ء«ۇشىنشى» دەپ تە اتالاتىن جاڭا كەشەن الەمدەگى ەڭ ۇلكەن اۋەجايلاردىڭ قاتارىنان كورىنۋگە ۇمىتكەر. اشىلۋ سالتاناتىنا تۇركيا پرەزيدەنتى رەجەپ تايپ ەردوعان قاتىستى.
ىستانبۇلدىڭ ەۋروپا بولىگىندەگى ارناۋىتكوي اۋدانىندا, دۋرۋسۋ كولىنە جاقىن ورنالاسقان جاڭا اۋەجايدان كوككە كوتەرىلگەن العاشقى ۇشاق انكارا قالاسىنا بەت الدى. ال ءبىرىنشى حالىقارالىق رەيس سولتۇستىك كيپر تۇرىك رەسپۋبليكاسىنا جاسالماق. ودان كەيىن ازەربايجانعا رەيس اشىلۋى جوسپارلانعان.
جىلىنا 150 ميلليون جولاۋشىعا قىزمەت كورسەتە الاتىن اۋەجايدىڭ جالپى قۇنى – 11,7 ميلليارد اقش دوللارى. ونى «ليماك», «كولين», «دجەنگيز», «ماپا» كومپانيالارىنىڭ 200 مىڭ جۇمىسشىسى 42 اي بويى سالعان-دى.
جالپى اۋماعى 76,5 ميلليون شارشى مەتر بولاتىن كەشەننىڭ العاشقى كەزەڭىنە 10 ميلليارد ەۋرو جۇمسالعان. اۋە الاڭىنىڭ قالعان بولىگى قولدانىسقا 2023 جىلعا دەيىن بەرىلمەك. اۋەجايدا 6 ۇشۋ-قونۋ جولاعى, 500 ۇشاق تۇراعى, 70 مىڭ اۆتوكولىك قابىلداي الاتىن اشىق جانە جابىق اۆتوتۇراق بار.
جىل سوڭىنا دەيىن اۋەجايدا 2000 ۇشاق قابىلدانىپ, الەمنىڭ 350-دەن استام نۇكتەسىنە جولاۋشى اتتاندىرۋ جوسپارلانعان. Yeni havalimanı الەمنىڭ 250 اۋە كومپانياسىنا قىزمەت كورسەتەدى. Airbus A380 پەن Boeing 747-8 سەكىلدى سوڭعى ۇلگىدەگى ۇشاقتاردى قيىندىقسىز قابىلداي الادى. سونداي-اق روبوت, جاساندى ينتەللەكت ارقىلى ادام تانۋ, اقىلدى جۇيە, كابەلسىز ينتەرنەت, SIM كارتاسىز GSM قولجەتىمدىلىگى سەكىلدى بىرقاتار زاماناۋي تەحنولوگيانىڭ قولدانىلۋىنا مۇمكىندىك بار. جولاۋشىلارىنىڭ قاۋىپسىزدىگى ءۇشىن 3500 كۇزەت قىزمەتكەرى مەن 9000 بەينەباقىلاۋ كامەراسى جۇمىس ىستەيدى.
ىستانبۇلدا بۇدان باسقا «اتاتۇرك», «سابيحا گوكچەن» اتىنداعى اۋەجايلار بار. جاڭا اۋەجاي مەن اتاتۇرك اۋەجايىنىڭ اراسى – 35 كيلومەتر. 2018 جىلدىڭ سوڭىنا دەيىن «اتاتۇرك» اۋەجايى تولىعىمەن جاڭا اۋەجايعا كوشىرىلەدى دەپ جوسپارلانعان. ازىرگە جاڭا اۋەجاي كونسترۋكتسياسى تولىعىمەن اياقتالمايىنشا, «اتاتۇرك» اۋەجايى جۇمىسىن جالعاستىرا بەرمەك. جاڭا اۋەجاي الاڭى ىستانبۇل مەتروسىنىڭ م2, مارماراي جەلىسىمەن بايلانىسادى.
سۆەتلانا عالىمجانقىزى,
«ەگەمەن قازاقستان»
