ماكس اگيلەرا-حەللۆەگ, «نيۋ-يورك تايمس»
كەيد مەتس جانە ماكس اگيلەرا-حەللۆەگ, «نيۋ-يورك تايمس» – ۋالتەم, ماسساچۋسەتس
بۇل روبوت – SpotMini دەپ اتالادى. ونى جانۋارلار مەن ادامدار سياقتى قوزعالاتىن روبوت جاساۋمەن تانىلعان Boston Dynamics كومپانياسى قۇراستىردى. 1992 جىلى نەگىزى قالانعان كومپانيا جاڭا جىلدان باستاپ العاشقى كوممەرتسيالىق روبوت – SpotMini-ءدى ساۋداعا شىعارۋدى جوسپارلاپ وتىر.
ايتسە دە مۇنداي روبوتتاردى قانداي ماقساتتا پايدالانۋعا بولاتىنى بەلگىسىز. بىرنەشە جىلدان بەرى ادامدار Boston Dynamics كومپانياسىنا «بۇل بيزنەس پە, الدە زەرتتەۋ جۇمىسى ما؟» دەگەن سۇراقتى ۇزدىكسىز قويىپ كەلەدى.
ء«بىزدىڭ ويىمىزشا, مۇنداي تەحنولوگيانى ءتيىمدى قولدانا باستاۋعا مۇمكىندىك بار. الايدا, قازىر ونىڭ نەگىزگى قىزمەتى قانداي بولاتىنىن ناقتى شەشكەنىمىز جوق», دەيدى كومپانيانىڭ نەگىزىن سالۋشى مارك رايبەرت.
باسقا كومپانيالار روبوتتالعان اۆتوموبيلدەر, جولدار مەن قويما ەدەندەرىندە ەركىن قوزعالا الاتىن قۇرىلعىلار جاساۋمەن شۇعىلدانادى. ال جاپوندىق SoftBank كونگلومەراتىنا تيەسىلى Boston Dynamics تاۋ-تاستا, ورماندا قينالماي جۇرەتىن ماشينا قۇراستىرۋعا كىرىسىپ كەتتى.
قازىرگى تاڭدا جۇرگىزۋشىسىز باسقارىلاتىن كولىكتەر قولدانىسقا ەنبەي, دەربەس قوزعالاتىن روبوتتاردىڭ كۇنى الىس سەكىلدى. ويتكەنى ولاردىڭ ءالى دە كەمشىلىكتەرى بار. ولار كەدەرگىلەردى انىقتاۋ نەمەسە ورمەلەۋ سياقتى كەيبىر تاپسىرمالاردى ءوز بەتىنشە جاساعانىمەن, بەيتانىس جەرلەردە ءالى كۇنگە دەيىن ارنايى نۇسقاۋلىقتى قاجەت ەتەدى. انىعىن ايتقاندا, ولار ءجيى ءسۇرىنىپ, ءجيى قۇلاپ جاتادى.
م. رايبەرت سالماعى 75 كيلوگرامم, جۇگىرەتىن, سەكىرەتىن, ءتىپتى سالتو جاساي الاتىن انتوپومورفتى روبوت اتلاستى ەڭ ۇزدىك دەپ ەسەپتەيدى. الايدا, العاشقى سىناق كەزىندە ينجەنەر دجويستيكتى باسقاندا, روبوت ەدەنگە قۇلاپ ءتۇستى.
SpotMini روبوتىنىڭ ساتىلىم جوسپارى ءالى شيكى. ويتكەنى ونىڭ قۇنى اۆتوكولىكتىڭ باعاسىنان كەم ەمەس جانە روبوتتى قۇرىلىس كومپانيالارىنا ساتۋ كوزدەلگەن. م.رايبەرت مىرزا ولاردىڭ ويلى-قىرلى, ادامدارعا قاۋىپتى جەرلەردە زات تاسىمالداۋعا مۇمكىندىك بەرەتىنىن العا تارتادى.
تەحنولوگيا جەتىلگەن سايىن SpotMini جەتكىزۋ روبوتىنا نە دەربەس كۇزەتشىگە اينالۋى مۇمكىن.
وسىنىڭ بارىنە قاراماستان, Boston Dynamics-ءتىڭ باستاماسىنا قىزىعۋشىلىق تانىتىپ وتىرعاندار بار. ۇزاق ۋاقىت زەرتتەۋدى قاجەت ەتەتىن تەحنولوگياعا ساۋد ارابياسىنىڭ حانزاداسى موحاممەد بين سالمان 100 ميلليارد دوللار ينۆەستيتسيا سالىپ, كومپانيامەن سەرىكتەستىك ورناتتى.
جاپونيالىق عالىمدار روبوتتاردى نازاردان تىس قالدىرعان ەمەس. Google كومپانياسىنا تيەسىلى Schaft كومپانياسى Boston Dynamics سياقتى ماشينالاردى زەرتتەۋمەن اينالىسادى. ال Toyota زەرتتەۋ ينستيتۋتى جاپونيادا قارتتارعا قىزمەت كورسەتەتىن روبوتتار جاساۋمەن اينالىسىپ جاتىر.
مارك رايبەرت Boston Dynamics روبوتتارىن بيزنەس وكىلدەرىنە, ۇكىمەت پەن باسقا دا كليەنتتەرگە ساتقىسى كەلەدى. ادامدار مەن جانۋارلاردىڭ ارەكەتىن قايتالايتىن ماشينا جاسايتىن ول ءوزىن «تەمىرگە جان بەرۋشى» دەپ اتايدى. ونىڭ ماقساتى وسى ارقىلى اقشا تابۋ بولسا دا, عىلىمعا تيگىزەر كومەگى وراسان.
ارينە تاڭدانارلىق جايت. الايدا, روبوتتاردىڭ سالتو جاساۋعا قابىلەتتىلىگى ساتىپ الۋشىلاردى جيناي الا ما؟
ماقالانى اۋدارعان ءمادينا جالەلقىزى,
«ەگەمەن قازاقستان»
