تولەگەن «ساتاش» ءفيلمىن كەزدەيسوق تۇسىرىلمەگەن. ۇزاق ۋاقىت ىشكى دايىندىقپەن كەلگەنىن ايتادى. تولەگەننىڭ ءوزى قازاقستان كينوسىنشىلار قاۋىمداستىعىنىڭ مۇشەسى, «تۇران» ۋنيۆەرسيتەتى كينو ونەرى كافەدراسىنىڭ اعا-وقىتۋشىسى, «التىن ادام» ۇلتتىق بايقاۋىنىڭ «ۇزدىك جۋرناليست» جۇلدەسىنىڭ لاۋرەاتى.
ش.ايمانوۆ اتىنداعى «قازاقفيلم» كينوستۋدياسى قر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن «ساتاش» كارتيناسى قىلمىسكەرلەرمەن شايقاسقا تۇسكەن اۋىلدىڭ ساتاش ەسىمدى ۋچاسكەلىك پوليتسەيى تۋرالى باياندايدى. ساتاش – ادال پوليتسەي. ول اۋىلدى باسىپ العان قىلمىسكەرلەرگە جالعىز ءوزى توتەپ بەرىپ, قىزمەتتىك بورىشىنا قىلاۋ تۇسىرمەي, تۇرعىندارعا تىرناعى باتقاندارمەن ءبىر ءوزى شايقاسادى.
فيلمدەگى باستى رولدەردى اقىلحان الماسوۆ, دينا تاسبولاتوۆا, شىڭعىس كاپين جانە ەرجان نۇسىپاقىنوۆ جاس اكتەرلەر وينايدى. ۇرىس ساحنالارىن باحادىر جالمەتوۆ پەن «جال» كاسكادەرلەر قاۋىمداستىعى قويعان. ءتۇسىرىلىم جۇمىسى الماتى وبلىسى, قاپشاعاي قالاسىنان 40 شاقىرىمدا ورنالاسقان «بريگادير» اۋىلىندا جۇرگىزىلگەن.
ەستەرىڭىزگە سالا كەتسەك,ء «ساتاش» فيلمى جاقىندا عانا قازاننىڭ 12-ءى مەن 21-ءى ارالىعىندا وتكەن 34-ۆارشاۆا كينوفەستيۆالىنىڭ كونكۋرستىق باعدارلاماسىنا قاتىسقان بولاتىن. رەجيسسەر تولەگەن بايتوكەنوۆتىڭ ايتۋىنشا, ءفيلمدى تاماشالاعان پولشالىق كورەرمەندەر مەن ءتۇرلى ەلدەن كەلگەن باق وكىلدەرى كارتينانىڭ ۇناعانىن ايتىپ, جىلى لەبىزدەرىن بىلدىرگەن. مىسالى, SLANT Magazine اتتى امەريكالىق تانىمال باسىلىمىنىڭ كينوسىنشىسى چاك بوەن فەستيۆال بارىسىندا «ساتاش» ءفيلمى تۋرالى:
اتالعان كينوتۋىندى اسەمدىلىگىمەن ەرەكشەلەنەدى. فيلمدە ءبارى ۇيلەسىمدى, ءار كادرلارى ورىندى, ايىرىقشا كينواحۋال سەزىلەدى, وقيعا جەلىسى دە قىزىقتى. ءفيلمنىڭ سوڭى دا ويداعىداي اياقتالادى, ءار كومپوزيتسياسى ەستە قالارلىق. بۇل – ناعىز زاماناۋي ۆەستەرن,– دەگەن ەكەن.
ايگۇل احانبايقىزى,
«ەگەمەن قازاقستان»
الماتى
