بۇل ورايدا مەملەكەتتىك قىزمەتتىڭ ەڭ ماڭىزدى اسپەكتىلەرىنىڭ ءبىرى – جالاقى جۇيەسىنە قىسقاشا توقتالعىم كەلەدى. جارتى عاسىر بۇرىن اقش-تىڭ مەملەكەتتىك قۇرىلىمدارىنىڭ تاپسىرىسى بويىنشا ازىرلەنگەن گرەيدتىك جۇيە تيىمدىلىگىن كورسەتىپ, كانادا, جاڭا زەلانديا, مالايزيا, سينگاپۋر, ۇلىبريتانيا سياقتى ەلدەردە ءساتتى ەنگىزىلگەن. شىن مانىندە, «گرەيد» دەگەنىمىز كومپانيا ءۇشىن شامامەن تەڭ قۇندىلىعى بار لاۋازىمدار توبى. لاۋازىمدار ۇيىمنىڭ ىشىندەگى بىرلىكتەردىڭ نەمەسە لاۋازىمداردىڭ قۇندىلىعىنا, ماڭىزدىلىعىنا, كۇردەلىلىگىنە قاراي گرەيدكە بولىنەدى. قازاقستاندا مۇنداي جۇيە 174 وتاندىق كومپانيادا ەنگىزىلگەن. بۇل جۇيەنى ءوزىنىڭ تاجىريبەسىندە ويداعىداي ىسكە اسىرعانداردىڭ قاتارىندا مەتاللۋرگيا, ماشينا جاساۋ جانە ينجينيرينگ سالاسىنداعى كوشباسشى شىمكەنتتە ورنالاسقان «Karlskrona LC AB» كومپانياسى دا بار. تاسىلدەردىڭ ەرەكشەلىكتەرىنە قاراماستان, ەڭبەكاقىنىڭ ەكى بولىكتەن – تۇراقتى جانە اۋىسپالى بولۋى گرەيدتىك جۇيەگە ورتاق. تۇراقتى بولىك قىزمەتكەردىڭ ءبىلىمى, قۇزىرەتى جانە تاجىريبەسىنەن قۇرىلادى. ءاربىر قىزمەتكەر اي سايىنعى لاۋازىمدىق مىندەتتەرىن ورىنداعانى ءۇشىن تۇراقتى جالاقى الادى. ەكىنشى بولىگى ەڭبەك ونىمدىلىگى, تيىمدىلىگى جانە باسقا دا ۇقساس كورسەتكىشتەر ءۇشىن قىزمەتكەرلەردىڭ تاباتىن سىياقىسىنان تۇرادى. 2019 جىلدان باستاپ جوعارىدا اتالعان تاسىلدەردى قازاقستاننىڭ مەملەكەتتىك قىزمەت جۇيەسىنە دە ەنگىزۋ جوسپارلانۋدا.
ەڭبەكاقى تولەۋدىڭ جاڭا جۇيەسىنىڭ باستى ايىرماشىلىعى – قىزمەتشىلەرگە جۇكتەلگەن مىندەتتەردىڭ اۋقىمدىلىعىن جانە تيىمدىلىگىن ەسكەرەدى. بارلىق لاۋازىمدار ءۇش فاكتور نەگىزىندە باعالانادى: ءبىلىم دەڭگەيى, قۇزىرەتتەرى مەن جۇمىس تاجىريبەسى, لاۋازىمعا جۇكتەلگەن مىندەتتەردىڭ كۇردەلىلىگىنىڭ دارەجەسى جانە ناتيجەگە قول جەتكىزبەگەنى ءۇشىن جاۋاپكەرشىلىك دارەجەسى. فاكتورلاردىڭ ارقايسىسى بويىنشا بالل شىعارىلادى جانە ولاردىڭ جيىنتىعى جاڭا جالاقى جەلىسىندەگى لاۋازىمنىڭ ورنىن انىقتايدى. ناتيجەسىندە اكىمشىلىك قىزمەتكەرلەردىڭ لاۋازىمدارى 15 دەڭگەيگە جانە 4 فۋنكتسيونالدىق بلوگقا بولىنگەن. اپروباتسيالاۋ بارىسىندا قاناتقاقتى ورگانداردىڭ مەملەكەتتىك قىزمەتشىلەرىنىڭ جالاقىسى ەكى ەسەدەن اسا ارتىپ, بۇل مەملەكەتتىك قىزمەتتىڭ تارتىمدىلىعىن ايتارلىقتاي ارتتىردى. مىسالى, تۇركىستان وبلىسى بويىنشا دەپارتامەنتتە 3 بوس لاۋازىمعا كونكۋرس وتكىزۋ كەزىندە ۇمىتكەرلەردىڭ سانى ورىنعا 60 ادامعا دەيىن ءوستى.
ورتالىق پەن وڭىرلەردەگى مەملەكەتتىك قىزمەتشىلەردىڭ جالاقىلارىنداعى ۇيلەسپەۋشىلىكتى ازايتۋ جاڭا جۇيەنى ەنگىزۋدىڭ تاعى ءبىر ماڭىزدى تۇسى. ەگەر, 2017 جىلى دەپارتامەنتتىڭ باس مامانىنىڭ ورتاشا جالاقىسى 92 مىڭ تەڭگە بولسا, فبش بويىنشا ول 219 مىڭ تەڭگەنى قۇرادى. سونىمەن قاتار اگەنتتىك ءاربىر مەملەكەتتىك ورگانداردىڭ ىشكى رەزەرۆتى پايدالانۋعا مۇمكىندىك بەرۋ بويىنشا جارلىق جوباسىن دايىندادى. اتالعان رەزەرۆتەردىڭ ءبىرى – بوس لاۋازىمدار ەسەبىنەن ەڭبەكاقى تولەۋ قورىن ۇنەمدەۋ. وسى مۇمكىندىكتى ەسكەرە وتىرىپ, اگەنتتىك توراعاسى بارلىق اۋماقتىق دەپارتامەنتتەرگە قىركۇيەك ايىنان باستاپ دەپارتامەنت قىزمەتشىلەرىنە ۇستەماقى كولەمىن 30%-كە دەيىن ارتتىرۋدى تاپسىردى.
وسى جاڭا ەنگىزىلىمنىڭ ارقاسىندا ءاربىر قىزمەتشىنىڭ الەۋمەتتىك-تۇرعىن ءۇي جاعدايىن جاقسارتۋعا مۇمكىندىكتەرى پايدا بولدى. مىسالى, قىزمەتشى «7-20-25» باعدارلاماسى بويىنشا 16 ملن تەڭگەگە تۇرعىن ءۇي ساتىپ الۋدى جوسپارلاسا باستاپقى 20% جارنادان كەيىن, ونىڭ نەسيە بويىنشا اي سايىنعى تولەمى شامامەن 80 مىڭ تەڭگەنى قۇرايدى. بۇرىنعى جالاقىمەن ارينە بۇل وتە قيىن ەدى.
ءالي كومەكباەۆ,
مەملەكەتتىك قىزمەت
ىستەرى جانە سىبايلاس جەمقورلىققا قارسى ءىس-قيمىل اگەنتتىگى شىمكەنت
قالاسى بويىنشا
دەپارتامەنتىنىڭ باسشىسى
