ينۆەستورلار ەۋرووبليگاتسيالاردى ساتىپ الۋ ءۇشىن ءوتىنىمدى «استانا» حالىقارالىق قارجى ورتالىعىنىڭ بيرجاسىندا جۇزەگە اسىرىپ جاتىر. ەۋروبوندقا قۇندى قاعازدار شىعارۋ ارقىلى ەۋروپاداعى قالتالى ينۆەستورلاردى «استانا» حالىقارالىق قارجى ورتالىعىنىڭ بيرجاسىنا مۇشەلىككە قابىلداپ, ورتالىق ازياداعى ءىرى, سەنىمدى قارجىلىق قۇرىلىمعا اينالۋ كوزدەلگەن. نارىققا شىققان قۇندى قاعازداردىڭ قۇنى – 525 ملن ەۋرو. بۇل وبليگاتسيالار الداعى 10 جىلعا 2,375 پايىز مولشەرلەمەمەن شىعارىلىپ وتىر. اتالعان پايىزدىق مولشەرلەمە ينۆەستورلاردىڭ وڭ جامباسىنا كەلەتىن ءتيىمدى ۇسىنىس بولماق. سەبەبى وزگە ءىرى قارجى ورتالىقتارىنداعى پايىزدىق مولشەرلەمە – 1-2 پايىز شاماسىندا. قازاقستان نارىعىنا ارنالعان شىعارىلىمنىڭ ۇيىمداستىرۋشىسى – ۆCC Invest. ايتا كەتەرلىگى, قازاقستان الەمنىڭ قۇندى قاعازدار نارىعىنا سوڭعى رەت 2015 جىلى شىققان ەكەن.
− ەۋرووبليگاتسيالاردى ورنالاستىرۋعا ارنالعان پلاتفورما رەتىندە «استانا» حالىقارالىق قارجى ورتالىعىنىڭ بيرجاسى تاڭداپ الىنعانى ۇكىمەتتىڭ جاڭا بيرجا الاڭىنا دەگەن سەنىمدىلىگىن راستايدى, سونىمەن قاتار بانكتەر مەن بروكەرلىك كومپانيالاردى «استانا» حالىقارالىق قارجى ورتالىعىنىڭ بيرجاسىنىڭ قاتىسۋشىسى اتانۋعا ىنتالاندىرادى. وبليگاتسيالاردى شىعارۋ, اسىرەسە اعىمدىق نارىق كونيۋنكتۋراسى جاعدايىندا كاپيتالدىڭ نەگىزگى كوزى بولىپ سانالادى. احقو وسى سەگمەنتتى دامىتۋدىڭ نەگىزگى قۇراۋشىسى. ءبىز حالىقارالىق ستاندارتتارعا ساي كەلەتىن ەميتەنتتەر ءۇشىن پلاتفورما ۇسىنامىز, سونداي-اق جەرگىلىكتى جانە دە حالىقارالىق ينۆەستورلار ءۇشىن ءارتۇرلى نۇسقالاردى ۇسىنامىز, – دەدى «استانا» حالىقارالىق قارجى ورتالىعى بيرجا باسقارماسىنىڭ توراعاسى تيموتي بەننەتت.
بۇگىندە AIX اكتسيونەرلەرى قاتارىندا احقو, GoldmanSachs, شانحاي قور بيرجاسى, جىبەك جولى قورى مەن AIX-كە ساۋدا الاڭىن ۇسىنىپ وتىرعان NASDAQ بار.
ەركەجان ايتقازى,
«ەگەمەن قازاقستان»
