شارانىڭ اشىلۋ سالتاناتىندا سويلەگەن سوزىندە وبلىس اكىمىنىڭ ءبىرىنشى ورىنباسارى ايداربەك ساپاروۆ ەلباسى جولداۋىندا وڭىرلىك دەڭگەيدەگى رەزەرۆتەردى تاۋىپ, بۇقارالىق سپورت پەن دەنەشىنىقتىرۋدىڭ قولجەتىمدىلىگىن ارتتىرۋ مىندەتى قويىلعانىن, ەلىمىزدە كەم دەگەندە 100 دەنەشىنىقتىرۋ-ساۋىقتىرۋ كەشەنىن سالۋ تاپسىرماسى بەرىلگەنىن, ونىڭ العاشقى قادامى قىزىلجار وڭىرىندە باستاۋ العانىن اتاپ ءوتتى. «وڭىردە بىرنەشە كوشە باتىر ەسىمىمەن اتالادى. ونىڭ اتىنداعى مەكتەپ الدىنا ەڭسەلى ەسكەرتكىش قويىلعان. 14 جاسىنان اتقا قونىپ, قولىنا نايزا ۇستاپ, قازاق جەرىن جوڭعار شاپقىنشىلىعىنان قورعاۋدا نەبىر ەرلىك كورسەتكەن, قول باستاعان بابامىزدى قالاي ۇلىقتاساق تا جاراسادى. ابىلاي حان ونىڭ اقىلدىلىعىن, ەرجۇرەكتىگىن ۇلگى ەتكەن. سولتۇستىكقازاقستاندىقتاردىڭ 30 پايىزعا جۋىعى سپورتپەن شۇعىلدانىپ, جاستارعا سالاماتتى ءومىر ءسۇرۋ ۇلگىسىن كورسەتىپ كەلەدى. جۋىردا پەتروپاۆل قالاسىندا مەملەكەتتىك-جەكەمەنشىك ارىپتەستىگى شەڭبەرىندە امبەباپ تەننيس ورتالىعى تۇرعىزىلدى. بۇل ءۇردىس الداعى ۋاقىتتا دا ءوز جالعاسىن تابادى», دەي كەلىپ, ايداربەك سەيپىل ۇلى ايماق باسشىسى قۇمار اقساقالوۆتىڭ جىلى لەبىزگە تولى قۇتتىقتاۋىن جەتكىزدى.
باتىر باياننىڭ التىنشى ۇرپاعى زەينوللا قاجى ولجاباەۆ, وبلىستىڭ قۇرمەتتى ازاماتى, داڭقتى سپورتشى جامبىل تاسەمەنوۆ, اۋىر اتلەتيكادان وبلىستىڭ اعا جاتتىقتىرۋشىسى ەرىك الىباەۆ, تاعى باسقالارى قۋانىشقا ورتاقتاسىپ, ۇلت دەنساۋلىعىنىڭ ماڭىزىنا توقتالدى. اۋدان اكىمى اسقار بەگمانوۆ بايراقتى باسەكەلەردە ولجا سالىپ جۇرگەن جەرگىلىكتى سپورتشىلار مەن جاتتىقتىرۋشىلاردى ماراپاتتاپ, اقشالاي سىياقىلار تابىس ەتتى. ولاردىڭ اراسىندا اۋىر اتلەتيكادان ازيا چەمپيونى ايدار قازوۆتىڭ ەسىمى ەرەكشە اتالدى. جەرلەسىمىز قازىر الەم بىرىنشىلىگىنە دايىندالۋدا.
1100 شارشى مەتر اۋماقتى الىپ جاتقان كەشەندى سالۋعا قازىنادان 80 ميلليون تەڭگە باعىتتالدى. مۇندا ەندى اۋىل بالالارى كۇرەس, اۋىر اتلەتيكا, سپورتتىڭ باسقا دا تۇرلەرىمەن ەركىن اينالىساتىن بولادى.
سالتاناتتى ءراسىم قازاق كۇرەسىنەن باتىر بايان اتىنداعى رەسپۋبليكالىق جارىسقا ۇلاسىپ, وسىمەن ەكىنشى رەت ۇيىمداستىرىلعان اشىق تۋرنيرگە الاڭ يەلەرىمەن قاتار اقمولا, تۇركىستان, قاراعاندى وبلىستارىنان سايدىڭ تاسىنداي ىرىكتەلگەن پالۋاندار جينالدى. ولار 80 كيلودان جوعارى سالماق بويىنشا ءوزارا كۇش سىناسىپ, «تۇيە پالۋان» اتاعىن ساراپقا سالدى.
بوز كىلەمگە ءبىرىنشى بولىپ كوتەرىلگەن تۇركىستان وبلىسىنىڭ وكىلى ەرسۇلتان مۇزاپاروۆ سولتۇستىك قازاقستان وبلىسىنىڭ نامىسىن قورعاعان قارسىلاسىن تازا جىقتى. ول ەكىنشى بەلدەسۋىندە دە الاڭ يەسى الپىسوۆ دۋلاتتى ەركىن ۇتىپ, باس جۇلدەدەن ۇمىتكەرلەردىڭ ءبىرى ەكەنىن تانىتقان ەدى. الايدا 2014 جىلعى «قازاقستان بارىسى», ەكى دۇركىن الەم چەمپيونى مۇحيت تۇرسىنوۆتان جەڭىلىس تاپتى. مۇحيت شىعىستىڭ تۋماسى بولعانىمەن, بۇگىندە «قىزىلجار ارلاندارى» كۇرەس ورتالىعىندا جاتتىعادى. مۇحيتتىڭ الدىن ازيا جەڭىمپازى, حالىقارالىق دارەجەدەگى سپورت شەبەرى سەيتەن ايبات وراپ كەتتى. ول اقتىق بەلدەسۋدە م.جۇماباەۆ اۋدانىنىڭ پالۋانى اقجىگىت ورالوۆتىڭ وسال جەرىن ءدوپ باستى. بەلدەسۋ اياقتالۋعا ساناۋلى سەكۋندتار قالعاندا ونىڭ بوساڭسىعانىن پايدالانىپ, قاپى قالدىردى.
ءسويتىپ «ۇزىنكول» شارۋا قوجالىعىنىڭ جەتەكشىسى قانات ءالمۇراتوۆ باس جۇلدەگە تىككەن جەڭىل كولىكتى قانجىعاعا بايلادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
