باستامالار ءتۇسىندىرىلدى
پارلامەنتشىلەردىڭ ەلباسى جولداۋىن ءتۇسىندىرۋ بويىنشا ەلدى مەكەندەرگە ساپارلارى ءالى دە جالعاسۋدا. ماسەلەن, سەنات دەپۋتاتتارى عۇمار دۇيسەمباەۆ پەن سارسەنباي ەڭسەگەنوۆ جۇمىس ساپارىمەن اتىراۋ وبلىسىنا كەلدى. مەملەكەت باسشىسىنىڭ بيىلعى حالىققا جولداۋىندا ايتىلعان مىندەتتەر تۋرالى سەناتورلاردىڭ جەرگىلىكتى اتقارۋشى ورگانداردىڭ باسشىلىعىمەن, اۋداندىق ءماسليحات دەپۋتاتتارىمەن جانە تۇرعىندارمەن كەزدەسۋى بارىسىندا ءسوز بولدى.
اتىراۋ بيزنەس جانە قۇقىق كوللەدجىندە ستۋدەنتتەرمەن كەزدەسكەن سەنات دەپۋتاتتارى جوعارى ءبىلىم بەرۋ جۇيەسىندە مامانداردى دايارلاۋ مەن وقۋ ورىندارىنداعى ءبىلىم ساپاسىنا قويىلاتىن تالاپتاردىڭ كۇشەيتىلەتىنىن اتاپ ءوتتى.
جۇمىس ساپارى كەزىندە سەناتورلار اۋدانداردى ارالاپ, اۋىل تۇرعىندارىمەن كەزدەسۋلەر وتكىزىپ, جولداۋدا باسىمدىق بەرىلگەن سالالاردى دامىتۋ, ەلىمىزدىڭ الەۋمەتتىك-ەكونوميكالىق احۋالىن جاقسارتۋدى كوزدەيتىن شارالاردى جەدەل ىسكە اسىرۋ تۋرالى باياندادى.
قازاقستاندىقتاردىڭ ءال-اۋقاتىنىڭ ءوسۋى باستى باسىمدىققا اينالۋعا ءتيىس.
مەن لاۋازىمدى تۇلعانىڭ جەكە تيىمدىلىگىن جانە قىزمەتكە لايىقتىلىعىن ءدال وسى ولشەمگە سايكەس باعالايتىن بولامىن.
قازاقستاندىقتاردىڭ ءال-اۋقاتى, ەڭ الدىمەن, تابىستارىنىڭ تۇراقتى ءوسىمى مەن تۇرمىس ساپاسىنا بايلانىستى.
(جولداۋدان)
باقىتگۇل باباش,
«ەگەمەن قازاقستان»
اتىراۋ
***
اگروونەركاسىپ كەشەنىن دامىتۋ جايى ءسوز بولدى
سەنات دەپۋتاتى سەرىك جاقسىبەكوۆ اقمولا وبلىسىنداعى شورتاندى اۋدانىنىڭ بيزنەس وكىلدەرىمەن جانە اۋىل شارۋاشىلىعى تاۋارلارىن وندىرۋشىلەرىمەن كەزدەستى.
اۋدان اكىمى, اۋىل وكرۋگتەرى مەن اۋىل اكىمدەرى قاتىسقان كەزدەسۋدە ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس مەن ءومىر ساپاسىن ارتتىرۋ» اتتى جولداۋى جان-جاقتى تالقىلاندى.
جۇزدەسۋگە قاتىسۋشىلار جولداۋداعى ەلىمىزدىڭ ەكونوميكاسىن دامىتۋ جونىندەگى ەرەجەلەر تۋرالى ءوز ويلارىن ايتا كەلىپ, اگروونەركاسىپ كەشەنىن دامىتۋ ماسەلەلەرى تۋرالى ۇسىنىس, پىكىرلەرىن ورتاعا سالدى.
بايقال ءبايادىل,
«ەگەمەن قازاقستان»
اقمولا وبلىسى
***
باسىمدىقتار تالقىلاندى
ەلباسى جولداۋىن تۇرعىندارعا جەتكىزۋ ماقساتىندا شىعىس قازاقستان وبلىسىندا بولعان سەنات دەپۋتاتى دۇيسەنعازى مۋسين جارما اۋدانىنىڭ بىرقاتار مەكەمەسىندە كەزدەسۋ وتكىزدى.
سۋىقبۇلاق اۋىلىنداعى كەزدەسۋدە سەناتور بيىلعى جولداۋدا نەگىزىنەن الەۋمەتتىك ماسەلەلەر قامتىلعانىن اتاپ ءوتتى. ال شار قالاسىنداعى تەحنولوگيالىق كوللەدج ستۋدەنتتەرىمەن, ۇستازدار جانە دارىگەرلەرمەن كەزدەسۋىندە ەلباسىنىڭ كەلەسى جىلدى «جاستار جىلى» دەپ جاريالاۋىنا وراي جاستاردى بەلسەندى بولۋعا, تىڭ يدەيالار مەن باستامالاردى كوتەرۋگە ۇندەدى.
ساپار بارىسىندا سەناتور اباي اۋدانىنىڭ قاسقابۇلاق, كەڭگىرباي بي اۋىلدارىندا جانە اۋدان ورتالىعى قاراۋىلدىڭ تۇرعىندارىمەن دە جۇزدەسىپ, حالىقتىڭ ءال-اۋقاتىن ارتتىرۋ مەن اۋىل شارۋاشىلىعىن دامىتۋ ماسەلەلەرىن تالقىلادى.
ازامات قاسىم,
«ەگەمەن قازاقستان»
شىعىس قازاقستان وبلىسى
***
جاستار جەتەكشىلەرىمەن جاراسىمدى اڭگىمە
پارلامەنت سەناتىنىڭ دەپۋتات سەرىك بەكتۇرعانوۆ قوستاناي قالاسىندا جاستار جەتەكشىلەرىمەن, ۇكىمەتتىك ەمەس ۇيىمداردىڭ توراعالارىمەن, ستۋدەنتتەرمەن كەزدەستى.
قوستاناي مەملەكەتتىك پەداگوگيكالىق ۋنيۆەرسيتەتىندەگى «رۋحاني جاڭعىرۋ» جوبالىق كەڭسەسىندە وتكەن شاراعا وسى وقۋ ورنىنىڭ باسشىلارى مەن جەرگىلىكتى اكىمدىك وكىلدەرى قاتىستى.
مەملەكەت باسشىسى ن.نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋى تالقىلاۋدىڭ باستى تاقىرىبى بولدى. سەناتور س.بەكتۇرعانوۆ الداعى جىلى ۇستازدار مارتەبەسى تۋرالى جاڭا زاڭ قابىلداناتىنىن اتاپ ءوتتى. كەزدەسۋگە قاتىسۋشىلار جاستار ساياساتى سالاسىندا ءوز يدەيالارى مەن ۇسىنىستارىن ايتتى. «رۋحاني جاڭعىرۋ» جوبالىق كەڭسەسىنىڭ ساراپشىلارى وزدەرىنىڭ قازىرگى جۇمىستارىن تانىستىردى.
ءنازيرا جارىمبەت,
«ەگەمەن قازاقستان»
قوستاناي
***
ساۋالدارعا جاۋاپ بەرىلدى
جولداۋدىڭ ءمان-ماڭىزىن ءتۇسىندىرۋ ماقساتىمەن قىزىلجار وڭىرىنە كەلگەن پارلامەنت ءماجىلىسىنىڭ دەپۋتاتتارى اۋدانداردى ارالاپ, جۇرتشىلىقپەن ىسكەرلىك كەزدەسۋلەر وتكىزدى.
تاريحي قۇجات جايلى پىكىرلەسىپ, ساۋالدارعا جاۋاپ بەرگەن سنەجاننا يماشەۆا مامليۋت, جامبىل اۋداندارىن ارالاپ, ەڭبەك ۇجىمدارىمەن كەزدەسكەن بولاتىن. دەپۋتات «پەداگوگ مارتەبەسى تۋرالى» زاڭدى ازىرلەۋ, قابىلداۋ قاجەتتىگىنە ايرىقشا نازار اۋدارىپ, مۇعالىمدەر مەن مەكتەپكە دەيىنگى مەكەمەلەر قىزمەتكەرلەرى ءجونسىز تەكسەرىستەر مەن مىندەتتەن تىس فۋنكتسيالاردان ارىلاتىنىن, مۇنىڭ ءوزى وقۋ ساپاسى مەن تاربيەگە ايتارلىقتاي ىقپال ەتەتىنىن جەتكىزدى.
پارلامەنت ءماجىلىسىنىڭ دەپۋتاتتارى پەتر شاراپاەۆ, البەرت راۋ پەتروپاۆل اۋىر ماشينا جاساۋ زاۋىتىندا, «رادۋگا» جشس-ىندە, پەتروپاۆل تەحنيكالىق-گۋمانيتارلىق كوللەدجىندە بولعان كەزدەسۋلەردە ەكسپورتقا باعدارلانعان يندۋستريالاندىرۋ, ونىڭ ىشىندە شيكىزاتتىق ەمەس ونىمدەر مەن تاۋارلارعا باسىمدىق بەرۋ, اگروونەركاسىپتىك كەشەننىڭ الەۋەتىن تولىق قولدانۋ, قارجى سەكتورىنىڭ ءرولىن كۇشەيتۋ ماسەلەلەرى بويىنشا وي-پىكىرلەر الىسىپ, تەحنيكالىق كادرلار دايىنداۋدىڭ وزەكتى پروبلەمالارىن ورتاعا سالدى. كەلەسى جىل «جاستار جىلى» دەپ جاريالانعانىن العا تارتا وتىرىپ, وسكەلەڭ ۇرپاقتىڭ ەلىمىزدەگى وزگەرىستەر ۇدەرىسىندە الاتىن ورنى ايرىقشا ەكەنىنە توقتالدى. ولاردى «اۋىل – ەل بەسىگى», ء«وز جەرىڭدى تانىپ-ءبىل» جوبالارىنا بەلسەنە قاتىسۋعا شاقىردى.
كيم رومان مەن ايقىن قوڭىروۆ م.جۇماباەۆ اۋدانىنا بارعان ساپارىندا سوكولوۆ ورمان شارۋاشىلىعى مەكەمەسىندە, پيتومنيكتە بولدى. حالىق قالاۋلىلارى جۇرتشىلىققا بيزنەستى وركەندەتۋدىڭ تۇراقتى كوزىن قالىپتاستىرۋ, جەكە ينۆەستيتسيانى ىنتالاندىرۋ, كاسىپكەرلىكتى زاڭسىز اكىمشىلىك قىسىمنان قورعاۋ جولدارىن اڭگىمەلەدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
