قۇرمەتتى قازاقستان كاسىپورىندارى مەن كومپانيالارىنىڭ باسشىلارى!
مەملەكەت باسشىسى نۇرسۇلتان نازارباەۆ قازاقستان حالقىنا جولداۋىندا حالىقتىڭ ءال-اۋقاتىن جاقسارتۋدى باستى باسىمدىلىق ەتىپ بەلگىلەدى.
ءبىز, اقتوبە وبلىسىنىڭ ءىرى كاسىپورىندارى مەن كومپانيالارىنىڭ باسشىلارى, قازاقستاندىقتاردىڭ ءال-اۋقاتى ەڭ الدىمەن تابىستىڭ تۇراقتى وسۋىنە بايلانىستى ەكەنىن تولىق تۇسىنەمىز.
وسى ورايدا, ءبىز ەلباسىنىڭ جۇمىسشىلاردىڭ جالاقىسىن كوتەرۋ جونىندەگى باستاماسىن تولىعىمەن قولدايمىز.
تاۋ-كەن, مەتاللۋرگيا, مۇناي-گاز سالاسى, قۇرىلىس جانە اگروونەركاسىپ كەشەنى, جول-كولىك سەكتورى – ەلىمىزدىڭ ەكونوميكالىق قۋاتىنىڭ نەگىزى. تۇتاستاي ەكونوميكانىڭ جاڭا ساپالى سەرپىنىنىڭ الەۋەتى بۇل سالالاردا شوعىرلانعان.
پرەزيدەنت باستاماسىنىڭ ارقاسىندا اقتوبە وبلىسىنىڭ وزىندە عانا جۇزدەگەن مىڭ جۇمىسشىنىڭ ماتەريالدىق جاعدايىن جاقسارتۋعا مۇمكىندىك تۋىپ وتىر.
قازاقستاندىقتاردىڭ الەۋمەتتىك جاعدايى مەن ءومىر ءسۇرۋ ساپاسىن جاقسارتۋدىڭ ەرەكشە ماڭىزدىلىعىن ەسكەرە وتىرىپ, ءبىز ەلدەگى بارلىق كاسىپورىنداردىڭ قۇرىلتايشىلارى مەن باسشىلارىن ەلباسىنىڭ باستاماسىن قولداپ, 2019 جىلدىڭ 1 قاڭتارىنان باستاپ قىزمەتكەرلەردىڭ جالاقىسىن 10%-دان تومەن ەمەس دەڭگەيدە كوتەرۋگە شاقىرامىز.
بۇل وتانداستارىمىزدىڭ تابىسىن ارتتىرىپ قانا قويماي, ەڭبەك رەسۋرستارىنىڭ ونىمدىلىگى مەن ساپاسىنىڭ ەسەلەپ وسۋىنە قۋاتتى سەرپىن بەرەدى.
پرەزيدەنت اتاپ وتكەندەي, «تەك قانا بىرلەسكەن كۇش-جىگەرلەرىمىزبەن ءبىز ۇلكەن بيىكتەرگە جەتە الامىز», سول سەبەپتى ءبىزدىڭ ۇندەۋىمىزدى قازاقستاندىقتار تولىقتاي قولدايتىندىقتارىنا سەنىمدىمىز!
بىرىنشىدەن, ۇكىمەتكە 2019 جىلدىڭ 1 قاڭتارىنان باستاپ ەڭ تومەنگى جالاقىنى 1,5 ەسە, ياعني 28 مىڭنان 42 مىڭعا دەيىن ءوسىرۋدى تاپسىرامىن.
بۇل بارلىق سالا بويىنشا ءتۇرلى مەنشىك نىساندارىنداعى كاسىپورىنداردا جۇمىس ىستەيتىن 1 ميلليون 300 مىڭ ادامنىڭ ەڭبەكاقىسىن تىكەلەي قامتيدى.(جولداۋدان)
