قازاقستان • 18 قازان، 2018

يليا تەرەنچەنكو «نۇر وتان» پارتياسىنىڭ حاتشىسى بولىپ تاعايىندالدى

290 رەتكورسەتىلدى

«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ Facebook الەۋمەتتىك جەلىسىندەگى پاراقشاسىندا يليا تەرەنچەنكونىڭ «نۇر وتان» پارتياسىنىڭ حاتشىسى بولىپ تاعايىندالعانىن حابارلادى.

بۇگىن «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ورتالىق اپپارات ۇجىمىنا پارتيانىڭ جاڭا حاتشىسىن تانىستىردى. ماۋلەن اشىمباەۆ يليا تەرەنچەنكونىڭ جەتەكشىلىگىمەن پارتيانىڭ پاۆلودار وبلىستىق فيليالى ناتيجەلى جۇمىس ىستەگەنىن ەرەكشە اتاپ ءوتتى. سونداي-اق ول ەلباسى جولداۋىندا ايتىلعان باسىمدىقتار مەن پارتيا قىزمەتىن جاڭعىرتۋ اياسىنداعى باستامالاردى جۇزەگە اسىرۋعا جاڭا حاتشىنىڭ ۇلكەن ۇلەس قوساتىنىنا سەنىم ءبىلدىردى. «پارتيامىزدىڭ پاۆلودار وبلىستىق فيليالى سوڭعى كەزدەرى بارلىق تاپسىرمالاردى ورىنداۋدا جاقسى قىرىنان كورىنىپ كەلەدى. ءتىپتى ونى ەلىمىز بويىنشا جەتەكشى فيليالداردىڭ ءبىرى دەپ ايتۋعا تولىق نەگىز بار. بۇل - ارينە، يليا تەرەنچەنكونىڭ ەڭبەگىنىڭ جەمىسى. سوندىقتان ونىڭ حاتشى بولىپ تاعايىندالۋى پارتياداعى مەريتوكراتيا ءتاسىلىنىڭ ناقتى جۇمىس ىستەيتىنىن كورسەتەدى. الداعى ۋاقىتتا دا وسىلاي وزىنە جۇكتەلگەن مىندەتتەردى مۇلتىكسىز ورىنداعان ماماندارىمىزعا قولداۋ كورسەتۋ ءىسى جالعاساتىن بولادى. ويتكەنى ءبىز ءوز ماماندارىمىزدىڭ قىزمەتتە وسۋىنە مۇددەلىمىز. سول سەبەپتى پارتيانىڭ كادرلىق رەزەرۆىن قالىپتاستىرۋ ىسىنە دە ۇلكەن ءمان بەرىپ وتىرمىز»، - دەدى ماۋلەن اشىمباەۆ.

سونىمەن قاتار ول پارتيانىڭ الدىندا ەلباسىنىڭ جولداۋدا ايقىنداپ بەرگەن باسىمدىقتارى مەن باسقا دا مەملەكەتتىك ماڭىزدى باعدارلامالاردى جانە پارتيا قىزمەتىن جاڭعىرتۋ اياسىندا قولعا الىنعان جوبالاردى جۇزەگە اسىرۋ مىندەتتەرى تۇرعانىن ايتىپ، وسى ىستە جاڭا حاتشىعا ۇلكەن جاۋاپكەرشىلىكتەر جۇكتەلەتىنىنە نازار اۋداردى. ءوز كەزەگىندە، يليا تەرەنچەنكو بۇل قىزمەتتى ەلباسى مەن بارشا نۇروتاندىقتاردىڭ ۇلكەن سەنىمى رەتىندە قابىلدايتىنىن ايتتى. «العاش پارتيا قاتارىنا 2004 جىلى كەلىپ، «جاس وتان» جاستار قاناتىنىڭ قوعامدىق جۇمىستارىنا تۇراقتى قاتىسىپ ءجۇردىم. ودان بەرى پاۆلودار قالالىق ءماسليحاتىنىڭ دەپۋتاتى، فراكتسيا جەتەكشىسى بولىپ، كەيىن پارتيامىزدىڭ وبلىستىق فيليالىندا ەڭبەك ەتتىم. وسىلاردى ەسكەرە وتىرىپ، جاڭا قىزمەتكە تاعايىندالۋىمدى، شىن مانىندە، مەريتوكراتيانىڭ ەڭ جارقىن ۇلگىسى ءارى مىسالى دەپ قابىلدايمىن. ارينە، بۇل - مەن ءۇشىن ۇلكەن جاۋاپكەرشىلىك»، - دەدى يلياتەرەنچەنكو.

يليا تەرەنچەنكو 1983 جىلى 15 قاراشادا پاۆلودار قالاسىندا تۋعان. زاڭگەر، قارجى جانە كرەديت، سونداي-اق، ساياساتتانۋ ماماندىقتارى بويىنشا جوعارى ءبىلىم العان. 2006 جىلدان بەرى «نۇر وتان» پارتياسىنىڭ مۇشەسى. بىرنەشە جىل بيزنەس سالاسىندا جۇمىس ىستەگەن ول پاۆلودار وبلىسىندا كاسىپكەرلەر پالاتاسىنىڭ اۋداندىق فيليالىن باسقارعان. سونداي-اق «نۇر وتان» پارتياسى پاۆلودار وبلىستىق فيليالى توراعاسىنىڭ ورىنباسارى بولىپ قىزمەت اتقاردى. ال 2016 جىلدىڭ ءساۋىر ايىنان باستاپ بۇگىنگە دەيىن «نۇر وتان» پارتياسى پاۆلودار وبلىستىق فيليالى توراعاسىنىڭ ءبىرىنشى ورىنباسارى بولىپ جۇمىس ىستەدى.

سوڭعى جاڭالىقتار

تەاتردىڭ ونلاين تارتۋى

رۋحانيات • كەشە

ءۇي جانۋارىنان ۆيرۋس جۇعا ما؟

كوروناۆيرۋس • كەشە

ۇقساس جاڭالىقتار