ماسەلەن, داڭقتى سپورتشى, ەڭبەك ەرى جاقسىلىق ۇشكەمپىروۆ تە سونداي قاربالاس شاقتان ەندى ءوتىپ, شارۋادان قولى قازىر بوساعانداي. جەتىسۋ وڭىرىندەگى جامبىل اۋدانى جانە بالقاش اۋدانىنداعى شارۋاشىلىقتارىنىڭ قىسقا دايىندىعى مەن جۇمىسشىلارىنىڭ جاي-كۇيىن قامداۋمەن جۇرگەن كاسىپ يەسىمەن بىرنەشە مارتە تەلەفون ارقىلى سويلەسكەنىمىزبەن, پىكىرىن بىلۋگە ۋاقىت تىعىزدىق ەتكەن. العاشقىدا مەملەكەت باسشىسىنىڭ جولداۋىنا قاتىستى ويىن ايتۋىن سۇراعان بولاتىنبىز. از-كەم ۇنسىزدىكتەن سوڭ ەڭبەك ەرى «جولداۋدى ەفيردەن تىكەلەي تىڭداپ, نەگىزگى باعىتتارىن باعامدادىم. بيىلعى باسىمدىق الەۋمەتتىڭ جاعدايىن وڭداۋعا بەرىلىپتى. بۇل ءوزى ناۋقانشىلدىقپەن بىتەتىن ءىس ەمەس. ءارى اركىم ەلباسى جۇكتەگەن مىندەتتى قالاي اتقاراتىنى جايلى تولعانىپ, مۇمكىندىكتەرىن سارالاپ الۋى ءتيىس. مىنا كۇزگى جيىن-تەرىن, مال قىستاتۋ قامىن تياناقتاپ بولعان سوڭ بولا حابارىن بەرەرمىن...» دەگەن-ءدى جاقسىلىق اعا. ايتقانداي-اق, ارنايى ۋاقىت ءبولىپ حابارلاسقان وليمپيادا چەمپيونى ارىدەن تولعادى.
– ەلباسى جولداۋىندا «ۇكىمەتكە جانە اكىمدەرگە كەم دەگەندە 100 دەنەشىنىقتىرۋ-ساۋىقتىرۋ كەشەنىن سالۋدى تاپسىرامىن. سونداي-اق قولدانىستاعى, اسىرەسە مەكتەپتەردەگى سپورت عيماراتتارىن ءتيىمدى پايدالانىپ, دەنەشىنىقتىرۋمەن اينالىسۋ ءۇشىن اۋلالاردى, پاركتەردى, ساياباقتاردى جابدىقتاۋ قاجەت» دەپ مەنىڭ كوكەيىمدە جۇرگەن ارماندى تاپ باسىپ, كورسەتىپ بەرىپتى. جالپى, بۇقارالىق سپورتتى دامىتۋ تۇرعىندار دەنساۋلىعىنىڭ جاقسارۋىنا عانا ەمەس, مەملەكەتتەگى سپورت سالاسىنىڭ جەتىستىككە جەتۋىنە جول اشادى. پرەزيدەنت بۇل جەردە ۇلتتىڭ دەنساۋلىعىن وسكەلەڭ ۇرپاق كەزىنەن ساقتاۋدى, سول ارقىلى كاسىبي سپورتقا بەت بۇراتىن سالاماتتى بۋىننىڭ قالىپتاسۋىنا قاتىستى اتالى ءسوز ايتىپ وتىر. جانە بۇل باستاما قازىردىڭ وزىندە ناتيجەسىز ەمەس. مىسالعا, الماتى وبلىسىندا دەنەشىنىقتىرۋ-ساۋىقتىرۋ كەشەنىن سالۋ ءىسى جاقسى ءجۇرىپ جاتىر. سپورتشى ءارى وليمپيادا چەمپيونى رەتىندە جەڭىس ءداستۇرىنىڭ ۇزىلمەي جالعاسقانىن قالايسىڭ. ول ءۇشىن رۋحى مىقتى, دەنساۋلىعى زور, دايىندىعى جوعارى, شەبەرلىگى شىڭدالعان ۇرپاق ءوسۋى ءتيىس. وسى دەنەشىنىقتىرۋ-ساۋىقتىرۋ كەشەنىنىڭ تابالدىرىعىن يمەنە اتتاعان بۇگىنگى جاس بالا ەرتەڭ ەلىمىزدىڭ ابىرويىن الەمدىك سپورت دوداسىندا قورعايتىن ساڭلاق بولىپ وسپەسىنە كىم كەپىل؟ لايىم سولاي بولعاي. ەلباسى اكىمدەرگە وسى دۇنيەنى جاساڭدار, حالىققا جاعداي جاساڭدار دەپ وتىر عوي.
مەن ءوزىم وسىعان قاتتى قۋاندىم. قولىمىزدان كەلگەنشە اۋىلىمىزعا جاعداي جاساۋعا تىرىسىپ جاتىرمىز. جامبىل اۋدانىنداعى مىڭباەۆ اۋىلىن تۇلەتۋگە كۇش سالىپ جۇرگەنىمدى بىلەسىزدەر. ەڭبەك ەرى اتانعانىمدا ەلباسىنا «نۇرەكە, ەلىمىزدە 5 مىڭ اۋىل بار شىعار, سول اۋىلدى كوتەرۋگە دايىن 5 مىڭ قالتالى ازامات شىعىپ, تۇلەتىپ جىبەرسەك, وتانىمىز گۇلدەنىپ كەتەر ەدى. ءبىر ارمانىم وسى...» دەگەن ەدىم. قازىر ەلباسىنا بەرگەن سول ۋادەمدى ورىنداپ جۇرگەنىمە ءوزىمدى باقىتتى سەزىنەمىن, – دەيدى ج.ۇشكەمپىروۆ.
دەسە دەگەندەي, قازىر ەڭبەك ەرى تۋعان اۋىلى ءۇشىن ۇلكەن جۇمىس جاساپ جاتىر. مىڭباەۆ اۋىلىنان بىرنەشە الەۋمەتتىك ماڭىزى بار نىسانداردى قايتا جوندەۋدەن وتكىزىپ, ەل يگىلىگىنە بەردى. قاعيداسىنان اينىماعان چەمپيون الدىمەن سپورت كەشەنىن اشتى. ونىڭ قۇرىلىسىنا 73 ملن تەڭگە قارجى جۇمساپتى. قازىر اۋىل جاستارى بۇل كەشەندە كۇرەس, بوكس, اۋىر اتلەتيكا, فيتنەس, فۋتبول, ۆولەيبول, گرەك-ريم كۇرەسى, ەركىن كۇرەس, قازاقشا كۇرەس, سامبو, دزيۋدو, سول سياقتى فۋتبول, باسكەتبول, توعىزقۇمالاق سياقتى سپورت تۇرلەرىنە جاتتىعىپ ءجۇر. مۇنان بولەك, مىڭباەۆ اتىنداعى ورتا مەكتەپتىڭ سپورت زالىنا دا كۇردەلى جوندەۋ جۇرگىزىپ بەرگەن. تاعى سول سپورتتىڭ دامۋى مەن ساڭلاق ءىزباسارلارىنىڭ قامى.
سپورتتان بولەك, الەۋمەتتىڭ قامىن دا ۇمىتقان ەمەس. ءوز قارجىسىنا بالاباقشا سالىپ, وعان «جاقسىلىق» دەپ ەسىمىن قويدى. مۇندا اۋىلدىڭ 100 ءبۇلدىرشىنى ءتالىم الىپ جاتىر ەكەن. جاس وتباسىلارعا ارنالعان جاتاقحانا دا بار. 105 اۋلەت وسى شاڭىراق استىندا تۇرىپ, ەڭبەك ەتۋدە. كوبى ۇشكەمپىروۆتىڭ شارۋاشىلىعىندا جۇمىس ىستەيدى. جالاقىلارى جوعارى, تۇراتىن جەرىندە تۇرمىسقا قاجەتتى جاعدايدىڭ ءبارى جاسالعان.
– «مەن ىستەدىم دەگەنشە, ەل ىستەدى دەسەڭشى...» دەگەن قازاقتىڭ ءسوزى بار عوي, از-كەم ەڭبەگىمىزدىڭ وتەۋىن ەلدىڭ العىسىمەن قايتارىپ جاتىرمىز. بۇل – ازاماتتىق پارىزىمىز. «ەلدە بولسا – ەرىنگە تيەدى» دەگەن دانالىق تا تەگىن ايتىلماعان. ەلباسى بيىلعى جولداۋىندا ازاماتتاردى وتانشىل بولۋعا, تۋعان جەرىن تۇلەتۋگە ۇندەپ جاتىر. ونىڭ ناقتى جولدارىن كورسەتىپ بەردى. حالقىمىزدىڭ ءال-اۋقاتىن ارتتىرۋعا, تۇرمىسىن تۇزەۋگە ۇكىمەت بىلەك سىبانىپ كىرىسىپ جاتىر. پرەزيدەنتتىڭ مۇعالىمدەردىڭ مارتەبەسىن كوتەرۋگە, دارىگەرلەردىڭ جالاقىسىن كوبەيتۋگە تاپسىرما بەرگەنى ەل ءىشىن ءسۇيسىندىرىپ تاستادى. ويتكەنى وسى ەكى ماماندىق وكىلدەرى اۋىلدىڭ قالىپتى دامۋىنا ۇلەس قوسۋدا. كەشە عانا ورتالىقتان الىس ەلدى مەكەندە بولدىم. جۇرتتىڭ اۋزىندا جولداۋدىڭ تۇرعىنداردىڭ تۇرمىسىن جاقسارتۋعا دەگەن باستاماسى. ەندى مەملەكەت باسشىسى جۇكتەگەن وسى مىندەتتى ءمىنسىز اتقارۋىمىز كەرەك, – دەپ تۇيىندەدى ءسوزىن جاقسىلىق اعا.
قالماحانبەت مۇقامەتقالي,
«ەگەمەن قازاقستان»
الماتى وبلىسى
