«عاجاپ! ءۇستىرت مەملەكەتتىك تابيعي قورىعىنىڭ قىزمەتكەرلەرى كەرەمەت جاڭالىقتى حابارلادى. قورىق اۋماعىندا قابىلان پايدا بولدى», - دەپ جازدى ساكەن دىلداحمەت.
ونىڭ جازۋىنشا, كەزىندە بۇل وڭىردە گەپاردتار تىرشىلىك ەتكەن. ال قابىلاننىڭ كەزىگۋى ءبىرىنشى رەت تىركەلىپ وتىر.
ەسكە سالا كەتسەك, ءۇستىرتتىڭ قازاقستاندىق بولىگىندە سيرەك كەزدەسەتىن جانۋارلاردىڭ بارى دالەلدەنگەنىن بۇرىن دا حابارلاعان بولاتىنبىز. قازاقستاننىڭ بيوالۋانتۇرلىلىكتى ساقتاۋ قاۋىمداستىعىنىڭ (قبسق) ەكىنشى ەكسپەديتسياسى ورتالىق ازيا شولدەرى جونىندەگى باستاما (واشب) جوباسى بويىنشا ءۇستىرتتىڭ قازاقستانداعى وڭتۇستىك بولىگىنە بارىپ, وسىنداي تۇجىرىم جاساعان.
ايتا كەتەيىك, قابىلاندار افريكا, ورتا ازيا جانە ۇندىستاندا تارالعان. قازاقستاندا 18-عاسىردىڭ اياعى — 19-عاسىردىڭ باسىندا كاسپي مەن ارال تەڭىزدەرىنىڭ ارالىعىنداعى ءشولدى ايماقتا تىرشىلىك ەتكەن. 20-عاسىردىڭ 50-جىلدارى سيرەك بولسا دا, ۇستىرت پەن ماڭعىستاۋ تۇبەگىندە كەزدەسىپ قالىپ ءجۇردى.
قابىلان تروپيكتىك جانە سۋبتروپيكتىك ايماقتارداعى ورمانداردا, تاۋ بەتكەيلەرىندە, جازىق دالالار مەن ساۆاننادا, وزەن بويىنداعى توعايلاردا تىرشىلىك ەتەدى.
