ياعني, وڭىردە وتكىزىلگەن بالالار جىلى جالپى رەسپۋبليكالىق جاستار جىلىنا جالعاسىپ جاتسا, مۇنىڭ ءوزى ءبىر مەرەي.
پرەزيدەنتتىڭ قازاقستاندىقتارعا ارناعان جولداۋىندا بالالارعا ساپالى ءبىلىم مەن تاربيە بەرۋ ءىسى مەكتەپكە دەيىنگى مەكەمەلەردەن باستاۋ الاتىنى ايتىلعان. سوعان سايكەس مەكتەپكە دەيىنگى ءبىلىم ساپاسى تۇبەگەيلى جاقسارۋى كەرەك. باستى باعىت وسىنداي. ەلباسى ماسەلەنى نەگە بۇلايشا قويىپ وتىر؟ ونىڭ جاۋابى دا ىلە-شالا كورسەتىلگەن. ويتكەنى ويلاۋ نەگىزدەرى, اقىل-وي مەن شىعارماشىلىق قابىلەتتەر, جاڭا داعدىلار بالا كەزدەن قالىپتاسادى دەپ وي تۇيەدى مەملەكەت باسشىسى. اينا-قاتەسىز شىندىق. «بۇلاق كورسەڭ, كوزىن اش» دەگەن دانالىق ءسوز بار. پرەزيدەنت قويعان تالاپتار مەن مىندەتتەر قازىرگى وزىق تەحنولوگيالاردى قولدانا وتىرىپ, بالالاردىڭ بويىنداعى قابىلەت پەن تالانت شوعىن ودان ءارى ۇرلەي تۇسۋگە ۇندەيدى. وسىنداي وڭ باستامالار اقتوبە وبلىسىندا بيىلعى جىلدىڭ باسىنان باستالىپ كەتكەن ەدى. ياعني, بۇعان جوعارىدا ايتىپ وتكەنىمىزدەي, بيىلعى جىلدىڭ وبلىستا بالالار جىلى دەپ جاريالانىپ, سوعان سايكەس ءىرى ءارى جان-جاقتى اۋقىمداعى «باقىتتى بالا» جوباسى ويداعىداي جۇزەگە اسقانى ايقىن ايعاق.
وبلىس مەكتەپتەرىندە «باقىتتى بالا» جوباسى اياسىندا مودەلدەۋ, ساۋلەت, ديزاين, انيماتسيا, ۆەب-سايت باعدارلامالارى بويىنشا ءبىلىم بەرەتىن IT-سىنىپ اشىلدى. ءارى ءبىلىم بەرۋ مەكەمەلەرى ينتەراكتيۆتى قۇرالدار – پرينتەرلەر, روبوت تەحنيكاعا ارنالعان جيىنتىقتار, سونىمەن بىرگە ۋلتراقىسقا فوكۋستى پروەكتورلارمەن جابدىقتالدى. بۇل ءۇشىن وبلىستىق بيۋدجەتتەن 68 ميلليون تەڭگە بولىنگەن. اۋدانداردا بۇل زاماناۋي ءىس دەمەۋشىلەردىڭ كومەگىمەن اتقارىلعان. وبلىس پەداگوگتارىنىڭ روبوت تەحنيكا بويىنشا بىلىكتىلىگىن ارتتىرۋ كۋرسىنان وتۋىنە دە «باقىتتى بالا» جوباسىنىڭ تيگىزگەن سەپتىگى مول. بۇگىنگى كۇنى بۇل باعىتتا مەكتەپتەردىڭ جانىنان ارنايى ۇيىرمەلەر اشىلعان. بۇل جونىندە گازەت تىلشىسىنە اقتوبە وبلىستىق ءبىلىم باسقارماسى باسشىسىنىڭ ورىنباسارى گۇلناز سۇلەيمەنوۆا اڭگىمەلەپ بەردى.
سەگىز باعىت بويىنشا جۇزەگە اسىرىلعان قاناتقاقتى جوبانىڭ اۋقىمى مەيلىنشە كەڭ. بۇعان مىسالدار جەتكىلىكتى. ايتالىق, وسى شەڭبەردە قوسىمشا ءبىلىم بەرۋدى دامىتۋ, «مەكتەپ. وتباسى. قوعام», «سالاماتتى بولاشاق» جانە «كەدەرگىسىز ءبىلىم» اتتى باعىتتاردىڭ ىسكە اسقانى جوبا مارتەبەسىن بيىكتەتە تۇسەدى. ونىڭ قاي-قايسىسى دا جاس ۇرپاقتىڭ الەۋەتىن كوتەرۋ مەن «ماڭگىلىك ەلدىڭ» بولاشاعىن قالىپتاستىرۋعا كومەگىن تيگىزە الارى ايان. بۇل رەتتە جوبا اياسىندا جۇزەگە اسقان «اسەم» وقۋ-تانىمدىق ورتالىعىندا بالالاردىڭ ءوسىپ-وركەندەۋى مەن دامۋىنا بارلىق قاجەتتى جاعدايلار جاسالعانىن ايتقان ءجون. وبلىسقا ساپارى كەزىندە مەملەكەت باسشىسى نۇرسۇلتان نازارباەۆ «ارتەك» ۇلگىسىندە جىل بويى جۇمىس ىستەيتىن بالاماسى جوق بالالار مەكەمەسىنىڭ قىزمەتىمەن تانىسىپ, وڭ باعا بەرگەنى دە ءبىر مارتەبە.
جوبا اياسىندا بيىلعى جىلى وقۋشىلاردىڭ جازعى دەمالىسىن ۇيىمداستىرۋ ىسىنە دە سونى سيپات بەرىلىپ, جاڭاشا كوزقاراس قالىپتاستى. سونىڭ ناتيجەسىندە وڭىردەگى مەكتەپ وقۋشىلارىنىڭ 95 پايىزى جازعى دەمالىسپەن قامتىلدى. بۇل ءۇشىن جەرگىلىكتى بيۋدجەتتەن 282 ميلليون تەڭگە قاراجات ءبولىندى. «باقىتتى بالا» جوباسىنىڭ ءبىر باعىتى كەدەرگىسىز ءبىلىم دەگەن اتاۋدى يەلەنگەن.
مۇنداعى باستى ماقسات – مۇمكىندىگى شەكتەۋلى بالالارعا قولايلى جاعدايلار تۋعىزۋ, ولاي بولسا, ونىڭ ەرەكشە تەتىگى قالىپتاسا العانى دا انىق. ءارى ونى «قازاقستان كەدەرگىسىز ايماققا اينالۋى كەرەك» دەگەن پرەزيدەنت تاپسىرماسىنىڭ وڭىردە تياناقتى تۇردە ورىندالۋىنىڭ باستى كورىنىسى دەپ باعالاعانىمىز ءجون. بۇل باعىتتا «نەكتار» ارنايى تۇزەۋ بالاباقشاسى مەن تمد ەلدەرى اراسىندا بالاماسى جوق «كۇنشۋاق» ساۋىقتىرۋ ينكليۋزيۆتى بالالار لاگەرى ەڭسە تىكتەدى. مۇندا مۇمكىندىگى شەكتەۋلى بالالار التى اۋىسىمدا تىنىعا الادى. وڭىردە ينكليۋزيۆتى ءبىلىم بەرۋ جۇيەسى ەنگىزىلگەن ءبىلىم ورىندارى سەنسورلى ۇيشىكپەن جابدىقتالعان. سونىمەن بىرگە اۋتيزم دەرتىنە شالدىققان بالالارعا ارنالعان ورتالىقتىڭ اشىلۋىنا دا شاپاعاتى مول جانداردىڭ تيگىزگەن كومەگى مول. جوبا اياسىندا اسا اۋىر دەرتكە شالدىققان بالالار تەگىن ەمدەلۋگە مۇمكىندىك الدى. ءارى شەتەلدەن اقتوبەگە ارنايى كەلگەن دارىگەرلەر ناۋقاس بالالارعا تەگىن وپەراتسيا جاسادى.
ءبىز – جەتىمىن جىلاتپاعان, جەردە قالدىرماعان, ونى جەبەپ, كولەڭكەسىمەن قورعاي جۇرگەن حالىقتىڭ ۇرپاعىمىز. وسى ساحي مىنەزىمىز بەن ءبىتىم-بولمىسىمىز «باقىتتى بالادان» تاعى ءبىر كورىنىس تاپقانداي كۇي كەشتىك. بۇعان وبلىستاعى 100-گە جۋىق جەتىم بالانىڭ باسپانالى بولۋى كۋا. سونداي-اق بۇدان باسقا اتا-اناسىنىڭ قامقورلىعىنسىز قالعان بالالاردىڭ ەسەپشوتتارىنا 80 ميلليون تەڭگە اۋدارىلعانىن قايدا قويارسىز. وسىنداي ساۋابى مەن شۋاعى مول ىستەر وڭىردە ودان ءارى جالعاسا بەرمەك.
سونىمەن بىرگە قاناتقاقتى جوبا ايماقتا 177 سپورت, ويىن الاڭدارىنىڭ اشىلۋىنا نەگىز قالادى. سونىڭ ىشىندە 4 ءىرى جوبا فيفا-نىڭ حالىقارالىق ستاندارتتارىنا سايكەس كەلەدى. مۇنىڭ سىرتىندا ەلىمىزدە تەڭدەسى جوق سوڭعى ۇلگىدەگى فۋتبول-جاتتىعۋ كەشەنى, باتۋت ورتالىعى, اشىق اسپان استىنداعى «كيىز ءۇي ساياباعى», وتباسىلىق دەمالىس ورتالىعى مەن اكۆاپارك تە بالالارعا جاسالعان باعا جەتپەس تارتۋ مەن سىي ەكەنى انىق. جوبا اياسىندا جۇزەگە اسقان سان الۋان ىستەر مەن شارالار تەك مۇنىمەن شەكتەلمەيدى. بۇل ايتىلعاندار سونىڭ تەك ءبىر بولىگى عانا. جالپى, جوباعا 4,5 ميلليارد تەڭگە بولىنگەنى ونىڭ اياسى كەڭ بولعانىن كورسەتەدى. كاسىپكەرلەر مەن دەمەۋشىلەر كورسەتكەن قوماقتى قارجىلاي كومەك بۇل ەسەپكە كىرمەيدى.
– «باقىتتى بالا» – ەل وڭىرلەرى بويىنشا تۇڭعىش رەت جۇزەگە اسقان ءىرى دە بىرەگەي, كەڭ اۋقىمدى جوبا. تەاتر كيىمىلگىشتەن باستالسا, ادامي كاپيتالدىڭ ساپاسىن كوتەرۋ ءىسى العاشقى كەزەكتە بالالاردىڭ جان-جاقتى ءوسىپ-جەتىلۋىنە قامقورلىق تۋعىزۋدان باستالادى. بۇل تۇرعىدا اقتوبە وبلىسىنىڭ اكىمى بەردىبەك ساپارباەۆ باستاماشى بولىپ, تىكەلەي قولداۋ كورسەتكەن قاناتقاقتى جوبانىڭ ەلىمىزدىڭ وزگە وڭىرلەرىندە دە جالعاسىن تاپقانىن قالايمىز, – دەدى جوبانىڭ قورىتىندى جيىنى كەزىندە ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا.
ءبىز وسى ويلى پىكىرمەن بۇگىنگى ماتەريالىمىزدىڭ نۇكتەسىن قويعاندى ءجون كورەمىز.
تەمىر قۇسايىن,
«ەگەمەن قازاقستان»
اقتوبە
