ايەكەڭ 15 جىلدان استام ۋاقىت اۋىل شارۋاشىلىعى ءمينيسترىنىڭ ورىنباسارى بولىپ ىستەدى. ول كەزدە ءبىز ءبىر-ءبىرىمىزدى رەسمي جاعدايلارعا بايلانىستى عانا ءبىلىپ جۇردىك. ايەكەڭ شىن مانىندە اۋىلدىڭ جاعدايىن, شارۋاشىلىعىن وتە جاقسى بىلەتىن ادام ەدى. جاستايىنان اۋىلدا ءوسىپ, ونىڭ بۇكىل بولمىس-ءبىتىمىن كوزىمەن كورگەن, كەيىن كەڭشار ديرەكتورى بولىپ قىزمەت ىستەگەن, اۋىلدىڭ ادامى مەن شارۋاشىلىعىنا نەنىڭ قاجەت, نەنىڭ قاجەت ەمەستىگىن ءوز ءومىر تاجىريبەسى ارقىلى بىلەتىن مامان بولاتىن. سول ءبىلىمى مەن تاجىريبەسىنىڭ ارقاسىندا ول مينيسترلىكتە وتە ابىرويلى قىزمەت اتقاردى.
قازاقستاندا مالدى اسىلداندىرۋ ىسىنە ۇلكەن ۇلەس قوستى. اسىرەسە قويدى اسىلداندىرۋ ءىسىن دۇرىس عىلىمي جولعا قويۋدا ايەكەڭ ۇلكەن ۇيىمداستىرۋ جۇمىستارىن اتقاردى: عالىمداردىڭ بۇل جۇمىسپەن ۇزبەي اينالىسۋىنا جاعداي جاسادى, كومەكتەستى, سوعان قاجەتتى كۇندەلىكتى جۇمىستاردى ەرىنبەي-جالىقپاي جۇيەلى جۇرگىزىپ وتىردى. سوندىقتان ونى قىزمەتتەستەرى, وبلىس پەن اۋدانداعى ارىپتەستەرى قاتتى سىيلاپ, ءارى مامان, ءارى ادام رەتىندە جوعارى باعالايتىن. رەسپۋبليكامىزدىڭ تۇپكىر-تۇپكىرىندە ونىڭ تىلەۋلەس ادامدارىنىڭ كوپ بولۋ سەبەبى وسىدان.
وتكەن عاسىردىڭ اياعىندا اۋىل شارۋاشىلىعى جۇمىستارىنىڭ, جالپى اۋىل جاعدايىنىڭ قۇلدىراپ كەتۋى ايەكەڭنىڭ قىزمەت بابىنا دا بەلگىلى دارەجەدە ىقپال ەتتى. ول كىسى ءمينيستردىڭ ورىنباسارى قىزمەتىنەن بوساپ, «اسىل» دەگەن كومپانيا قۇردى. ول كومپانيانىڭ ماقساتى قازاقستانداعى مال تۇقىمىن اسىلداندىرۋ جۇمىستارىن جۇيەلى تۇردە جالعاستىرا بەرۋ ەدى. بىراق ول كەزدەگى جاعداي ونداي قاجەتتى ءىستى قولداي المادى, سول جاعى وكىنىشتى بولدى.
سىيلاس ازاماتتى اجالعا قيماساڭ دا, اجالدان اراشالاپ قالار امالىڭ جوق. وكىنەسىڭ, ساعىناسىڭ, سونداي جاقسىلار كوپ بولسا ەكەن دەپ تىلەيسىڭ.
مىنە, ءبىز ەلىنە ەلەۋلى, حالقىنا قالاۋلى, كەزىندە مەملەكەتىمىزدىڭ وركەندەۋىنە ۇلەس قوسقان, ءارتۇرلى مەملەكەتتىك شارۋاشىلىق قىزمەتتەردى اتقارعان ارداقتى ايەكەڭە − ايىپ قيسا ۇلى قۇسايىنوۆتىڭ تۇرعان ۇيىنە ورناتىلاتىن تاقتانىڭ اشىلۋىنا قاتىسىپ وتىرمىز. بۇل ماڭگىلىك ەسكەرتكىش, بولاشاق ۇرپاققا ۇلگى بولاتىن ايىپ سياقتى ادامزاتتىڭ جارقىن بەينەسى قاشاندا بيىكتەن كورىنە بەرسىن.
كەڭەس اۋحاديەۆ,
مەملەكەت جانە قوعام قايراتكەرى
