تمد ۇكىمەتتەرىنىڭ باسشىلارى كەڭەسىنىڭ وتىرىسى ءداستۇرلى تۇردە شاعىن جانە كەڭەيتىلگەن قۇرامداردا ءوتتى.
وتىرىسقا قازاقستان پرەمەر-ءمينيسترى ب. ساعىنتاەۆ, رەسەي فەدەراتسياسىنىڭ پرەمەر-ءمينيسترى د. مەدۆەدەۆ, ازەربايجان پرەمەر-ءمينيسترى ن. مامەدوۆ, بەلارۋس پرەمەر-ءمينيسترى س. رۋماس, قىرعىزستان پرەمەر-ءمينيسترى م. ابىلگازيەۆ, تاجىكستان پرەمەر-ءمينيسترى ك. راسۋلزودا, وزبەكستان پرەمەر-ءمينيسترى ا. اريپوۆ, ارمەنيانىڭ ءبىرىنشى ۆيتسە-پرەمەرى ا. ميرزويان, تۇرىكمەنستان مينيسترلەر كابينەتى توراعاسىنىڭ ورىنباسارى گ. مۋرادوۆ, بەلارۋستەگى مولدوۆا ەلشىسى, تمد جانىنداعى تۇراقتى ۋاكىلەتتى وكىل ۆ. سوروچان, تمد اتقارۋشى كوميتەتىنىڭ توراعاسى س. لەبەدەۆ قاتىستى.
شاعىن قۇرامداعى وتىرىستا تمد-عا مۇشە ەلدەردىڭ ەكونوميكالىق ءوزارا ءىس-قيمىلىنىڭ وزەكتى ماسەلەلەرى بويىنشا پىكىر الماستىرىلدى. سونىمەن قاتار, ۇكىمەتتىك دەلەگاتسيالاردىڭ باسشىلارى بىرلەسكەن قىزمەتتى ودان ءارى جەتىلدىرۋگە باعىتتالعان بىرقاتار ۇسىنىستارىن جەتكىزدى. قازاقستان تاراپى ساۋدا قاتىناستارىن نىعايتۋ, عارىش سالاسىندا بىرلەسكەن جوبالاردى ىسكە اسىرۋ, ەكونوميكالاردىڭ تسيفرلاندىرۋعا كوشۋى جونىندەگى جۇمىستاردى جانداندىرۋ, «جاسىل» تەحنولوگيالاردى جانە يننوۆاتسيالاردى دامىتۋ سالالارىندا مۇشە مەملەكەتتەردىڭ بىرلەسكەن باستامالارىن ىسكە اسىرۋ ماسەلەلەرىن كوتەردى.
س. لەبەدەۆتىڭ ايتۋىنشا, دەلەگاتسيالار باسشىلارىنىڭ بارلىق باستامالارى مەن ۇسىنىستارىن تمد اتقارۋشى كوميتەتى ولاردىڭ تاجىريبە جۇزىندە دوستاستىقتىڭ جارعىلىق جانە سالالىق ورگاندارىنىڭ دەڭگەيىندە ىسكە اسىرىلۋى بويىنشا ءتيىستى قۇجاتتاردى ازىرلەۋ ماقساتىندا مۇقيات تالدايدى.
جالپى العاندا, وتىرىس قاتىسۋشىلارى بۇگىن قابىلدانعان شەشىمدەر مەن ولاردىڭ ءىس جۇزىنە اسىرىلۋى دوستاستىق اياسىنداعى ىنتىماقتاستىقتىڭ ودان ءارى نىعايا تۇسۋىنە ىقپال ەتەتىنىنە سەنىم ءبىلدىردى.
قازاقستاننىڭ تمد ەلدەرىمەن تاۋار اينالىمى وتكەن جىلدىڭ قورىتىندىسى بويىنشا شامامەن 25% ءوسىپ, $22 ملرد استام سومانى قۇرادى, 2018 جىلدىڭ ءبىرىنشى جارتى جىلدىعىندا اتالعان كورسەتكىش 10,6%-عا ءوسىپ, $13,6 ملرد قۇرادى (2017 جىلدىڭ وسىنداي كەزەڭىندە — $12,3 ملرد). قازاقستاننان تمد ەلدەرىنە ەكسپورت 2018 جىلدىڭ قاڭتار–شىلدە ايلارىندا 16,9% ءوسىپ, $5,3 ملرد قۇرادى.
كەڭەيتىلگەن قۇرامداعى وتىرىستىڭ كۇن تارتىبىندە ەنەرگەتيكا, اۋىل شارۋاشىلىعى, الەۋمەتتىك قامسىزداندىرۋ, عارىش سالاسى, سالىقتىق اكىمشىلەندىرۋ, بايلانىس جانە يننوۆاتسيالار, زياتكەرلىك مەنشىك نىساندارىنىڭ قۇقىقتارىن قورعاۋ, سونداي-اق, گۋمانيتارلىق ءوزارا ءىس-قيمىل سالالارىنداعى ىنتىماقتاستىققا قاتىستى 13 ماسەلە قارالدى.
ۇكىمەتتىك دەلەگاتسيالاردىڭ باسشىلارى تمد-عا قاتىسۋشى مەملەكەتتەردىڭ جوعارى تەحنولوگيالى ەنەرگەتيكالىق جابدىقتار ءوندىرۋدى دامىتۋ بويىنشا قابىلدانىپ جاتقان ىنتىماقتاستىق تۇجىرىمداماسىنىڭ ماڭىزدىلىعىن اتاپ ءوتتى. بۇل وندىرىستىك قۋاتتىلىقتاردى كەڭەيتىپ, جاڭعىرتۋعا, جاڭا ونىمدىلىگى جوعارى جۇمىس ورىندارىن اشۋعا, سونداي-اق, عىلىمي-زەرتتەۋ الەۋەتىن ارتتىرۋعا جانە جالپى دوستاستىق ەلدەرىنىڭ ەنەرگەتيكا سەكتورىن, ماشينا جاساۋ جانە ونەركاسىپ سالالارىن دامىتۋدى كۇشەيتۋگە جول اشادى.
وتىرىس بارىسىندا «روساتوم» اتوم ەنەرگياسى جونىندەگى مەملەكەتتىك كورپوراتسياسىنىڭ باس ديرەكتورىنىڭ ورىنباسارى ن. سپاسسكيدىڭ, «مەي» ۇلتتىق زەرتتەۋ ۋنيۆەرسيتەتىنىڭ ءبىرىنشى پرورەكتورى ۆ. زامولودچيكوۆتىڭ باياندامالارى تىڭدالدى.
تمد ۇكىمەتتەرى باسشىلارىنىڭ كەڭەسى وتىرىسىنىڭ قورىتىندىسى بويىنشا بىرقاتار قۇجاتقا قول قويىلدى:
تمد-عا قاتىسۋشى مەملەكەتتەردىڭ يادرولىق اپات وقيعاسىنا نەمەسە رادياتسيالىق اپاتتىق جاعدايدىڭ تۋىنداۋىنا دايىن بولۋ جانە ولاردىڭ سالدارىن جويۋ كەزىندە ءوزارا كومەك كورسەتۋدى قامتاماسىز ەتۋ بويىنشا ءوزارا ءىس-قيمىلى تۋرالى كەلىسىم;
تمد-عا قاتىسۋشى مەملەكەتتەردىڭ شەكارا ماڭىنداعى اۋماقتارىندا ورمان اۋرۋىنىڭ وشاقتارى مەن زيانكەستەرىنىڭ الدىن الۋ جانە جويۋ بويىنشا ءوزارا ءىس-قيمىلى تۋرالى كەلىسىم;
تمد-عا قاتىسۋشى مەملەكەتتەردىڭ بەيبىت ماقساتتا عارىش كەڭىستىگىن زەرتتەۋ جانە پايدالانۋ سالاسىندا بىرلەسكەن قىزمەتتى جۇزەگە اسىرۋى تۋرالى كەلىسىم;
تمد-عا قاتىسۋشى مەملەكەتتەردىڭ ەلەكتروندى جانە ەلەكتر تەحنيكالىق جابدىقتار قالدىقتارىن پايدالانۋ سالاسىنداعى ىنتىماقتاستىق تۋرالى 01.06.2018 جىلعى كەلىسىمىن ىسكە اسىرۋ جونىندەگى ءىس-شارالار جوسپارى;
17.01.1997 جىلعى ۇيالى جىلجىمالى بايلانىس جۇيەلەرىن دامىتۋ جانە پايدالانۋداعى ىنتىماقتاستىق تۋرالى كەلىسىمگە وزگەرىستەر ەنگىزۋ تۋرالى حاتتاما;
سالىقتىق اكىمشىلەندىرۋدى جۇزەگە اسىرۋ ءۇشىن تمد-عا قاتىسۋشى مەملەكەتتەر اراسىندا ەلەكتروندى اقپارات الماسۋ تۋرالى حاتتاما;
«ۋران شىعاراتىن وندىرىستەر اسەر ەتكەن مەملەكەتتەردىڭ اۋماقتارىن قالپىنا كەلتىرۋ» مەملەكەتارالىق ماقساتتى باعدارلاماسىنا وزگەرىستەر ەنگىزۋ تۋرالى شەشىم;
تمد-عا قاتىسۋشى مەملەكەتتەردىڭ جوعارى تەحنولوگيالى ەنەرگەتيكالىق جابدىق ءوندىرۋدى دامىتۋ جانە ونى ىسكە اسىرۋدىڭ نەگىزگى شارالارىنىڭ جوسپارى بويىنشا ىنتىماقتاستىق تۇجىرىمداماسى;
تمد-عا قاتىسۋشى مەملەكەتتەردىڭ 2020 جىلعا دەيىنگى كەزەڭگە ارنالعان يننوۆاتسيالىق ىنتىماقتاستىعىنىڭ مەملەكەتارلىق باعدارلاماسى اياسىندا مەملەكەتارالىق يننوۆاتسيالىق جوبالاردى جانە ءىس-شارالاردى ىسكە اسىرۋ ناتيجەسىندە قۇرىلعان زياتكەرلىك مەنشىك نىساندارىنا قۇقىقتاردى ءبولۋ ءتارتىبى;
2020 جىلعا دەيىنگى كەزەڭدە تمد-عا قاتىسۋشى مەملەكەتتەردە سوعىس ارداگەرلەرىنىڭ – جەرگىلىكتى شيەلەنىستەر قاتىسۋشىلارىنىڭ جانە ولاردىڭ وتباسى مۇشەلەرىنىڭ ءومىر ساپاسىن جاقسارتۋ جانە مەديتسينالىق-الەۋمەتتىك كومەكتى ودان ءارى دامىتۋدىڭ نەگىزگى باعىتتارىن ىسكە اسىرۋدىڭ ءىس-شارالار جوسپارىن 2019 جىلى قارجىلاندىرۋ تۋرالى شەشىم;
تمد-عا قاتىسۋشى مەملەكەتتەردىڭ گۋمانيتارلىق ىنتىماقتاستىق سالاسىنداعى باسىم ءىس-شارالارىنىڭ 2019–2020 جىلدارعا ارنالعان جوسپارى;
17.01.1997 جىلعى ۇيالى جىلجىمالى بايلانىس جۇيەلەرىن دامىتۋ جانە پايدالانۋداعى ىنتىماقتاستىق تۋرالى كەلىسىمگە وزگەرىستەر ەنگىزۋ جونىندەگى حاتتاما تۋرالى كەلىسىم.
