مەملەكەت باسشىسى نۇرسۇلتان نازارباەۆ: «بەيبىتشىلىك ەشقانداي بايلىقپەن ولشەنبەيدى. سوندىقتان بىتىمگەرلىك ميسسياسى – ءبىزدىڭ سىرتقى ساياساتىمىزدىڭ باستى باعىتى. قازاقستان قاشان دا بەيبىت كەلىسسوزدەردى جۇرگىزۋگە جاعداي جاسايتىن مەملەكەت بولىپ قالا بەرەدى» دەگەن بولاتىن. قازاقستاننىڭ بىتىمگەرلىك باستامالارى تاۋەلسىزدىكتىڭ العاشقى جىلدارىنان باستاپ-اق بەيبىت ساياسات ۇستانىپ, الەمدەگى ءتۇيىندى ماسەلەلەردىڭ شەشىلۋىنە تىكەلەي اتسالىسىپ كەلە جاتقان مەملەكەتىمىزدىڭ حالىقارالىق دارەجەدە تانىلۋىن جاڭا ساپالىق دەڭگەيگە كوتەردى دەۋگە بولادى.
بەدەلدى حالىقارالىق ۇيىمنىڭ بىتىمگەرلىك ميسسيانى اتقاراتىن اسكەرىنە جاساق قوسۋ ءىسى كەز كەلگەن مەملەكەتكە جۇكتەلە بەرەتىن شارۋا ەمەس. مۇنداي مارتەبە حالىقارالىق قوعامداستىقتا ءبىتىستىرۋشى, ۇيلەستىرۋشى رەتىندە مويىندالعان ەلدەرگە عانا ارتىلاتىن سەنىم بولسا كەرەك. بۇل ورايدا ەلىمىزدىڭ بۇۇ بىتىمگەرلىك اسكەرىنە ورتالىق ازيادان اسكەر جىبەرۋشى العاشقى مەملەكەتتەردىڭ ءبىرى ەكەنىن دە ايتا كەتكەن ءجون.
ەل ساربازدارى ىشكى شيەلەنىسى ءورشىپ تۇرعان مەملەكەتتە التى اي بويى اسكەري قىزمەتتە بولادى. ولار ليۆانعا ءۇندىستاننان اتتانعان 680 جاۋىنگەردەن قۇرالعان نەگىزگى باتالونعا قوسالقى قۇرام رەتىندە قوسىلماق. «شيەلەنىس وشاعىندا ساربازداردى قانداي قاۋىپ-قاتەرلەر كۇتىپ تۇر؟ ولار قارۋلى قاقتىعىستارعا قاتىسا ما دەپ الاڭداۋدىڭ ەش رەتى جوق» دەيدى جاۋاپتى ماماندار. بىتىمگەرلىك باتالونىنىڭ ساربازدارى قاقتىعىسقا تىكەلەي قاتىسپايدى, كەرىسىنشە, بەيبىت كەلىسىمنىڭ ورىندالۋىن باقىلاپ, بۇۇ بىتىمگەرشىلىك ساياساتىن جۇرگىزۋگە اتسالىساتىن بولادى. اتى ايتىپ تۇرعانداي, جاۋىنگەرلەر وندا گۋمانيتارلىق كومەك كورسەتۋ, جەرگىلىكتى تۇرعىندارعا جاردەم بەرۋ, اسكەري بازالاردى جانە جۇكتەردى قاراۋىلداۋ سىندى بەيبىت ماقساتتاعى تاپسىرمالاردى ورىنداۋعا جۇمىلدىرىلماق.
اسكەريلەردىڭ ساپىندا اسكەري شەنى جوعارى ساقا جاۋىنگەرلەرمەن قاتار جاس ساربازدار دا بار. ەڭ باستىسى, ولاردىڭ بارلىعى اسكەري بىلىگى جەتىك ءوز ءىسىنىڭ شەبەرلەرى. قورعانىس مينيسترلىگىنىڭ وكىلدەرى ساربازدار بۇل اسكەري قىزمەتكە ءوز ەرىكتەرىمەن بارعانىن جانە جاۋىنگەرلەر قاتاڭ ىرىكتەۋدەن وتكەنىن ايتادى. ليۆان جەرىندە ولارعا جۇكتەلەتىن وپەراتسيالار ارناۋلى ەرەجەگە سايكەس جۇزەگە اسپاق. بارلىق ساربازدار العاشقى ءۇش ايدا وقۋ-جاتتىعۋ جۇمىستارىنان وتەدى. ءاربىر جاۋىنگەر ليۆانداعى اسكەري قىزمەتى ءۇشىن اي سايىن ءۇش ەسەلەنگەن مولشەردە جالاقى الاتىن بولادى. ودان بولەك بۇۇ تاراپىنان ءار ساربازعا ايىنا 1420 دوللار ايلىق تولەنەدى.
«بۇل باستاما بۇۇ جارعىسىنداعى 43 بابتىڭ مازمۇنىنا سايكەس كەلەدى. ۇيىمعا مۇشە مەملەكەتتەر حالىقارالىق بەيبىتشىلىك پەن قاۋىپسىزدىكتى قولداۋ ءۇشىن قارۋلى كۇشتەردى, باسقا دا كومەك پەن قىزمەت كورسەتۋدىڭ ءتيىستى قۇرالدارىن بەرۋگە مىندەتتى. اسكەريلەرىمىزدىڭ بۇۇ ميسسياسىنا قاتىسۋى حالىقارالىق قاۋىپسىزدىكتى نىعايتۋعا ايتارلىقتاي ۇلەس قوسادى. سونداي-اق حالىقارالىق قوعامداستىقتىڭ مۇشەسى رەتىندە, ونىڭ ىشىندە قازاقستاننىڭ بۇۇ قاۋىپسىزدىك كەڭەسىندەگى تۇراقتى ەمەس مۇشەلىگىنىڭ قورىتىندىسىن شىعارۋ اياسىندا دا ەلىمىزدىڭ بەدەلىن نىعايتادى. ءار التى اي سايىن روتانىڭ جاۋىنگەرلەرىن اۋىستىرىپ تۇراتىن بولامىز, دەگەن بولاتىن جۋىردا عانا وسى ماسەلەگە قاتىستى جاساعان مالىمدەمەسىندە قورعانىس ءمينيسترىنىڭ ورىنباسارى تالعات مۇحتاروۆ.
بۇل جولى ليۆان جەرىنە جىبەرىلگەن 120 جاۋىنگەر – بىتىمگەرلىك ميسسياسىنا اتتانعانداردىڭ العاشقى لەگى. جاۋاپتى مامانداردىڭ سوزىنشە, ساربازداردىڭ كەلەسى شوعىرى قاڭتار ايىنان باستاپ دايىندىقتان ءوتىپ, ساۋىردە ليۆانعا اتتاناتىن بولادى. حالىقارالىق قاۋىپسىزدىكتى نىعايتۋ مەن قوعامدى بىتىمگەرلىك ساياساتقا تارتۋ بۇگىندە ماڭىزدى سيپاتقا يە بولىپ وتىرعان ماسەلەنىڭ ءبىرى. تاۋەلسىز مەملەكەتىمىز جاھاندىق بەيبىتشىلىك ماسەلەلەرىنە قولداۋ تانىتىپ, سەنىمدى سەرىكتەستىك پەن بەرىك ىنتىماقتاستىقتىڭ بىرەگەي وزىق الاڭىنا اينالىپ كەلەدى. بۇل جاۋاپتى قىزمەت ءوز كەزەگىندە مەملەكەتىمىزدىڭ قارۋلى كۇشتەرىنە زور تاجىريبە جيناقتاپ, اسكەري مامانداردىڭ جاۋىنگەرلىك قابىلەتتەرىن شىڭداۋعا مۇمكىندىك بەرمەك.
ارمان وكتيابر,
«ەگەمەن قازاقستان»
الماتى
