ورتالىق سايلاۋ كوميسسياسىنىڭ كەشەگى وتىرىسىندا كوميسسيا قازاقستان حالقى اسسامبلەياسى سايلايتىن پارلامەنت ءماجىلىسى دەپۋتاتتىعىنا 9 كانديداتتى تىركەدى.
كۇنتىزبەلىك جوسپارعا ءسايكەس 2011 جىلعى 31 جەلتوقساندا قازاقستان حالقى اسسامبلەياسى سايلايتىن پارلامەنت ءماجىلىسى دەپۋتاتتىعىنا كانديداتتاردى تىركەۋ اياقتالادى. سايلاۋ تۋرالى زاڭ بويىنشا اسسامبلەيا كەڭەسى 9 كانديدات ۇسىنعان بولاتىن. ورتالىق سايلاۋ كوميسسياسى ولاردىڭ بارلىعىن تىركەدى. ۇمىتكەرلەردىڭ ىشىندە ەكى ايەل بار. كانديداتتاردىڭ ورتاشا جاسى – 59 جاس. ولاردىڭ بارلىعى جوعارى ءبىلىمدى. التاۋى عىلىم, مادەنيەت جانە ءبىلىم سالالارىنىڭ قىزمەتكەرلەرى. تاعى ءۇش ۇمىتكەر – ءتورتىنشى شاقىرىلعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى. تىركەلگەن كانديداتتار سايلاۋالدى ۇگىت جۇمىسىنا 2012 جىلعى 1 قاڭتاردان باستاپ كىرىسە الادى.
وتىرىستا, سونداي-اق ورتسايلاۋكوم «قازاقستان رەسپۋبليكاسى پارلامەنتى ءماجىلىسىنىڭ جانە ءماسليحاتتارىنىڭ دەپۋتاتتارىن سايلاۋ جونىندەگى سايلاۋ بيۋللەتەندەرىنىڭ ماتىندەرىنە وزگەرىستەر ەنگىزۋ ءراسىمى تۋرالى» قاۋلى قابىلدادى. وسى كۇنى سىرتقى ىستەر مينيسترلىگىنىڭ ۇسىنىسى بويىنشا ورتالىق سايلاۋ كوميسسياسى تاعى 82 حالىقارالىق بايقاۋشىنى اككرەديتتەدى. ولاردىڭ 27-ءسى – ەقىۇ/دياقب بايقاۋشىلار ميسسياسىنىڭ, 31-ءى – تمد بايقاۋشىلار ميسسياسىنىڭ وكىلدەرى, 4 بايقاۋشى يسلام ىنتىماقتاستىعى ۇيىمىنىڭ بايقاۋشىلارى. تاعى 20-سى – شەت مەملەكەتتەردەن كەلگەن بايقاۋشىلار.
وسىلايشا, قازىرگى ساتتە ورتالىق سايلاۋ كوميسسياسى 326 حالىقارالىق بايقاۋشىنى اككرەديتتەدى. ولاردىڭ 101-ءى – ەقىۇ/دياقب-نىڭ قازاقستان رەسپۋبليكاسىنداعى كەزەكتەن تىس پارلامەنتتىك سايلاۋدى بايقاۋ ءجونىندەگى بايقاۋشىلار ميسسياسىنىڭ قۇرامىنا, 133-ءى – تمد-دان بايقاۋشىلار ميسسياسىنىڭ قۇرامىنا, 9-ى – شانحاي ىنتىماقتاستىق ۇيىمىنىڭ بايقاۋشىلار ميسسياسىنىڭ قۇرامىنا كىرەدى, 9-ى – تۇركىتىلدەس مەملەكەتتەر ىنتىماقتاستىعى كەڭەسىنەن, ءتورت بايقاۋشى يسلام ىنتىماقتاستىعى ۇيىمىنان وكىلدىك ەتەدى, تاعى 70-ءى – 24 شەت مەملەكەتتەن كەلگەن بايقاۋشىلار. سونىمەن قاتار, ورتسايلاۋكوم بۇرىن شىعىپ قالعانداردىڭ ورنىنا شىعىس قازاقستان وبلىستىق سايلاۋ كوميسسياسىنىڭ ءبىر ءمۇشەسى مەن ماڭعىستاۋ وبلىستىق سايلاۋ كوميسسياسىنىڭ ءبىر مۇشەسىن جانە استانا قالالىق سايلاۋ كوميسسياسىنىڭ مۇشەسىن تاعايىندادى.
وتىرىستان كەيىن وتكەن بريفينگتە ورتسايلاۋكوم باسشىسى قۋاندىق تۇرعانقۇلوۆ باق وكىلدەرىن سايلاۋ ناۋقانىنىڭ بارىسى تۋرالى حاباردار ەتتى. توراعانىڭ ايتۋىنشا, ساياسي پارتيالار سايلاۋ كوميسسيالارىنىڭ قۇرامىنا كەڭەسشى داۋىس قۇقىعى بار وكىلدەرىن جولداۋ قۇقىن بەلسەندى پايدالانىپ وتىر. قازىرگى كەزدە سايلاۋ كوميسسيالارىنىڭ قۇرامىندا وسىنداي 1830 وكىل جۇمىس ىستەۋدە. ولاردىڭ ىشىندە 1453 كانديداتۋرانى قازاقستاننىڭ جالپىۇلتتىق سوتسيال-دەموكراتيالىق پارتياسى ۇسىنعان.
ال قازاقستاننىڭ «اق جول» دەموكراتيالىق پارتياسىنان سايلاۋ كوميسسيالارىنىڭ قۇرامىنا كەڭەسشى داۋىس قۇقىعىمەن 224 وكىل جىبەرىلگەن. سونداي-اق سايلاۋكومدار قۇرامىنا قازاقستاننىڭ كوممۋنيستىك حالىق پارتياسىنىڭ – 94, «ادىلەت» دەموكراتيالىق پارتياسىنىڭ 59 وكىلى جولدانعان.
«وسىلايشا, بارلىق ساياسي پارتيالارعا سايلاۋدى ءازىرلەۋ مەن وتكىزۋ كەزەڭىندە سايلاۋ ورگاندارى جۇمىسىنا ءتيىمدى قاتىسۋ مۇمكىندىگى بەرىلگەن, – دەپ اتاپ ءوتتى قۋاندىق تۇرعانقۇلوۆ. – جاڭاوزەن قالاسىنداعى جاعدايعا كەلەتىن بولساق, داۋىس بەرۋ كۇنىنە دايىندىق قالىپتى ءجۇرىپ جاتىر. بارلىق سايلاۋ كوميسسيالارى جۇمىس ىستەۋدە. سايلاۋشىلار تىزىمدەرىن جەرگىلىكتى اتقارۋشى ورگاندار سايلاۋ كوميسسيالارىنا تاپسىردى». ەلىمىز بويىنشا بارلىق سايلاۋشىلار سياقتى بۇل قالانىڭ سايلاۋشىلارى دا 2011 جىلعى 30 جەلتوقساننان باستاپ سايلاۋ ۋچاسكەلەرىنىڭ ءۇي-جايلارىندا سايلاۋشىلار تىزىمىمەن تانىسا الادى.
«مەن بارلىق سايلاۋشىلاردى وسى مۇمكىندىكتى پايدالانۋعا, ءسويتىپ, ءوزىنىڭ سايلاۋشىلار تىزىمىنە ەنگىزىلۋىنە الدىن-الا كوڭىل بولۋگە شاقىرامىن, – دەدى ورتسايلاۋكوم باسشىسى. – ونىڭ سىرتىندا سايلاۋشى ءوزىنىڭ قاي سايلاۋ ۋچاسكەسىندە تىركەلگەنىن ءبىزدىڭ ەلەكتروندىق رەسۋرسىمىزدا كورسەتىلگەن ەلەكتروندىق پوشتانىڭ izbiratel_2012@election.kz مەكەن-جايىنا نەمەسە «ەلەكتروندىق ۇكىمەتتىڭ» ۆەب-پورتالىنداعى ارنايى ىزدەستىرۋ نىسانىنا سۇرانىس جولداۋ ارقىلى تەكسەرە الادى».
2011 جىلعى 16 قاراشا مەن 19 جەلتوقسان ارالىعىنداعى كەزەڭدە ورتسايلاۋكومعا جەكە جانە زاڭدى تۇلعالاردان 85 ءوتىنىش كەلىپ ءتۇسكەن ەكەن. ولاردىڭ ىشىندە 64 ءوتىنىش سايلاۋ ناۋقانىنىڭ ءارتۇرلى اسپەكتىلەرى بويىنشا, تاعى 21-ءى – سايلاۋ ورگاندارىنىڭ, سايلاۋ ۇدەرىسىنە قاتىسۋشىلاردىڭ جانە بۇقارالىق اقپارات قۇرالدارىنىڭ قىزمەتىنە بايلانىستى.
ءاليسۇلتان قۇلانباي.
