پالاتا سپيكەرى «ەلەكتروليز» زاۋىتىندا بولىپ, كاسىپورىننىڭ جۇمىسىمەن تانىسىپ, ءىرى ونەركاسىپ نىساندارىنا باردى. وندىرىستىك قۋاتى جىلىنا 250 مىڭ توننا ءونىم وندىرەتىن زاۋىت اليۋميني, تەحنولوگيالىق اليۋميني قۇيمالارىن شىعارادى. ىشكى نارىقتان باسقا, ونىمدەر الەمنىڭ 20-دان استام ەلىنە, سونىڭ ىشىندە رەسەي, بەلارۋس, وزبەكستان جانە ەۋروپا ەلدەرىنە جونەلتىلەدى.
جىلدان-جىلعا وندىرىستىك قۋاتىن ارتتىرىپ كەلە جاتقان زاۋىتتىڭ اشىلۋىنا ون جىل بۇرىن مەملەكەت باسشىسى نۇرسۇلتان نازارباەۆ ءوزى باستاماشى بولعان. سوندىقتان ەلباسىنىڭ بارلىق باستامالارى زاۋىت ۇجىمى تاراپىنان ەرەكشە قولداۋ تابادى. كاسىپورىننىڭ قىزمەتكەرلەرى پرەزيدەنتتىڭ باستامالارىنا بەلسەندى تۇردە ءوز ۇلەستەرىن قوسۋعا دايىن. ن.نىعماتۋلين الداعى ۋاقىتتا وڭدەۋشى ونەركاسىپتى قولداۋعا ەرەكشە نازار اۋدارىلاتىنىن, سونداي-اق جاڭا تەحنولوگيالاردى دامىتۋعا زور كوڭىل بولىنگەنىن ايتتى.
ءماجىلىس توراعاسى ودان ءارى جولداۋدىڭ باسىم باعىتتارىنا توقتالا كەلىپ, ول بۇكىل حالىقتىڭ, ءاربىر شاڭىراقتىڭ, ءاربىر ازاماتتىڭ جاعدايىن جاقسارتۋعا ارنالعانىن اتاپ ءوتتى. وندا ەڭ الدىمەن الەۋمەتتىك سالانىڭ ماڭىزدى مىندەتتەرى, وتباسى, تۇرعىن ءۇي, شاعىن بيزنەس, ەڭبەكاقى, جاستار, اۋىل شارۋاشىلىعى, قۇقىق قورعاۋ جۇيەسىن جاڭعىرتۋدىڭ جولدارى كورسەتىلدى. ەڭ باستىسى, ولاردىڭ بارلىعى ورىندالاتىن, ناقتى جانە قاجەتتى ماقساتتار.
وسىنداي ناقتى جوسپارعا قۇرىلعان, حالقىمىزدىڭ, ەلىمىزدىڭ يگىلىگىن كوزدەيتىن, ءىرى ىستەرگە جول اشاتىن جولداۋدى ورىنداۋعا بەلسەنە قاتىسۋ ءاربىر ازاماتتىڭ ابىرويلى مىندەتى ەكەنىن ايتقان ن.نىعماتۋلين بۇل دەپۋتاتتىق كورپۋستىڭ زاڭ شىعارۋ جۇمىسىنىڭ دا ەڭ نەگىزگى باعىتى ەكەنىن اتاپ ءوتتى.
ودان ءارى ءماجىلىس توراعاسى «جاستار باستامالارىن دامىتۋ ورتالىعىنداعى» جاستارمەن كەزدەستى. ورتالىق بەس جىلدىڭ ىشىندە كوپتەگەن شىعارماشىلىق يدەيالار مەن جاڭا جوبالاردى جۇزەگە اسىردى. سونىمەن بىرگە ورتالىقتان جۇمىسپەن قامتۋ, قۇقىقتىق جانە پسيحولوگيالىق قولداۋ كورسەتۋ مەن مەملەكەتتىك تۇرعىن ءۇي باعدارلامالارى جانە جاستار كاسىپكەرلىگى تۋرالى اقپاراتتار الۋعا بولادى.
بولاشاق ەكونوميكاسىنىڭ جاڭا تەحنولوگيالارى, شاعىن جانە ورتا بيزنەستىڭ دامۋى, جاستارعا الەۋمەتتىك قولداۋ كورسەتۋ – جولداۋداعى وسى باعىتتاردىڭ بارلىعى جاس بۋىنعا جاقىن جانە تۇسىنىكتى. سوندىقتان ولارعا جاڭا قادامدار جاساۋعا مۇمكىندىك بەرەدى.
ءماجىلىس توراعاسى جاستارمەن كەزدەسۋدە ەلباسىمىز نۇرسۇلتان ءابىش ۇلى نازارباەۆ ارقاشاندا جاستار ماسەلەسىنە ەرەكشە نازار اۋدارىپ كەلە جاتقانىن ايتتى. پالاتا سپيكەرى سونداي-اق ەلباسىنىڭ جولداۋىنداعى باسىمدىقتارعا توقتالىپ, بۇل جاستاردى جانە وتباسى ينستيتۋتىن جان-جاقتى قولداۋعا باعىتتالعانىن, 2019 جىلدىڭ «جاستار جىلى» دەپ جاريالانعانىن اتاپ كورسەتتى.
ءوز سوزىندە ن.نىعماتۋلين:
– كەلەسى جىل – سىزدەر ءۇشىن ماڭىزدى, ماعىنالى جانە قىزىقتى وقيعالارعا تولى جىل بولاتىنى ءسوزسىز. ونىڭ بارلىعى جاستاردىڭ قوعامداعى ءرولىن ارتتىرۋعا, الەۋمەتتىك جاعدايىن كوتەرۋگە, ءتيىمدى ەڭبەكپەن اينالىسۋعا جاڭا سەرپىن بەرەتىن بولادى, – دەدى.
ەلباسىمىزدىڭ جاڭا تەحنولوگيالارعا, يننوۆاتسياعا جانە اۆتوماتتاندىرۋعا زور ءمان بەرگەنىن ايتقان پالاتا سپيكەرى وسى جولدا جاستاردىڭ شىعارماشىل يدەيالارى بارلىق رەفورمالاردى ءتيىمدى جۇزەگە اسىرۋ ءۇشىن وتە قاجەت ەكەنىن اتاپ ءوتتى.
كەزدەسۋ بارىسىندا نۇرلان نىعماتۋلين جاستاردىڭ سۇراقتارىنا جاۋاپ بەرە كەلىپ, ەلباسى قويعان اۋقىمدى مىندەتتەردى جۇزەگە اسىرۋ ءۇشىن بارلىق جاستىڭ بەلسەنە قاتىسۋى كەرەكتىگىنە توقتالدى. ال ءوز كەزەگىندە پارلامەنت ەلباسى جولداۋىن زاڭنامالىق تۇرعىدان قامتاماسىز ەتۋدىڭ بارلىق ءىس-شارالارىن قولعا الا وتىرىپ, سايلاۋشىلاردىڭ كەزدەسۋ بارىسىندا ايتقان ۇسىنىس-پىكىرلەرىن ەسەپكە الاتىن بولادى.
فاريدا بىقاي,
«ەگەمەن قازاقستان»
پاۆلودار
