«بولاشاق ءونىمنىڭ نەگىزى دۇرىس قالانعاندا تابىسقا جەتەمىز. تۇقىم تولىق كولەمدە سەبىلدى. پار القاپتارى ءتورت رەت وڭدەلدى, 2 ميلليون گەكتاردان اسا سۇدىگەر جىرتىلدى. قولعا قارايتىن مالدىڭ ءبىر جارىم جىلدىق جەم-ازىعى, سۇرلەم, پىشەن جەتكىلىكتى دايىندالدى. وتكەن جىلدارمەن سالىستىرعاندا تاماق جانە وڭدەۋ كاسىپورىندارى 1,5 ميلليارد تەڭگەگە ارتىق ءونىم ءوندىردى», دەدى جىلعا شولۋ جاساعان وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆ.
سوڭعى جىلدارى مال شارۋاشىلىعىنداعى وڭ وزگەرىستەر ايقىن بىلىنەدى. بارلىق ت ۇلىكتىڭ سانى ارتتى, مال شارۋاشىلىعىمەن اينالىساتىن اگروفيرمالاردىڭ قاراسى كوبەيىپ, ولاردىڭ سانى 1294-كە جەتتى. اۋىل شارۋاشىلىعىنىڭ ينۆەستورلارعا تارتىمدىلىعى ارتتى. سوڭعى جىلدارى وبلىس اگروونەركاسىپ كەشەنىنە سالىنعان ينۆەستيتسيا 16 پروتسەنتكە ارتىپ, 32 ميلليارد تەڭگەنى قۇرادى. اۋىل شارۋاشىلىعى تەحنيكالارىن جاڭالاۋ قارقىنى دا جاقساردى.
اۋىل شارۋاشىلىعى القاپتارىن ءارتاراپتاندىرۋ ءىسى جىلدان جىلعا جىلدامداتا جۇرگىزىلىپ كەلەدى. قازىر بيدايدىڭ كولەمى قىسقارىپ, ول بارلىق القاپتىڭ 62 پروتسەنتى بولىپ وتىر. سونىڭ ارقاسىندا بۇرشاق تۇقىمداستار 37, جەم-ازىق ءشوبى 18, مايلى داقىلدار 85 پروتسەنتكە ۇلعايدى. عاۋەز تورسان ۇلى اۋىل شارۋاشىلىعىن دامىتۋدا تسيفرلاندىرۋ باعدارلاماسىنىڭ اسەرى مول بولعانىن ايتىپ ءوتتى. ەگىن شارۋاشىلىعى مەن مال شارۋاشىلىعىندا قاتار جۇرگىزىلگەن جۇمىستار بۇگىندە وڭ ناتيجەسىن كورسەتە باستادى.
اۋىل شارۋاشىلىعى قىزمەتكەرلەرىنىڭ كۇنىنە ارنالعان سالتاناتتى جيىندا وسىنداي جەتىستىكتەر ايتىلىپ, ارداگەرلەر مەن وزاتتار «ەڭبەك ارداگەرى» مەدالىمەن, «اۋىل شارۋاشىلىق سالاسىنىڭ ۇزدىگى», «قۇرمەت ارداگەرى» توسبەلگىلەرىمەن جانە اۋىل شارۋاشىلىعى ءمينيسترىنىڭ «قۇرمەت گراموتاسىمەن» ماراپاتتالدى. اۋىل شارۋاشىلىعى قىزمەتكەرلەرى وبلىس كوركەمونەرپازدارى مەن وبلىستىق فيلارمونياسى ونەر شەبەرلەرىنىڭ كونتسەرتىن تاماشالادى.
ءنازيرا جارىمبەت,
«ەگەمەن قازاقستان»
قوستاناي
