ءوتىپ بارا جاتقان جىلدىڭ ءتالىمى دە, تاعىلىمى دا كوپ بولدى. ەڭ باستىسى, تاۋەلسىزدىگىمىزدىڭ 20 جىلدىق بەلەسىن قورىتىندىلادىق. سالتاناتتى جيىندا ەلباسى نۇرسۇلتان نازارباەۆ وسىنىڭ بارلىعىن جۇيەلەپ ايتىپ بەرگەندە, مەيىرىم قانىپ تىڭداعان ەدىم. مەن تورعايدا, احاڭنىڭ – احمەت بايتۇرسىنوۆتىڭ تۋعان جەرى – سوناۋ اقكولدە تۋىپ-ءوسكەن جانمىن. ءتاۋەلسىزدىكتەن بۇرناعى جىلدارى دانىشپان احاڭنىڭ تۋعان جەرىنەن تۇلەپ ۇشقان بالالارىمىز كوڭىلى قالاعان ماماندىعىن الا الا ما, ومىردەگى ورنىن تابا الا ما دەگەن وي مازالاي باستايتىن ۋاقىتقا جەتكەن ەدىك. ويتكەنى, قازاق ءتىلى ەسىكتەن قاراپ قالدى دا, بار جەردە ورىس ءتىلىنىڭ عانا اسىعى الشىسىنان تۇردى. تاۋەلسىزدىك كەلىپ, انا ءتىلىمىزدىڭ بولاشاعى, كوكجيەگى اشىلدى. وسى جيىرما جىل ىشىندە اقكولدەن ۇشقان تۇلەكتەر ءوزىنىڭ انا تىلىندە وقىپ ءبىلىم الىپ, ءتۇرلى ماماندىقتاردى يگەردى. ەلباسى نۇرسۇلتان نازارباەۆ مەرەكەدەگى سوزىندە: «1991 جىلى قازاق تىلىندە ءبىلىم العان شاكىرتتەر سانى 32 پايىز بولسا, ول كورسەتكىش بۇگىندە 85 پايىزدان استى» دەدى. رەسپۋبليكا بويىنشا مىڭنان اسا مەكتەپ سالىنعانىن دا پرەزيدەنتتىڭ ءوز اۋزىنان ەستىدىك سول كۇنى. نۇرەكەڭ دۇرىس ايتادى. ءبىزدىڭ وبلىس ورتالىعىنان ون ساعات ءجۇرىپ باراتىن اقكولدە قازىر بالالار ەكى قاباتتى مەكتەپ عيماراتىندا وقيدى. ءىشى زاڭعىراپ تۇر, قىستىڭ قانداي ايازى مەن بورانىندا جىپ-جىلى. تورعايلىق بالالار كومپيۋتەردى اسىقتاي ۇيىرەدى. ەلباسىنىڭ: «ارينە, ءتىل ماسەلەسى – ۋاقىتتىڭ ەنشىسىندە. ساننىڭ ارتۋى, سانانىڭ ورنىعۋىمەن بارلىعى ءوز ورنىنا كەلەدى» دەگەن ءسوزى دە كوڭىلگە توق. مەملەكەتتىك ءتىلدىڭ بولاشاعىنا ەشقانداي ءشۇبا كەلتىرمەيمىن.
قاي كەزدەگىدەي, ەلباسى مەرەكەدەگى سوزىندە دە ەلدىڭ تىنىشتىعى ءبىرىنشى بايلىعىمىز ەكەنىن ەسكە سالىپ وتكەن. اتالارىمىز: «اعايىن تاتۋ بولسا – ات كوپ, ابىسىن تاتۋ بولسا – اس كوپ» دەگەن ەكەن. مىنە, كىشكەنتاي اۋىل, ءبىر اۋلەتتىڭ بەرەكە-بىرلىگىن ويلاعان اتالارىمىز قالاي ءدال ايتقان. وسى دۋالى ءسوز بۇكىل قازاققا قاتىستى ەمەس پە؟ ال تۇتاس ەلدىڭ جۇگىن ارقالاعان ەلباسى ىنتىماعى جاراسقان قازاقستان عانا العا جىلجيتىنىن ايتۋمەن كەلەدى. ءشۇكىرشىلىك, قازاقستان حالىقتارىنىڭ تاتۋلىعىن, ىنتىماق-بىرلىگىن وزگە ەلدەرگە ۇلگى ەتىپ كورسەتىپ كەلەمىز. پرەزيدەنتىمىز دىنارالىق تاتۋلىق ءۇشىن دە كوپ جۇمىس ىستەدى.
نۇرسۇلتان ءابىش ۇلىنىڭ جاسامپاز جۇمىستارىن تەك ءوزىمىز عانا ەمەس, قازىر تۇگەل الەم ءبىلىپ وتىر. بىراق ونى ايتا بەرگەننەن گورى ونىڭ باستامالارى مەن يدەيالارىنىڭ جۇزەگە اسۋى ءۇشىن ءار قازاقستاندىق قولدان كەلگەنشە جۇمىس ىستەۋى كەرەك. ءبىز, ەڭبەك ارداگەرلەرى ەلدىڭ تىنىشتىعى, مولشىلىق ارقاسىندا, بالالاردىڭ قىزىعىن كورىپ ۇيدە وتىرمىز. زەينەتكەر ادامداردىڭ قولىنان نە كەلەدى؟ كوپ نارسە كەلەدى دەر ەدىم. ءبىزدىڭ مىندەتىمىز دە, پارىزىمىز دا سول – بالالاردىڭ تاربيەسىن نىقتاۋىمىز كەرەك. «اتا كورگەن وق جونار, انا كورگەن تون پىشەر» دەگەن, تاربيە كورگەن ۇرپاق قانا ەرتەڭ وتانىنىڭ, ەلىنىڭ, حالقىنىڭ قامىن ويلايتىن ازامات بولادى.
الداعى 2012 جىل بارشامىز ءۇشىن تابىستى, بەرەكەلى جىل بولسىن! تاۋەلسىزدىگىمىز باياندى بولا بەرسىن!
يبراگيم اعىتاي, ەڭبەك ارداگەرى.
قوستاناي.
