ن.نىعماتۋلين مارتەبەلى مەيمانعا ماڭىزدى جيىنعا قاتىسىپ, مازمۇندى بايانداما جاساعانى ءۇشىن العىسىن جەتكىزدى. جانە وسى كونفەرەنتسيادا ايتىلعان پىكىرلەر, ازىرلەنگەن ۇسىنىمدار قاتىسۋشى ەلدەردىڭ الداعى بىرلەسكەن جۇمىسىنا سەرپىن بەرەتىنىنە سەنىم ءبىلدىردى.
پالاتا سپيكەرى اتاپ وتكەندەي, قازاقستان پارلامەنتى حالىقتىڭ قونىستانۋى جانە دامۋى جونىندەگى ازيا پارلامەنتاريلەرى فورۋمى جۇمىسىنا بەلسەنە قاتىسادى. «ينۆەستيتسيا – جاستارعا!» كونفەرەنتسياسى وسى بىرلەسكەن جۇمىستىڭ ناتيجەسى.
اڭگىمە بارىسىندا جاستار ماسەلەسىنە ايرىقشا نازار اۋدارىلدى. ن.نىعماتۋليننىڭ سوزىنشە, قازاقستان پرەزيدەنتى نۇرسۇلتان نازارباەۆ ءاربىر جولداۋىندا, ءاربىر ماڭىزدى باستامالارىندا ەڭ الدىمەن جاستار ماسەلەسىنە باسىمدىق بەرەدى. بۇل – مەملەكەتتىك ساياساتتىڭ ماڭىزدى بولىگى.
ءوز كەزەگىندە ياسۋو فۋكۋدا قازاقستانداعى جاستار ساياساتىن ەرەكشە قولدايتىنىن, ولار ەل دامۋىنىڭ ىرگەتاسى بولا الاتىنىن ايتتى. جانە ءبىزدىڭ ەلىمىزدە جاستاردى جان-جاقتى قولداۋدىڭ مۇمكىندىگى زور ەكەنىن العا تارتىپ, وسى سالادا ىنتىماقتاستىقتى دامىتۋعا دەگەن ىنتا-ىقىلاسىن ءبىلدىردى.
ودان ءارى تاراپتار ەكىجاقتى قارىم-قاتىناستى, سونىڭ ىشىندە, پارلامەنتارالىق بايلانىستى نىعايتۋ جايىن ءسوز ەتتى.
ايتا كەتسەك, بيىل ەكى ەل اراسىندا ديپلوماتيالىق قاتىناستىڭ ورناعانىنا 25 جىل تولدى. وسى ۋاقىت ىشىندە استانا مەن توكيو ءبىر-بىرىنە تىعىز قولداۋ كورسەتە وتىرىپ, سەنىمدى ارىپتەستەر بولىپ كەلەدى.
ءماجىلىس توراعاسىنىڭ ايتۋىنشا, يادرولىق قارۋسىزدانۋ جانە تاراتپاۋ, اتوم ەنەرگياسىن بەيبىت ماقساتتا پايدالانۋ, باسقا دا حالىقارالىق وزەكتى ماسەلەلەر بويىنشا ءبىزدىڭ ەلدەرىمىزدىڭ ۇستانىمى وتە جاقىن.
وسى رەتتە يا.فۋكۋدا قازاقستان پرەزيدەنتىنىڭ حالىقارالىق باستامالارىن ەرەكشە باعالايتىنىنا جانە ءبىزدىڭ ەلىمىزدىڭ جوعارى دامۋ دەڭگەيىنە جەتۋىندە مەملەكەت باسشىسىنىڭ ءرولى زور ەكەنىنە توقتالدى.
كەزدەسۋ يەلەرى بارلىق سالادا ىقپالداستىقتى كۇشەيتۋ جولدارىن تالقىلاي كەلىپ, ورتاق ماقسات جولىندا بىرلەسە اتقارعان جۇمىستار ءبىزدىڭ ەلدەرىمىزدىڭ ءوزارا ءتيىمدى جانە كوپقىرلى ارىپتەستىگىن تەرەڭدەتەتىنىنە سەنىم ءبىلدىردى.
سونداي-اق وسى كونفەرەنتسيا اياسىندا ءماجىلىس توراعاسى نۇرلان نىعماتۋلين قىرعىز رەسپۋبليكاسى جوگوركۋ كەنەشى توراعاسىنىڭ ورىنباسارى ميرلان باكيروۆ, سونىمەن بىرگە وزبەكستان ولي ءماجليسى زاڭ شىعارۋشى پالاتاسى توراعاسىنىڭ ورىنباسارى بوري اليحانوۆ باستاعان دەلەگاتسيا وكىلدەرىن قابىلداپ, ەلدەر اراسىنداعى قارىم-قاتىناستى دامىتۋدىڭ وزەكتى ماسەلەلەرىن ورتاعا سالدى.
