قوستانايعا كەلگەن قوعامدىق دامۋ ءمينيسترى دارحان كالەتاەۆ الدىمەن وبلىس اكتيۆىمەن كەزدەستى. ول ەلباسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىنىڭ فورماتى دا, ساپاسى دا ەرەكشە, جاڭا ەكەنىن اتاپ ءوتتى. تاريحي قۇجاتتا ەلباسى ەكونوميكانى دامىتىپ, الەۋمەتتىك سالانى نىعايتۋ ءۇشىن بانكروتتىق ءتارتىبىن جەڭىلدەتۋ, جەرگىلىكتى ماڭىزعا يە حابتاردى دامىتۋ, باسقارىلاتىن ۋربانيزاتسيانى ەنگىزۋ سەكىلدى ماسەلەلەردى دەر ۋاقىتىندا ءارى ورىندى كوتەردى.
دارحان كالەتاەۆ جولداۋدا ايتىلعان مۇعالىمدەر مارتەبەسى ماسەلەسىنە ەرەكشە توقتالدى. ول تۋرالى زاڭنىڭ قابىلدانۋىنا وراي ۇسىنىستار ەنگىزۋ ءۇشىن قوستانايلىقتاردى بەلسەندى بولۋعا شاقىردى. سونىمەن قاتار مينيستر جولداۋدا ايتىلعان جاستار ماسەلەسىنە وراي, ەلىمىزدە ارنايى جاستارعا ارنالعان باعدارلامانىڭ بولمايتىنىن ەسكەرتتى. سەبەبى ەلىمىزدە جۇزەگە اسىرىلىپ جاتقان باسپانا, جۇمىسقا ورنالاستىرۋ, ءبىلىم جونىندەگى مەملەكەتتىك باعدارلامالاردىڭ بارلىعى دا جاستار ماسەلەسىن شەشۋگە ارنالادى. ءمينيستردىڭ ايتۋىنشا, قازىر ەلىمىزدە جاستار دەموگرافياسىنىڭ تومەندەپ كەتكەنى بايقالادى, 14 پەن 18 جاس ارالىعىنداعىلاردىڭ سانى جارتى ميلليونعا زورعا جەتەتىنى 2000-شى جىلدارداعى بالا تۋ سانىنىڭ تومەن بولۋىمەن تۇسىندىرىلەدى. بۇل كورسەتكىش الداعى جىلدارى كوتەرىلەدى.
اكتيۆكە قاتىسۋشىلار مينيسترگە جاستار اراسىنان كادرلار دايىنداۋ, ۇكىمەتتىك ەمەس ۇيىمدارعا ارنالعان مەملەكەتتىك ساتىپ الۋ, قوعامدىق كەڭەستەر ماسەلەسى تۋرالى سۇراقتار قويىپ, جاۋاپ الدى.
وبلىس اكىمى ارحيمەد مۇحامبەتوۆ اكتيۆ وتىرىسىن قورىتىندىلاي كەلە, ەلباسى جولداۋىنداعى ايتىلعان تاپسىرمالاردى جۇزەگە اسىرۋدىڭ وڭىرلىك جوسپارى قارالىپ جاتقانىن جانە اۋداندار مەن قالالاردا جولداۋدى تۇسىندىرۋمەن اينالىساتىن 21 اقپاراتتىق توپ قۇرىلىپ, جۇمىستى باستاپ كەتكەنىن ايتتى.
ءنازيرا جارىمبەت,
«ەگەمەن قازاقستان»
قوستاناي
