سوڭعى جىلدارى ەلىمىزدەگى پەرزەنتحانالار جانىنان اشىلىپ جاتقان سيمۋلياتسيالىق ورتالىقتار دارىگەرلەردىڭ تاجىريبەلىك داعدىلارىن جەتىلدىرۋگە باعىتتالعان. وسىنداي تاعى ءبىر ورتالىق اتىراۋداعى قالالىق پەرزەنتحانادا جۇمىسىن باستادى. 15 ستانسادان تۇراتىن ورتالىقتا جاس دارىگەرلەرمەن بىرگە ۇزاق جىلعى ەڭبەك ءوتىلى بار ماماندار دا ءتۇرلى مانيپۋلياتسيالار جاسايدى. مىسالى, مەرزىمىنەن بۇرىن تۋىلعان سابيلەردى, بوسانعان ايەلدەردى رەانيماتسيالاۋدا, بوسانۋعا جاردەمدەسۋدە, تۋدى يميتاتسيالاۋدا قىزمەتكەرلەر ارنايى مەديتسينالىق مۋلياجداردى پايدالانادى.
وبلىستىق دەنساۋلىق ساقتاۋ باسقارماسىنىڭ باسشىسى مانشۇك ايمۇرزيەۆا روبوتتاردىڭ ادام اعزاسىنا بارىنشا جاقىنداتىلعان, ەموتسيالاردى بىلدىرە الاتىندىعىن, دىبىس شىعارىپ, سويلەيتىندىگىن ايتادى. «15 روبوتتاندىرىلعان ستانتسياعا 200-گە جۋىق جابدىق ساتىپ الىندى. سول ارقىلى ايماقتاعى مەديتسينالىق قىزمەتكەرلەردى تاجىريبەلىك داعدىلارعا وقىتىپ, جەدەل جاردەم كەلگەنگە دەيىن العاشقى كومەك كورسەتۋدە پارامەديكتەردى دايىنداۋدى ماقسات ەتتىك», دەيدى.
سيمۋلياتسيالىق ورتالىقتا 12 جاتتىقتىرۋشى-دارىگەر نەوناتولوگ, انەستەزيولوگ, رەانيماتولوگ, اكۋشەر-گينەكولوگ جۇمىس ىستەيدى. جىل سوڭىنا دەيىن وبلىستىڭ بارلىق مەديتسينالىق قىزمەتكەرلەرىن, 200 پارامەديتسينالىق ماماندى بىلىكتىلىك ارتتىرۋ كۋرستارىنان وتكىزۋ جوسپارلانعان.
جاڭا ورتالىقتىڭ جۇمىسىمەن تانىسقان وبلىس اكىمى نۇرلان نوعاەۆ وقۋ جاتتىعۋ ورنى تەك دارىگەرلەرگە عانا ەمەس, ءتۇرلى كاسىپتەگى ادامدارعا, ايتالىق پوليتسيا قىزمەتكەرلەرىنە, ءورت سوندىرۋشىلەرگە, دەنە شىنىقتىرۋ مۇعالىمدەرىنە, جاتتىقتىرۋشىلارعا جانە مەملەكەتتىك قىزمەتشىلەرگە دە پايدالى ەكەنىن اتاپ ءوتتى. ء«بىزدىڭ مىندەتىمىز – بارلىق دارىگەرلەردى ارقايسىسى ءوزىنىڭ ارنايى داعدىلارىن اۆتوماتتاندىرۋعا جەتكىزۋى ءۇشىن وسى ورتالىقتان وتكىزۋ. ماقساتىمىز – ادامي فاكتوردى ازايتۋ, وڭىردەگى بارلىق دارىگەرلەر ءوز سالاسىنىڭ مامانى بولۋى ءتيىس», دەپ تاپسىردى نۇرلان نوعاەۆ دەنساۋلىق ساقتاۋ باسقارماسىنىڭ باسشىسىنا.
مۇنداي ورتالىق اتىراۋ مەديتسينالىق كوللەدجىنىڭ جانىنان دا اشىلعان. وندا ستۋدەنتتەر بەس ستانسادا كومەك كورسەتۋ ءۇشىن تاجىريبەلىك داعدىلاردى جيناقتايدى.
اتىراۋدا انا مەن بالا دەنساۋلىعى ۇنەمى نازاردا بولعانىنا قاراماستان, پەرزەنتحانادا كوز جۇمۋ وقيعالارى ءالى دە بار. جاڭا سيمۋلياتسيالىق ورتالىق انا مەن بالا ءولىمىنىڭ كورسەتكىشىن نولدىك دەڭگەيگە جەتكىزۋگە سەپتىگىن تيگىزسە جاقسى.
باقىتگۇل باباش,
«ەگەمەن قازاقستان»
اتىراۋ
