ارينە, ءبازبىر باتىر بابالارىمىز كۋتۋزوۆ اسكەرىمەن بىرگە بارىپ سەنادان ات سۋارعان, امىرە مەن مۇستافاداي الاش ارىستارىنىڭ ءىزى قالعان قاسيەتتى قالانىڭ ايگىلى اۋباكىروۆاعا دا جاتتىعى جوق. مۇندا ول بۇعان دەيىن دە بىرنەشە رەت ات باسىن بۇرعان. بەلگىلى پيانينوشى وسى ەلدە وتكەن حالىقارالىق مارگارەت لونگ جانە جاك تيبو كونكۋرسىندا 1983 جىلى گران-ءپريدى جەڭىپ العان. فرانتسيانىڭ ونەر جانە ادەبيەتىنىڭ وردەنىمەن ماراپاتتالعان.
وتىز جىلدان بەرگى شىعارماشىلىق جولىندا شىرقاۋ بيىكتەرگە شىعىپ, كورەرمەن كوزايىمىنا اينالعان ءجانيا جاقياقىزى ءپاريجدىڭ كورتو زالىنا جالعىز كەلمەپتى. كىل ساڭلاقتار سامعاعان كيەلى ساحناعا بۇگىندە ەۋروپادا ءبىلىم الىپ, جۇمىس ىستەپ جۇرگەن دارىندى قازاقستاندىق جاستاردى شىعارىپ, تالعامپاز كوپشىلىككە تانىستىردى. اتاپ ايتقاندا, قازىردىڭ وزىندە بەدەلدى بايگەلەردى قانجىعالارىنا بايلاپ ۇلگەرگەن سكريپكاشى ەرجان ك ۇلىباەۆ, ۆيولونچەلشى ءسانيا دۇركەەۆا, اككاردەونشى رومان يۋسيپەي الەم اسپەتتەگەن ۇلى كلاسسيكتەردىڭ, سونداي-اق زاماناۋي زاڭعار كومپوزيتورلاردىڭ شىعارمالارىن شىرايىن شىعارىپ ورىندادى.
قازاقستاندىق مۋزىكانتتاردىڭ قابىلەت قارىمىنا قايران قالعان, فرانتسۋزدار قوشەمەتپەن قول سوقتى. «عاجاپ! عالامات ورىنداۋ شەبەرلىگىنە ءتانتىمىز. باحتىڭ حورالىن پيانينو مەن اككاردەوننىڭ سۇيەمەلدەۋىمەن ورىندالعانىن بۇرىن-سوڭدى كورمەگەن ەدىك. كەرەمەت» دەسكەن كورەرمەن تاڭدانىسى ءبىزدىڭ مادەنيەتىمىزدىڭ مەرەيىن ءبىر ءوسىرىپ تاستاعانى تالاسسىز.
وسىعان وراي قۋانىشىن جاسىرا الماعان دارا دارىن يەلەرىنىڭ ءبىرى ءسانيا دۇركەەۆا كەيىنگى ءىزباسارلارىن قاناتىنىڭ استىنا الىپ, قامقورلىق تانىتۋشى ءجانيا اۋباكىروۆانىڭ اتىنا العىس سەزىمىن ءبىلدىردى. «ول ايگىلى ءارتىس قانا ەمەس, ۇلاعاتتى ۇستاز دا. وسى كىسىلەردەي كوريفەيلەرى بار ۇلتتىق ونەرىمىزدىڭ كوشى قاشاندا كورىكتى بولماق», دەدى ول ويىن تۇيىندەپ.
قازاقتىڭ قادىرلى قىزىنىڭ ەۋروپالىق تۋرى بۇيىرسا, ەندى اۋستريا, گەرمانيا جانە پولشا استانالارىندا جالعاسپاق.
تالعات باتىرحان,
«ەگەمەن قازاقستان»
