وسىعان وراي استانا قالاسىنداعى جوعارى جانە ورتا ارناۋلى وقۋ ورىندارىنىڭ, مەكتەپكە دەيىنگى مەكەمەلەردىڭ, مەكتەپتەردىڭ وقۋشىلارى, ستۋدەنتتەرى, ۇستازدارى, سونىمەن قاتار مادەنيەت, سپورت, مەديتسينا, كوممۋنالدىق شارۋاشىلىق, ەنەرگەتيكا جانە باسقا دا سالالاردىڭ قىزمەتكەرلەرى لاتىن گرافيكاسىندا ديكتانت جازدى. شاراعا 15 جاستان جوعارى ازاماتتار قاتىستى.
بەكىتىلگەن ديكتانت ءماتىنى اۋديوجازبالار ارقىلى تاراتىلىپ, «شالقار», «قازاق» راديولارىنان بەرىلدى. ۇزاقتىعى 30 مينۋتقا سوزىلعان شارا ارنايى بەلگىلەنگەن ورىنداردا جۇرگىزىلدى.
«بۇگىن ەلىمىز بويىنشا تاريحي ءسات دەۋگە بولادى. ەلباسىمىزدىڭ باستاماسىمەن قازاق ءتىلىن لاتىن الىپبيىنە كوشىرۋ ماسەلەسى قازىرگى تاڭدا پراكتيكالىق تۇرعىدان ىسكە اسۋدا. ۇكىمەت باسشىسىنىڭ تاپسىرماسىمەن بۇكىل ەلىمىز بويىنشا بۇگىن جالپىحالىقتىق ديكتانت ءوتتى. استانا قالاسى بويىنشا وسى شاراعا قاتىسۋعا نيەت بىلدىرگەندەردىڭ سانى 50 مىڭنان اسادى. جەر-جەرلەردە جازىلعان ديكتانت جۇمىستارىن ءبىز الىپ, جيناقتاپ, ولاردىڭ قانشالىقتى ەملە-ەرەجەگە ساي جازىلعانىن تەكسەرەمىز. سودان كەيىن ارقايسىسىنا ءتيىستى باعالار قويامىز. بۇل جەردەگى نەگىزگى ماقسات – ەلباسىمىز بەكىتكەن ءالفاۆيتتىڭ سوڭعى نۇسقاسىنا وراي ءتىل كوميتەتى جاساعان ەملە-ەرەجەنىڭ جوباسىن حالىقپەن بىرگە تالقىلاۋ. ويتكەنى وسى ديكتانت جازۋ ارقىلى كەلىپ تۇسكەن جۇمىستارعا سۇيەنە وتىرىپ حالىق ارىپتەردى قالاي قابىلدادى, ءماتىن جازعان كەزدە كوبىنە قانداي قاتەلىكتەر كەتەدى, قانداي ماسەلەلەرگە ءمان بەرگەن دۇرىس دەگەن سۇراقتاردىڭ جاۋابىن الا الامىز. ءسويتىپ, مۇنى ءتىل كوميتەتىنە جىبەرەمىز. ولار رەسپۋبليكا بويىنشا جيناقتالعان مالىمەتتەردى ساراپتاپ, وزدەرىنىڭ قورىتىندىسىن شىعارادى», دەدى استانا قالاسى تىلدەردى دامىتۋ جانە ارحيۆ ءىسى باسقارما باسشىسىنىڭ ورىنباسارى ساكەن زيابەك ۇلى.
ارنايى ورىندارعا كەلىپ قاتىسا المايتىن تۇلعالار ءۇشىن ديكتانتتى emle.kz, tilalemi.kz سايتتارىنىڭ باستى بەتىندە ورنالاسقان سىلتەمەمەن كومپيۋتەر نەمەسە ۇيالى تەلەفون ارقىلى كىرىپ, بەلگىلەنگەن ۋاقىتتا ديكتانت اۋديوسىن تىڭداي وتىرىپ جازۋعا مۇمكىندىك بەرىلدى.
«رۋحاني جاڭعىرۋ» تاقىرىبىندا بولعان ديكتانتقا قاتىسقان استانا قالاسىنىڭ تۇرعىنى اقۇلان وسەر ۇلى لاتىن الىپبيىمەن جازۋ اسا قيىندىق تۋدىرماعانىن تىلگە تيەك ەتتى.
«كۇندەلىكتى الەۋمەتتىك جەلىلەردى پايدالانعاندا لاتىن گرافيكاسىن قولدانامىن. سول سەبەپتى ايتارلىقتاي قيىندىققا كەزىكپەدىم. ەگەر ادامدا ۇيرەنەمىن دەگەن شىنايى نيەت بولسا, وندا كەز كەلگەن نارسەنى يگەرىپ الۋعا بولادى. مۇنىڭ ىشىندەگى بىرنەشە ارىپتەردى جاقسىلاپ ەسكە ساقتاپ الساڭىز, قالعاندارى قيىندىق تۋدىرمايدى. مەن لاتىن الىپبيىنە كوشۋدى قولدايمىن. سەبەبى كورشى وزبەكستان ەلى لاتىنعا كوشىپ, ءبىرشاما ىلگەرى ىستەرگە قول جەتكىزگەندىگىن بايقاپ وتىرمىز. بۇل مەنىڭ ويىمشا وزگە ەلدەردىڭ قازاق ادەبيەتىن, مادەنيەتىن نەمەسە ءتول تۋىندىلارىمىزدى وقۋعا جاڭا سەرپىن بەرەدى. جاستار جاعى جاڭا الىپبيگە وتۋدە كەدەرگىلەرگە كەزدەسپەيدى دەپ ويلايمىن. ال ەگدە جاستاعى ادامدارعا ءالىپبيدى ۇيرەتۋدىڭ ءارتۇرلى جولدارىن قاراستىرۋ قاجەت. سەبەبى ادامنىڭ جاسى ۇلعايعان سايىن ونىڭ ەستە ساقتاۋ قابىلەتى دە ناشارلاي تۇسەتىنى بەلگىلى. سوندىقتان ولار جاڭا ءالىپبيدى تەز يگەرۋ ءۇشىن ويىن تۇرىندە نەمەسە ءتۇرلى جاتتىعۋ جاساۋ ادىستەرىن پايدالانعان ءجون», دەيدى ول.
راۋان قايدار,
«ەگەمەن قازاقستان»
