بيىل باس قالامىز – استانانىڭ 20 جىلدىعىن ەل بولىپ اتاپ وتۋدەمىز. ەلباسىنىڭ ەرىك-جىگەرىنىڭ, ۇزدىكسىز قولداۋىنىڭ ارقاسىندا استانا ەل دامۋىنىڭ قوزعاۋشى كۇشىنە اينالدى.
وسىدان 10-15 جىل بۇرىن, ەلىمىزدىڭ ىشكى ايماقتارىنان كەلگەن تۇرعىندار, الىس-جاقىن شەتەلدەن ەلىم دەپ كەلگەن قانداستارىمىز, ۇكىلى ءۇمىتتىڭ جەتەگىندە, تاۋەلسىزدىگىمىزگە مىڭ مارتە تاۋبە جاساپ, استانانى اينالا قونىستانعان ەدى.
2012 جىلى ەلباسى وسى اۋىلداردى ارالاپ, ۇكىمەتكە استانا اگلومەراتسياسىن دامىتۋدىڭ كەشەندى جوسپارىن جاساۋدى تاپسىرعان. ەلباسى ءوز سوزىندە: «استانا اگلومەراتسياسىنىڭ ارنايى كەشەندى جوسپارىنا 20 ەلدى مەكەن كىرەدى, ونى دامىتۋعا مەملەكەت تاراپىنان 40 ملرد تەڭگە قارجى جوسپارلانىپ وتىر. استاناعا جاقىن ورنالاسقان اۋىلدارعا ادامدار كوشىپ كەلىپ, تۇراقتاپ جۇمىس ىستەۋى ءۇشىن بارلىق مۇمكىندىك جاسالۋى ءتيىس», دەپ اتاپ وتكەن-ءدى.
سول ۋاقىتتان بەرى ۇكىمەت قابىرعاسىندا وسى تاقىرىپقا بايلانىستى تالاي جيىن ءوتتى. بىراق بۇل جيىنداردان اۋىلدار ءومىرىنىڭ وزگەرگەنىن كورمەدىك.
بۇگىندە استانا تۇبىنە شوعىرلانعان اۋىلداردا حالىقتىڭ سانى كۇرت وسۋدە. ءبىر عانا مىسال, قوياندى اۋىلىندا 1999 جىلى 319 تۇرعىن بولسا, بۇگىندە تەك رەسمي مالىمەت بويىنشا, 22000 مىڭ ادام, ال بەيرەسمي دەرەك بويىنشا 35000 ادام تۇرادى. وكىنىشكە قاراي, ادام سانىمەن بىرگە بۇل اۋىلداردا الەۋمەتتىك, ينفراقۇرىلىمدىق پروبلەمالار دا بىرگە وسۋدە. بۇل اۋىلدان 10 شاقىرىم جەردەگى استانانىڭ كەيبىر كوشەلەرى ءبىر جىلدا ەكى رەت جوندەلسە, 15 جىلدا بۇل اۋىلدىڭ ىشىندەگى ۇزىندىعى 154 كم جولدىڭ 3,5 شاقىرىمىنا عانا اسفالت توسەلگەن. وسى جولمەن كۇزدە بەس شاقىرىم باتپاق كەشىپ, قىستا بورانداتىپ, قار كەشىپ بالالار مەكتەپكە بارادى. اۋىلدىڭ قيىر شەتىنە ورنالاسقان 900 ورىندىق مەكتەپتە 2700 وقۋشى ءبىلىم الۋدا, تەك 1-كلاستا عانا 16 سىنىپ بار. وسى ولقىلىقتار جوعارىدا اتالعان ءبىر عانا اۋىل ەمەس, استانانى اينالا قونعان تالاپكەر, قاجىمۇقان, قوسشى, قاراوتكەل, تايتوبە سياقتى اۋىلدارعا دا ءتان.
2017 جىلى 31 قازانداعى ۇكىمەت وتىرىسىندا استانا اگلومەراتسياسىنىڭ تەرريتوريالىق سحەماسى ماقۇلداندى. بۇل ايماقتىڭ شەڭبەرىنە 2030 جىلعا دەيىن 124 ەلدى مەكەن ەنىپ, حالىق سانى 2 ملن-عا جەتۋى جوسپارلانىپ وتىر.
الايدا وسى يندۋستريالىق ايماقتار 35 مىڭ تۇرعىنى بار قوياندى اۋىلىن اينالىپ ءوتىپ, 86 عانا تۇرعىنى بار جايناق اۋىلىنا, ەندى ءبىرى 15 مىڭ حالقى بار تالاپكەردى ەمەس, 854 ادامى بار توڭكەرىس اۋىلىنا ورنالاساتىن بولىپتى. ارينە يندۋستريالىق ايماققا ورىن ىزدەگەندە تەمىر جولدىڭ توعىسى, تاعى باسقا دا ينفراقۇرىلىمدىق, ەكونوميكالىق كاتەگوريالار نەگىزگە الىنعان بولار. بىراق الدىمەن تەمىردى دە, كومىردى دە ناعىز قۇندىلىققا اينالدىراتىن ادامنىڭ ەڭبەك كۇشى ەكەنىن ەسكەرۋ كەرەك ەدى عوي.
ءبىز وسى ماسەلەنى ۇكىمەت باسشىسى باقىتجان ساعىنتاەۆتىڭ نازارىنا جەتكىزىپ, استانا اگلومەراتسياسىنىڭ جوسپارىنا قالا ماڭىنداعى حالقى تىعىز ورنالاسقان اۋىلداردىڭ ەنگىزىلۋىن, ينفراقۇرىلىم مەن مادەنيەت وشاقتارىن سالۋ جۇمىستارىن قارجىلاندىرۋ قالاي بولاتىنىن, قانشا مەكتەپ سالىناتىنىن, گازداندىرۋ جوسپارىنا قوسۋدى سۇرادىق.
بەرىك دۇيسەمبينوۆ,
ءماجىلىس دەپۋتاتى
