تۇركىستان وبلىسىنىڭ جاڭادان قۇرىلۋىنىڭ ءوزى بۇل ءوڭىردىڭ الەۋەتى مىقتى ەكەنىن بىلدىرەدى. سەبەبى ەڭبەك كۇشى بار ءارى بىرقاتار سالالاردى دامىتۋعا قولايلى وبلىس. پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ ساراپشىلارى ءوڭىر الەۋەتىن وسىلاي باعالادى. ەلباسى جولداۋىن جۇزەگە اسىرۋ بويىنشا وتكەن ايماقتىق ساراپشىلار كەزدەسۋىندە اتالعان ينستيتۋتتىڭ الەۋمەتتىك-ساياسي زەرتتەۋلەر ءبولىمىنىڭ باسشىسى الۋا جولدىبالينا ء«ومىر ساپاسىنىڭ دەڭگەيى: نەگىزگى ولشەمدەرى مەن ينديكاتورلارى» تاقىرىبىندا بايانداما جاسادى.
تۇركىستان وبلىسى ىشكى ساياسات باسقارماسىمەن بىرلەسىپ وتكىزگەن جيىن ق.ا.ياساۋي اتىنداعى حقتۋ-دىڭ مادەنيەت سارايىندا ءوتتى. بايانداماسىندا ەلباسى جولداۋىنداعى باستى مىندەت – ەلدىڭ تۇرمىس دەڭگەيىن كوتەرۋ ەكەنىنە توقتالعان ا.جولدىبالينا ءومىر ساپاسىن انىقتاۋداعى نەگىزگى ينديكاتورلار مەن ولشەمدەر تۋرالى ءتۇسىندىرىپ بەردى. ال ينستيتۋتتىڭ اقپاراتتىق-تالداۋ جۇمىسى ءبولىمىنىڭ باسشىسى اسەل نازاربەتوۆا «جاڭا زاماننىڭ مەملەكەتتىك قىزمەتكەرلەرى – ەل ساياساتىنىڭ ءتيىمدى جۇزەگە اسۋىنىڭ نەگىزى» تاقىرىبىندا وي قوزعادى. «ەلباسى مەملەكەتتىك قىزمەتشىلەردىڭ دەڭگەيىن, مەملەكەتتىك ورگانداردىڭ تيىمدىلىگىن ارتتىرۋ جونىندە تاپسىرما بەردى. ماسەلەن, ەسكى جۇيە بويىنشا مەملەكەتتىك قىزمەتكەردىڭ جالاقىسى ونىڭ لاۋازىمى مەن ەڭبەك وتىلىنە بايلانىستى بولاتىن. ال جاڭا جۇيە بويىنشا جۇمىستىڭ كۇردەلىلىگى ەسكەرىلەدى. جۇمىستى ساپالى ىستەگەن قىزمەتكەرلەرگە بونۋستار بەرىلەدى. وسى ارقىلى باسشىلىق پەن ماماندار جالاقىسى اراسىنداعى الشاقتىق تومەندەيدى», دەدى ول.
بەلگىلى ساياساتتانۋشى ءبورىحان نۇرمۇحاممەد تۇركىستانداعى جەتەكشى وقۋ ورىندارى مەملەكەتتىك باسقارۋ, ۋربانيزاتسيا, تۋريزم سالالارى بويىنشا مىقتى ماماندار دايارلاۋدى كۇشەيتۋلەرى ءتيىس دەپ ەسەپتەيدى. ساياساتتانۋشىنىڭ پىكىرىنشە, بيىل ءبىر جىلدا ەكى جولداۋدىڭ جاريالانۋىنىڭ استارىندا ەلباسىنىڭ الەۋمەتتىك ماسەلەلەردى جىلدام شەشۋ ماقساتى جاتىر. سەبەبى ءۇش اي بۇرىن ايتىلعان تاپسىرمالار مەن باستامالاردى كەلەسى جىلدىڭ بيۋدجەتىنە ەنگىزۋگە مۇمكىندىك بار.
جيىندى جۇرگىزگەن وبلىستىق ىشكى ساياسات باسقارماسىنىڭ باسشىسى بەيسەنباي تاجىباەۆ ساراپشىلاردىڭ پىكىرلەرى ستۋدەنتتەر مەن وقىتۋشىلارعا سەرپىن بەرەتىنىن جەتكىزدى.
عالىمجان ەلشىباي,
«ەگەمەن قازاقستان»
تۇركىستان وبلىسى
