قازاقستان رەسپۋبليكاسى ۇلتتىق بانكىنىڭ قاۋلىسىمەن «بىرىڭعاي جيناقتاۋشى زەينەتاقى قورى» اكتسيونەرلىك قوعامىنىڭ كوميسسيالىق سىياقىسىنىڭ 2019 جىلعا ارنالعان شاماسى:
1) ينۆەستيتسيالىق تابىس سوماسىنىڭ 5,0 پايىزى;
2) زەينەتاقى اكتيۆتەرىنىڭ ايىنا 0,015 پايىزى كولەمىندە بەكىتىلدى.
وسى ارادا ەسكە سالا كەتۋ كەرەك, «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» قر زاڭىنا سايكەس بىرىڭعاي جيناقتاۋشى زەينەتاقى قورىنىڭ كوميسسيالىق سىياقىسىنىڭ شەكتى شاماسى: ينۆەستيتسيالىق تابىستىڭ 7,5 پايىزىنان جانە زەينەتاقى اكتيۆتەرىنىڭ ايىنا 0,025 پايىزىنان اسپايتىن شەكتە بەلگىلەنەدى.
جوعارىدا كورسەتىلگەن شامالار 2014 جىلدان بەرى تالاي رەت ازايتىلدى جانە كورسەتىلگەن شامالاردان 2019 جىلعا قاراي:
– ينۆەستيتسيالىق تابىس سوماسىنان 33 پايىزعا (2014 جىلى – 7,5%);
– زەينەتاقى اكتيۆتەرىنەن 40 پايىزعا (2014 جىلى – 0,025%) تومەن.
بۇعان قوردىڭ بيزنەس-ۇدەرىستەردى وڭتايلاندىرۋ, ءتيىمسىز شىعىنداردى قىسقارتۋ, كورسەتىلەتىن قىزمەتتەردىڭ بارلىق دەرلىك ءتۇرىن ەلەكتروندىق فورماتقا اۋىستىرۋ, كورسەتىلگەن قىزمەتتەردىڭ جالپى كولەمى ىشىندە ولاردىڭ ۇلەسىن ارتتىرۋدى جۇرگىزۋ ناتيجەسىندە قول جەتكىزىلدى.
ايناش ەسالي,
«ەگەمەن قازاقستان»
الماتى
