پوليتسيا مايورى ەلەنا ماعاسۋموۆانىڭ ايتۋىنشا, «قاۋىپسىز جول» شاراسى جوپ اپاتىنىڭ الدىن الۋدى عانا ەمەس, جۇرگىزۋشىلەردىڭ, اۆتواۋەسقويلارىنىڭ جول قوزعالىسى مادەنيەتىن كوتەرۋدى دە ماقسات تۇتىپتى.
«جىل باسىنان بەرى جۇرگىنشىلەردىڭ دە قاتىسۋىمەن وڭىردەگى قالالاردا 141 جول-كولىك وقيعاسى ورىن الدى, ودان 19 ادام قازا بولىپ, 129 ادام جاراقات الدى. ستاتيستيكا بويىنشا, قالاداعى ءاربىر ەكىنشى جول-كولىك وقيعاسى جۇرگىنشىلەردىڭ قاتىسۋىمەن ورىن الادى. جول اپاتى كوبىنە جۇرگىنشىلەر كوپ جۇرەتىن, رەتتەلمەيتىن بۇرىلىستاردا بولادى. ال مۇنداي جەردەرلەردە جۇرگىزۋشىلەرگە وتە اباي بولۋ كەرەك» دەيدى ەلەنا ماعاسۋموۆا.
پوليتسەيلەر كولىگىن اقىرىن جۇرگىزىپ, ابايلاپ وتەتىن جۇرگىزۋشىلەردى قوستاناي قالاسىنداعى ەڭ قاۋىپتى دەگەن التىنسارين جانە تولستوي كوشەلەرىنىڭ بۇرىلىسىندا تۇرىپ ماراپاتتادى. ولارعا جول قوزعالىسى ەرەجەلەرى جازىلعان بۋكلەتتەر تاپسىردى.
«مەن ءۇشىن بۇل كۇتپەگەن سىي بولدى. مەن ونشاقتى جىلدان بەرى كولىك جۇرگىزەمىن, قازىر «فولكسۆاگەن» ماشيناسىن ايدايمىن. مەن قالانىڭ تار كوشەلەرىندە ەرەجەنى ايىرىقشا ساقتاۋعا, جۇرگىنشىلەردى الدىمەن وتكىزىپ جىبەرۋگە تىرىسامىن. ەرەجەنى ساقتاۋ, سىپايى بولۋ – ءار جۇرگىزۋشىنىڭ مىندەتى, بورىشى. رۋلدە وتىرىپ, ۇقىپتى بولماۋدىڭ سوڭى ورنى تولماس وكىنىشتەرگە ۇرىندىرۋى مۇمكىن, سونى اركىم ءتۇسىنۋى ءتيىس» دەيدى جۇرگىزۋشى ەرىك ەسماعانبەتوۆ.
ءنازيرا جارىمبەت,
«ەگەمەن قازاقستان»
قوستاناي
