كەشە جالپىۇلتتىق سوتسيال-دەموكراتيالىق پارتيانىڭ تەڭ توراعاسى جارماحان تۇياقباي جانە پارتيانىڭ ءبىر توپ باسقا بەلسەندىلەرى الماتىنىڭ تۇركسىب اۋدانىنداعى باقاي شاعىن اۋدانىنىڭ تۇرعىندارىمەن كەزدەسۋ وتكىزدى.
كەزدەسۋ بارىسىندا پارتيا بەلسەندىلەرى وزدەرىنىڭ سايلاۋالدى تۇعىرناماسىمەن تانىستىرىپ, ەلدى ودان ءارى دەموكراتيالاندىرا ءتۇسۋ رەفورمالارىن ەنگىزۋ بويىنشا بىرقاتار ويلارىن ورتاعا سالدى. سونىڭ ىشىندە كەيبىر مەملەكەتتىك ورگانداردىڭ سىلبىر جۇمىستارىنا قاتتى سىندار ايتىلدى.
كەزدەسۋ كەزىندە جاڭاوزەن وقيعالارى بويىنشا دا جسدپ ۇستانىمدارى جاريا ەتىلدى. پارتيا بەلسەندىلەرى ونداعى جاپپاي تارتىپسىزدىكتى ۇيىمداستىرعاندار مەن ورتەۋ, قيراتۋ, ءبۇلدىرۋ ىستەرىنە بەلسەنە قاتىسقانداردى پروكۋراتۋرا ورگاندارى تاۋىپ, زاڭعا سايكەس ءتيىستى جازاسىن بەرۋلەرى كەرەكتىگىن ايتتى. سونىمەن بىرگە, كەيبىر, وت قارۋىن ورىنسىز قولدانعان پوليتسيا قىزمەتكەرلەرى دە جازاسىن تارتۋلارى كەرەك دەگەن ۇسىنىستارى بارى جەتكىزىلدى. جاڭاوزەننىڭ الەۋمەتتىك ماسەلەلەرى دە تەزىرەك شەشىلىپ, جۇمىستان زاڭسىز شىعارىلعانداردىڭ قالپىنا كەلتىرىلۋى قاجەتتىگى دە ءسوز بولدى.
جينالعان تۇرعىندار تاراپىنان كوپتەگەن سۇراقتار قويىلدى. سونىڭ ىشىندە وسى شاعىن اۋدان تۇرعىندارىنىڭ الەۋمەتتىك ماسەلەلەرىن شەشۋ جەتكىلىكتى دارەجەدە ورىندالماي جاتقاندىعى ءسوز بولدى. اسىرەسە, قوعامدىق كولىك, جول, سۋمەن قامتيتىن قىزمەتتەر سالاسىنا ءبىرتالاي سىندار بار ەكەنى بەلگىلى بولدى.
ۇستىمىزدەگى جىلى الماتى قالالىق ءماسليحاتىنىڭ شەشىمىمەن شاعىن اۋداننىڭ «باقاي» اتاۋى وزگەرىپ, ول «جاس قانات» دەگەن جاڭا ات العان بولاتىن. سودان بەرى مەملەكەتتىك جەر اكتىلەرى قولدارىندا بار ازاماتتاردىڭ بىرقاتارى قالالىق تىركەۋدەن ءوتىپ, قالاداعى بارلىق الەۋمەتتىك قىزمەتتەردىڭ پايداسىن كورىپ وتىر. ونداي وتباسىلاردىڭ سانى 400-گە جۋىق. ال جەردى ستيحيالى تۇردە باسىپ الىپ, تۇرعىن ۇيلەردى ورىندى-ورىنسىز سالىپ العاندار ءالى كۇنگە قۇجاتتارىن تولىق الىپ ۇلگەرگەن جوق. وسىنداي تۇرعىنداردىڭ جسدپ بەلسەندىلەرىنە ايتقان وتىنىشتەرى دە, ءتۇرلى قىزمەتتەرگە ايتقان سىندارى دا كوپ بولدى.
جالپى, كەزدەسۋ ەكى تاراپتىڭ دا قىزىعۋشىلىعىن تۋدىرعان وتكىر پىكىرسايىس تۇرىندە ءوتتى.
جاقسىباي سامرات.
