مادەنيەت ۇيىمدارىنا اۆتوكولىكتەر الىندى, شىعارماشىلىق ۇجىمداردىڭ ساحنالىق كيىمدەرى مەن مۋزىكالىق اسپاپتارى جاڭارتىلدى. اتاپ وتەر جاڭالىقتىڭ ءبىرى – سارايشىق قالاشىعىن جايىق وزەنىنىڭ ارناسى شايىپ كەتۋىنەن ساقتاپ قالۋ ماقساتىندا جاعانى بەكىتۋ جۇمىستارى جۇرگىزىلدى. اتىراۋ قالاسى مەن ماحامبەت اۋدانىندا ەكى مادەنيەت ءۇيى سالىندى. قازىر وڭىردە 8 مادەنيەت نىسانىنىڭ قۇرىلىسى ءجۇرىپ جاتىر.
وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى سالامات سابىردىڭ ايتۋىنشا, مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا ايماقتا 193 ءىس-شارا ىسكە اسقان. «قاسيەتتى قازاقستان» كارتاسىنا اتىراۋدان 7 نىسان ەندى. بيىل ماحامبەت اۋدانىندا ماحامبەت وتەمىس ۇلىنا ارنالعان ەسكەرتكىش تۇرعىزىلدى. ەندى وبلىس ورتالىعىندا ءابۋ سارسەنباەۆ, قارشىعا احمەدياروۆ, حاميت ەرعاليەۆتىڭ ەڭسەلى ەسكەرتكىشتەرى بوي كوتەرەدى.
وبلىستىق تاريحي-ولكەتانۋ مۋزەيىنىڭ قازىرگى عيماراتى تولىققاندى جۇمىس جۇرگىزۋگە تار بولىپ تۇر, سوندىقتان جاڭا عيماراتتىڭ ءتيىستى قۇجاتتارى دايىندالىپ جاتىر. مەملەكەتتىك ارحيۆ تە الداعى جىلدارى جاڭا ورىنعا كوشەدى. ەندىگى ماسەلە − دينا نۇرپەيىسوۆا اتىنداعى قازاق حالىق اسپاپتار وركەسترىنە عيمارات كەرەك, قازىر وسى جايت جەرگىلىكتى اتقارۋشى بيلىكتىڭ نازارىندا. سونداي-اق 800 ورىندىق كونتسەرت زالىنىڭ قۇجاتتارى دايىندالدى. ونەر, ادەبيەت سالالارىنىڭ وكىلدەرىنە ارنالعان شىعارماشىلىق ورتالىق تا الداعى جىلدارى بوي كوتەرەدى.
وڭىردەگى شىعارماشىلىق ۇجىمدار ءۇندىستان, ماكەدونيا, پورتۋگاليا, تۇركيا, رەسەي, ۆەنگريا, سەربيا, فرانتسيا مەملەكەتتەرىنە گاسترولدىك ساپارعا باردى. تالانتتى جاستاردىڭ تالاپتارىنا قولداۋ كورسەتىلىپ كەلەدى, سونىڭ ناتيجەسىندە رەسپۋبليكالىق, حالىقارالىق بايقاۋلارعا قاتىسقان 14 ونەرپاز باس جۇلدەنى, 30-عا جۋىعى جۇلدەلى ورىنداردى جەڭىپ الدى.
باقىتگۇل باباش,
«ەگەمەن قازاقستان»
اتىراۋ
