وقۋ ورداسىنداعى ءىس-شاراعا 2007 ج. نوبەل سىيلىعىنىڭ لاۋرەاتى رادجەندرا كۋمار پاچاۋري, پۋترا ۋنيۆەرسيتەتىنىڭ (مالايزيا) كوممۋنيكاتسيالىق تەحنولوگيالار جانە جەلى كافەدراسىنىڭ, كومپيۋتەرلىك عىلىمدار جانە اقپاراتتىق تەحنولوگيالار فاكۋلتەتىنىڭ پروفەسسورى موحامەد بين وتمان قۇرمەتتى قوناق بولىپ قاتىستى.
ەسەنوۆ وقۋلارى "رۋحاني جاڭعىرۋ" باعدارلاماسىنىڭ مىندەتتەرىن جۇزەگە اسىرۋ اياسىندا وتكىزىلەدى. ستۋدەنتتەر مەن جاس عالىمدار ءۇشىن "تسيفرلىق قازاقستان: اقپاراتتىق جۇيەلەر جانە ەنەرگەتيكا", "كاسپي كونۆەنتسياسى: ايماقتىڭ ساياسي-قۇقىقتىق دامۋ ۇردىستەرى" جانە ت.ب. تاقىرىپتار بويىنشا عىلىمي-تاجىريبەلىك كونفەرەنتسياسى, سونىمەن قاتار ۋنيۆەرسيتەت ستۋدەنتتەرى ءۇشىن "Yessenov University ۇزدىك ستارتاپ جوباسى" بايقاۋى وتەدى.
شارا بارىسىندا Yessenov University رەكتورى بەرىك احمەتوۆ ايماق باسشىسىنا جانە قوناقتارعا اۋدارىلمالى سىنىپ تەحنولوگياسىن تانىستىردى. بۇل وقۋ ورنىنىڭ ستۋدەنتتەرى دارىستەرگە كەلمەي, بارلىق ساباقتاردى ينتەرنەتتەگى ارنايى ارنادان كورە الادى. ءدارىستىڭ ورنىنا ولار سەمينارلارعا قاتىسىپ, ءۇي تاپسىرمالارىن تاجىريبە جۇزىندە ورىنداي الادى.
سونىمەن قاتار, قوناقتار سيتۋاتسيالىق ورتالىقتى ارالاپ كوردى. وعان ستۋدەنتتەردىڭ ساباققا قاتىسۋى تۋرالى, ولاردىڭ ۇلگەرىمى تۋرالى بارلىق اقپارات شىعارىلادى ءارى وقۋ ورنىنىڭ بارلىق عيماراتى بويىنشا ورناتىلعان 400 كامەرانىڭ كومەگىمەن ۋنيۆەرسيتەتتىڭ قاۋىپسىزدىگى بويىنشا جاعداي باقىلانادى.
"I حالىقارالىق ەسەنوۆ وقۋلارىنىڭ" ەكىنشى كۇنى مۇنايشى-گەولوگ حالەل وزبەكعاليەۆتىڭ 90 جىلدىعىنا ارنالعان كىتاپتىڭ تۇساۋكەسەرى جانە "Yessenov University ۇزدىك جاس عالىمى "اتتى بايقاۋ وتەدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
