭ, جۇكتەر مەن كولىك قۇرالدارىنىڭ بىرلەسكەن شەكارا بويىنشا قوزعالىسىنا قولايلى جاعدايلار جاساۋدىڭ ستراتەگيالىق ماڭىزدىلىعىن اتاپ ءوتتى.
ەكى ەل اراسىنداعى ىنتىماقتاستىقتىڭ ماڭىزدى باعىتتارى ونەركاسىپ, قۇرىلىس, كولىك, ترانزيت, تۋريزم جانە ت.ب. سالالارى بولۋى ءتيىس.
ءوز كەزەگىندە ءور پرەمەر-ءمينيسترىنىڭ ءبىرىنشى ورىنباسارى ا. راماتوۆ «ەكى ەل اراسىنداعى سەرىكتەستىك قاتىناستىڭ بەرىك نەگىزى جانە ۇزاقمەرزىمدى كەلەشەگى بار» دەدى. قازىرگى تاڭدا وزبەكستاندا ەكونوميكانىڭ ءارتۇرلى سالالارىندا قازاقستاندىق كاپيتالدىڭ قاتىسۋىمەن 260 جۋىق كاسىپورىن جۇمىس ىستەيدى. قازاقستاندا وزبەكستان جىلىن وتكىزۋ بارلىق سالالاردا ىنتىماقتاستىقتى كەڭەيتۋدىڭ باستاۋى بولماق.
فورۋم قورىتىندىسى بويىنشا ەكى ەل وڭىرلەرىنىڭ باسشىلارى ەكونوميكانىڭ باسىم سەكتورلارىندا بىرلەسكەن جوبالاردى ىسكە اسىرۋ سالاسىندا 16 قۇجاتقا قول قويدى.
جىبەك جولى ەلدەرىنىڭ ۆيزالىق رەجيمدەرىن ءوزارا تانۋ تۋرالى, «KTZ Express» اق مەن «وزاۆتوترانستەحنيكا» عىلىمي-وندىرىستىك ورتالىعى اراسىندا بىرلەسكەن كاسىپورىن قۇرۋ تۋرالى كەلىسىمدەرگە قول قويىلدى. سونىمەن قاتار, «قازترانسگاز» اق مەن «وزترانسگاز» اق اراسىندا وزبەكستان اۋماعى ارقىلى تابيعي گازدى تاسىمالداۋ تۋرالى كەلىسىمگە قول قويىلدى.
