اقۇلپەكتەردى تالىمباق ماماندارى جابايى تابيعاتقا بارىنشا بەيىمدەپ, ازىق تاۋىپ جەۋدى ۇيرەتىپ, ۇشىرىپ سالدى.
جۇمىرتقادان جارىپ شىققاندا قاۋىرسىن قاناتتارى ۇلپىلدەگەن اق بولاتىن جىرتقىش قۇستىڭ 6 ايلىق بالاپانى كۇنىنە كەمىندە ءبىر رەت قويان الادى ەكەن. تالىمباقتاعىلار ولاردى اڭعا تۇسۋگە ابدەن باۋلىعان. تابيعاتىنان ازاتتىقتى سۇيەتىن قۇستار شىمىر بولىپ شىعۋى ءۇشىن توبەسى بيىك, ءىشى كەڭ تورلاردا وسىرىلگەن.
ورايى كەلىپ تۇرعاندا 30 جىلدىق تاريحى بار «سۇڭقار» ورتالىعى – قازاقستانداعى جىرتقىش قۇستاردى وسىرەتىن جالعىز تالىمباق ەكەندىگىن ايتا كەتكەن ءجون. سوڭعى 5 جىلدا مۇندا 21 بۇركىت ەركىندىككە جىبەرىلگەن. الايدا ماماندارعا قۇستاردىڭ كەيىنگى ءومىرىن باقىلاۋ قيىندىق تۋعىزىپ وتىر. وعان قوسا, ەلىمىزدە ورنيتولوگتار سانى جەتىسپەيدى, دەيدى ورتالىق ديرەكتورى اشوت انزوروۆ.
– ءبىز كوپتەگەن ەلدەرمەن تاجىريبە الماسىپ, قۇستاردى دا ايىرباستاپ تۇرامىز. ولاردى ءتيىمدى كوبەيتۋ جولدارىن دا قاراستىرىپ ءجۇرمىز. وسىعان دەيىن زوولوگيا ينستيتۋتىندا ارنايى كافەدرا بولاتىن. قازىر ول جابىلىپ قالعان. تالىمباقتا جۇمىس ىستەيتىندەردىڭ ءبارى ءىس جۇزىندە مىقتى دەپ ايتا الامىن. قۇستاردىڭ سانىن كوبەيتۋدە بىلىكتىلىكتىڭ ماڭىزى زور, – دەيدى «سۇڭقار» ورتالىعىنىڭ ديرەكتورى اشوت انزوروۆ.
قازىرگى تاڭدا تالىمباقتا 500-دەن استام سۇڭقار مەن بۇركىت بار. ماماندار قازاقستاننىڭ ءار تۇكپىرىن مەكەن ەتەتىن قۇستاردىڭ 15-تەن استام ءتۇرىن باعادى. ولاردىڭ سانى وسىندا كوبەيتىلىپ, ساتىلادى, جوق تۇرلەرى الماستىرىلادى.
ءبىراز قاراجات پەن قولداۋدى قاجەت ەتەتىن جوبالارعا دەمەۋشىلەر اسا قاجەت. سوندىقتان «ەفەس قازاقستان» شس اق 2012 جىلى بۇركىتتەردى جابايى تابيعات اياسىنا جىبەرۋگا باعىتتالعان بىرەگەي عىلىمي سىناقتاردى قارجىلاندىرۋعا كىرىسكەن-ءدى. ناتيجەسىندە, جوعارىدا اتاپ وتكەندەي, سوڭعى 5 جىلدا ء«وز ۇلەسىڭدى قوس. تابيعاتتى ساقتاپ قال» اتتى الەۋمەتتىك باعدارلاماسى اياسىندا 21 بۇركىتتىڭ اقۇلپەگى جەتىلىپ, جابايى تابيعاتقا بەيىمدەلىپ, ۇشىرىلدى.
ايناش ەسالي,
«ەگەمەن قازاقستان»
الماتى
