بۇل شارا ماحامبەت وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتى مادەنيەت جانە ونەر فاكۋلتەتىنىڭ (كوركەمسۋرەت-گرافيكا) قۇرىلعانىنا 40 جىل تولۋىن وراي ۇيىمداستىرىلعان. بۇرىنعى ا.س.پۋشكين اتىنداعى ورال پەداگوگيكالىق ينستيتۋتى جانىنان قۇرىلعان كوكركەمسۋرەت-گرافيكا فاكۋلتەتىنەن 40 جىل ىشىندە تالاي تانىمال ونەر شەبەرلەرى تۇلەپ ۇشتى. فاكۋلتەتتىڭ قالىپتاسۋىنا, ستۋدەنتتەر تاربيەسىنە تولەباي ءابىلوۆ, عاليت قابدوللاەۆ سىندى العاشقى وقىتۋشىلاردىڭ سىڭىرگەن ەڭبەگى زور. وسى فاكۋلتەتتىڭ تۇڭعىش تۇلەگىنىڭ ءبىرى, كەيىن وسى جەردە ۇستازدىق ەتكەن بەلگىلى سۋرەتشى, بۇگىندە ومىردەن وتكەن ايبار سەيتىموۆتى دە جينالعاندار ەرەكشە ريزاشىلىقپەن ەسكە الدى. فاكۋلتەتتىڭ وتكەنى مەن بۇگىنى تۋرالى تولىمدى بايانداما جاساعان قازاقستان سۋرەتشىلەر جانە ەۋرازيالىق ديزاينەرلەر وداعىنىڭ مۇشەسى, بقمۋ وقىتۋشىسى قۋاندىق ءمادىر ءوز سوزىندە وسى جەردەن تۇلەپ ۇشىپ, بۇگىندە ەلىمىزدەگى تانىمال قىلقالام شەبەرىنە اينالعان قايىر ورازعاليەۆتى جانە باسقالارىن اتاپ ءوتتى.
كونفەرەنتسيادا سونداي-اق قازىرگى الەمدە سۋرەتشىگە جانە قوعامدىق قارىم-قاتىناسقا تۇتاستاي ساراپتاما بەرۋ, كوركەم شىعارماشىلىقتى الەۋمەتتىك قۇبىلىس دەپ تانۋ جولدارىن ويلاستىرۋ, كوركەم ءبىلىم بەرۋدەگى ۇيىمداستىرۋشىلىق جانە ادىستەمەلىك ماسەلەلەردى اشۋ جانە ولاردى شەشۋ جولدارى تالقىلاندى. بايانداماشىلار جوو-دا ورىنداۋشىلىق پاندەردى وقىتۋداعى داستۇرلەر جانە جاڭاشىلدىقتار تۋرالى, قازاقستاننىڭ ۇلتتىق مادەنيەتىندە بەينەلەۋ ونەرى جانە ديزايندى دامىتۋدىڭ زاماناۋي ۇردىستەرى جونىندە پىكەىر الماستى.
كونفەرەنتسيا اياسىندا ورال قالالىق كورمە زالىندا سۋرەتشىلەردىڭ رەسپۋبليكالىق كورمەسى اشىلدى. كورمەگە كوركەمسۋرەت-گرافيكا فاكۋلتەتىن ءار جىلدارى بىتىرگەن تۇلەكتەر مەن بەلگىلى قىلقالام شەبەرلەرىنىڭ ۇزدىك تۋىندىلارى قويىلدى. ول جۇمىستاردىڭ اراسىندا ورال, اقتوبە, اقتاۋ, اتىراۋ, پاۆلودار قالالارىنان كەلگەن تانىمال سۋرەتشىلەردىڭ ەڭبەگى بار.
كورمە اشىلۋى كەزىندە كۋرۋكشەترا ء(ۇندىستان) ۋنيۆەرسيتەتى بەينەلەۋ ونەرى باسقارماسىنىڭ توراعاسى, فيلوسوفيا ونەرىنىڭ PhD دوكتورى, پروفەسسور رام ۆيرانجان كەسكىندەمەدەن شەبەرلىك-ءدارىسىن وتكىزدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
سۋرەتتى تۇسىرگەن رافحات حالەلوۆ
