سولاردىڭ ءبىرى– «Royal Palace» قوناق ءۇي جانە مەيرامحانا كەشەنى. 3,5 مىڭ شارشى مەتر اۋماقتى الىپ جاتقان ەكىقاباتتى ەڭسەلى عيماراتتى سالۋعا جەكە كاسىپكەر 600 ميلليون تەڭگە قاراجات جۇمساعان. بانكتەن الىنعان نەسيەنىڭ ءبىر بولىگى «بيزنەستىڭ جول كارتاسى – 2020» مەملەكەتتىك باعدارلاماسى ارقىلى «دامۋ» قورى كەپىلدەندىرگەن.
«نىساننىڭ ەكىنشى قاباتىندا اكىمشىلىك كەڭسەلەر جانە 600 ورىنعا شاقتالعان تويحانا بولادى. ونىڭ ءىشى تەحنيكالىق قۇرالدارمەن تولىق جابدىقتالىپ, 4 لەد ەكران قويىلادى. ال ءبىرىنشى قاباتىندا كاراوكە بار مەن قوناق ءۇي ورنالاسادى. بۇدان بولەك 150 ادامعا ارنالعان كىشى مەيرامحانا دا جۇرتشىلىققا قىزمەت كورسەتەدى. ارلەۋ جۇمىستارى تولىعىمەن اياقتالىپ, جيحازدار اكەلىنۋدە», دەيدى «جولانوۆ» جك جەتەكشىسى بەكەجان جولانوۆ.
«Green park» تاڭداۋلى وتباسىلىق پارك وتەلى دە كورشى ەلدەن كەلەتىن قوناقتاردى قارسى الۋعا تاس-ءتۇيىن دايىن. ءسان-سالتاناتى كەلىسكەن 9 ءۇي 120-200 ادامدى قابىلداي الادى. مۇندا wifi جەلىسى جۇمىس ىستەيدى. بيىل قوسىمشا 2,5 مىڭ شارشى مەتر جول توسەلىپتى. وسىنداعى حايۋاناتتار باعىنا ەكى مارال مەن ەكى قابان اكەلىنىپتى. ەندى 3 مونشا, جىلىتىلاتىن باسسەيىن ىسكە قوسىلادى.
وسى نىساننىڭ اۋماعىندا تاعى ءبىر مەيرامحانا تۇرعىزىلۋدا. ونىڭ ءبىرىنشى قاباتىندا 150, ەكىنشى قاباتىندا 300 ادام تىنىعا الادى. وسىدان 34 جىل بۇرىن پايدالانۋعا بەرىلگەن «ەسىل» مەيرامحاناسى دا كۇردەلى جوندەۋدەن ءوتىپ, ادام تانىماستاي كەيىپكە ەنگەن.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
