بۇگىندە قازاقستان-فينليانديا قارىم-قاتىناستارى جوعارعى دەڭگەيگە شىعىپ, ەكى مەملەكەت حالىقارالىق جانە وڭىرلىك ماڭىزدى ماسەلەلەر بويىنشا ءبىر-بىرىنە بەلسەندى قولداۋ كورسەتىپ وتىرعان سەنىمدى سەرىكتەس جانە ساياسي ارىپتەس بولىپ ەسەپتەلەدى.
قازاقستان ءۇشىن فينليانديا وتكەن 26 جىل ىشىندە سولتۇستىك ەۋروپا مەن ەۋرووداقتاعى كوپتەگەن ماسەلەلەر بويىنشا كوزقاراسى مەن ۇستانىمى سايكەس كەلەتىن تۇعىرلى مەملەكەتتەردىڭ بىرىنە اينالدى.
اتاپ ايتقاندا, قازاقستان مەن فينليانديانىڭ سىرتقى ساۋدا اينالىمى 2017 جىلى 307,9 ملن اقش دوللارىن قۇرادى.
2018 جىلدىڭ قاڭتار-شىلدە ايلارىندا ساۋدا اينالىمى 160 ملن اقش دوللارىنا جەتكەن. سوڭعى 13 جىلدا (2005 جىلدان 2018 جىلدىڭ 1 توقسانىندا) قازاقستانعا فينليانديادان تارتىلعان تىكەلەي ينۆەستيتسيا كولەمى 334 ملن اقش دوللارىن قۇرادى. بۇگىندە قازاقستاندا فين كاپيتالىنىڭ ۇلەسى بار ەلۋدەن اسا كاسىپورىن جۇمىس ىستەپ تۇر.
قازاقستان-فينليانديا ساۋدا-ەكونوميكالىق قارىم-قاتىناستارىنىڭ نەگىزىن حيميا, جەڭىل ونەركاسىپ, تاۋ-كەن-مەتاللۋرگيا كەشەنى, قۇرىلىس ماتەريالدارىن شىعارۋ, جوعارى تەحنولوگيالىق سىر وندىرىسىندەگى بايلانىستار قۇرايدى.
مەملەكەت باسشىسى نۇرسۇلتان نازارباەۆتىڭ فينليانديا رەسپۋبليكاسىنا ساپارى ەكى كۇنگە جوسپارلانعان.
بۇعان دەيىن قازاقستان پرەزيدەنتى فينلياندياعا 2009 جىلى مەملەكەتتىك ساپارمەن كەلگەن.
سەرىك ابدىبەك,
«ەگەمەن قازاقستان» – حەلسينكي (فينليانديا)
