بيىلعى كينوفەستيۆالگە بەلگىلى رەجيسسەر, ستسەناريست, پەداگوگ يراكلي كۆيريكادزە توراعالىق جاسايدى. قازىلار القاسىنىڭ قۇرامىندا سيلۆان كۋتاندين («ستاينگە حات»), رەسەيلىك اكتريسا ەلۆيرا بولگوۆا («مەنىڭ ارمياندىق ۇيلەنۋ تويىم», «وگەي قىزى»), قىرعىز رەجيسسەرى تەمىربەك ءبىرنازاراوۆ جانە قازاقستاندىق ءسابيت قۇرمانبەكوۆ بار. نەگىزگى قازىلار قۇرامىمەن بىرگە «باستاۋدا» جىلداعى داستۇرگە ساي جاس كينەماتوگرافيست-ستۋدەنتتەردەن قۇرالعان قازىلار القاسى دا جۇمىس ىستەيدى. بيىلعى ستۋدەنتتىك قازىلار توبىندا يسپانيا, بەلورۋسيا, قازاقستان, قىرعىزستان, رەسەيدەن كەلگەن ستۋدەنتتەر بار. وسىدان ەكى جىل بۇرىن عانا «باستاۋدىڭ» جەڭىمپازى بولعان يسپانيالىق رەجيسسەر ياگو ماتەو ۆەلاسكو بيىل ەندى تالانتتى ستۋدەنتتەردىڭ تۋىندىلارىنا باعا بەرەتىن قازىلار قۇرامىنىڭ توراعاسى بولىپ كەلىپ وتىر. «الەمدە كينوفەستيۆالدار وتە كوپ, بىراق «باستاۋ» – شىنىندا دا ءساتتى, جاقسى باستاۋعا جول اشاتىن فەستيۆال. فەستيۆالدىڭ حالىقارالىق دارەجەدە بولعانى ستۋدەنتتەر ءۇشىن ءتيىمدى, ءبىز مۇندا بولاشاقتا كينەماتوگرافتى نە كۇتەتىنىن ازداپ بولسا دا ىشتەي ءتۇيسىنىپ كەتەمىز. ارينە, «وسكار» بار, كانن كينوفەستيۆالى بار, بىراق وعان بىردەن بارۋ مۇمكىن ەمەس, سوندىقتان ۇلكەن بايگەلەرگە الىپ باراتىن «باستاۋ» سەكىلدى باسپالداقتىڭ بولعانى جاقسى. ەڭ باستىسى, ساۋاتتىلىق, دۇنيەگە جاڭا كوزقاراس, ءبىز بەلگىسىز, جاس دارىن يەلەرىنە ۇلكەن فەستيۆالدەر الەمىنە جولداما بەرىپ, جول اشقىمىز كەلەدى, – دەيدى ياگو ماتەو ۆەلاسكو.
فەستيۆالدىڭ قۇرمەتتى قوناقتارى رەتىندە Korea university of media arts كينووندىرىسى فاكۋلتەتىنىڭ دەكانى كيم ەن دۋ, ء«موسفيلمنىڭ» دىبىس رەجيسسەرى مارينا نيگماتۋللينا جانە كينووپەراتور, ۋكرايناداعى كارپەنكو-كاروگو اتىنداعى ۋنيۆەرسيتەتتىڭ وقىتۋشىسى ەۆگەني فيليپپوۆتەر شاقىرىلدى. قازىلار القاسى مەن فەستيۆال قوناقتارى الماتىنىڭ كينەماتوگرافيا ماماندىعى بويىنشا ءبىلىم الىپ جاتقان ستۋدەنتتەرىمەن, كينو ماماندارىمەن شىعارماشىلىق كەزدەسۋلەر جانە شەبەرلىك ساعاتتارىن وتىكىزەدى. فەستيۆالدىڭ بارلىق شارالارى, شەبەرلىك ساعاتتارى ت.جۇرگەنوۆ اتىنداعى ۇلتتىق ونەر اكادەمياسى مەن «تۇران» ۋنيۆەرسيتەتىندە وتەدى.
«جاستار ءۇشىن حالىقارالىق كينوفەستيۆالدىڭ الاڭى ماڭىزدى. ستۋدەنت العاشقى جۇمىسىنان-اق باسەكە دەگەننىڭ نە ەكەنىن, كۋرستاستارىنىڭ نە تۇسىرگەنىن عانا ەمەس, وزگە ەلدەردەگى قۇرداستارىنىڭ دا قالاي ىزدەنەتىنىن كورۋى كەرەك. ءفيلمنىڭ فەستيۆالگە قاتىسۋى بولەك تە, ءفيلمدى جاساۋشىلارمەن ارالاسۋ, وي-پىكىر الماسۋدىڭ ماڭىزى ءتىپتى باسقا. «باستاۋ» – شىعارماشىلىق قارىم-قاتىناس ورناتۋعا اسا قاجەت قادام. كۇردەلى جايتتارعا, ۇلكەن كينەماتوگرافياعا قادام جاساۋدىڭ قيىندىعىنا قاراماستان كينو دامىپ كەلەدى. كينوفەستيۆالدەر دە ءدال وسى ماقسات ءۇشىن اسا قاجەت. كينو – ۇجىمدىق جۇمىس, حالىقارالىق كينوتىلى امبەباپ, ءبىز ونىڭ دامۋى ءۇشىن ءوز ۇلەسىمىزدى قوسامىز. مۇندا كينونى تەك تاماشالاي سالمايمىز, قالاي جاسالاتىنىن ۇيرەنەمىز» دەيدى فەستيۆال پرەزيدەنتى سەرگەي ءازىموۆ. ۇيىمداستىرۋشىلاردىڭ ايتۋىنشا, كەڭەستىك كەزەڭدە تۇساۋى كەسىلگەن ستۋدەنتتىك فيلمدەر فەستيۆالى تاۋەلسىزدىك كەزەڭىندە دا جالعاسىن تاۋىپ, بيىل 7-رەت وتكىزىلىپ وتىر. قيىندىقتارعا قاراماستان كينوقاۋىمداستىقتىڭ قىزىعۋشىلىعىن وياتا العان سوڭ دا كينوفەستيۆال ءومىر ءسۇرىپ كەلەدى.
ايگۇل احانبايقىزى,
«ەگەمەن قازاقستان»
الماتى
