كوميتەت ءتورايىمى, مەملەكەت جانە قوعام قايراتكەرى بىرعانىم ءايتىموۆا جولداۋدا بەلگىلەنگەن مەرەيلى مىندەتتەردى جۇزەگە اسىرۋ بارىسىنداعى بار جۇمىسقا ىشتەي دايىن بولىپ, ءتاستۇيىن جۇمىلعان ەل ىنتىماعىنا ريزاشىلىعىن بىلدىرە كەلە, بىرلىك بار جەردە حالىقتىڭ مىندەت ۇدەسىنەن شىعاتىندىعىنا زور سەنىممەن تولايىم تابىس تىلەدى.
– ءبىز وبلىستا ەكى كەڭەيتىلگەن كوشپەلى ءماجىلىس وتكىزۋدى ۇيعارىپ وتىرمىز, – دەدى ب.ءايتىموۆا, – حالىقپەن جۇزدەسۋلەردىڭ تاقىرىبى ءارتۇرلى بولعانىمەن, سايىپ كەلگەندە ىشكى مازمۇندىق نەگىزى ءبىر ارنادا توعىسىپ جاتىر. بۇل – ەلباسى جولداۋىنىڭ مازمۇنىن حالىققا جەتكىزىپ, نەگىزگى مىندەتتەردىڭ اۋقىمىن سارالاۋ.
ەلباسىنىڭ جولداۋى قىرۋار ەڭبەكپەن, ماڭداي تەرمەن كەلگەن جەتىستىكتەردى قورىتا كەلە, كەلەر كۇننىڭ كوكجيەگىنە نىق سەنىممەن اتتاپ, بولاشاقتى باياندى ەتۋگە باعىتتايدى. جولداۋدا: ء«بىزدىڭ ستراتەگيالىق ماقساتىمىز 2050 جىلعا قاراي الەمدەگى وزىق وتىز ەلدىڭ قاتارىنا قوسىلۋ» دەگەن جولباستار پىكىرلەر جاي ايتىلىپ وتىرعان جوق. الدىمىزعا ماقسات قويعاننان كەيىن, بويىمىزداعى بار قاجىر-قايرات, كۇش-قۋاتىمىزدى جۇمىلدىرىپ, ءبىز سول بيىككە جەتەمىز. وعان حالقىمىزدىڭ قايىسپاس رۋحى, ىشكى قۋاتى تولىعىنان جەتەدى. ەلباسىنىڭ جولداۋى وسىنداي ەل ەڭسەسىن كوتەرەتىن ۇلىق ءسوزدى ايتىپ وتىر.
كوميتەت ءتورايىمى ءوز ءسوزىن تاۋەلسىز ەلىمىزدىڭ بەيبىتشىلىك سۇيگىش ساياساتىمەن, ەل ءىشىنىڭ ىنتىماق-ىرىسىمەن, تۇراقتى دامۋىنا قاتىستى پىكىرىمەن ءوربىتتى. ەلگە 300 ميلليارد اقش دوللارى كولەمىندەگى ينۆەستيتسيا تارتىلىپ وتىر. بۇل قارجى عانا ەمەس, ەلدىڭ ابىرويى, وعان دەگەن سەنىم مەن حالىقارالىق مويىنداۋ دەسەڭىز دە بولار.
شيرەك عاسىردان ەندى اسقان جاس مەملەكەت العا قاراي سەنىمدى, نىق قادام جاساۋدا. جاڭا جولداۋداعى التى ءبولىم وسى ماقساتتاردى كوزدەيدى. جالعىز كوزدەۋ عانا ەمەس, وعان جەتۋ جولدارىن دا قولمەن قويعانداي ەتىپ كورسەتىپ بەرەدى. سەنات كوميتەتىنىڭ ءتورايىمى الداعى ۋاقىتتا ەڭ تومەنگى جالاقى مولشەرى 1,5 ەسە وسەتىندىگىن, ءبىلىم بەرۋ مەن دەنساۋلىق ساقتاۋ قىزمەتىنىڭ ساپاسى جاقساراتىنىن العا تارتتى. سونداي-اق جولداۋدىڭ اركىمنەن زامان اعىمىنا ساي بولۋ كەرەكتىگىن دە تالاپ ەتەتىندىگىن ءتۇسىندىرىپ ءوتتى.
كوشپەلى ماجىلىستە ءسوز سويلەگەن سەنات دەپۋتاتتارى دا ەلباسى جولداۋىنىڭ ءمان-ماڭىزىنا تەرەڭدەي بويلاپ, جان-جاقتى توقتالدى. جينالعان قاۋىم الەۋمەتتىك-مادەني دامۋ جانە عىلىم كوميتەتىنىڭ حاتشىسى سەرىك بەكتۇرعانوۆتىڭ 1 ميلليون 300 مىڭ ادامنىڭ ەڭ تومەنگى جالاقى الىپ كەلگەندىگىن, ەندىگى جەردە شامامەن 600 مىڭ ادامنىڭ جاعدايى جاقساراتىنى تۋرالى ايتقان ءسوزىن جىلى قابىلدادى. بۇل جەردە تاعى ءبىر ەل ەڭسەسىن كوتەرۋگە سەپتىگىن تيگىزەتىن جاي بار. ونى دا اشىپ ايتۋىمىز كەرەك. ەڭ تومەنگى جالاقىدان سالىق ۇستالمايدى. وزگە كاتەگوريالار بويىنشا دا جالاقى كولەمىن ارتتىرۋ ءۇردىسى جالعاسا بەرمەك. وسى ارادا قايتارىم ناتيجەسى دە باقىلاۋدا بولاتىندىعىن ايتا كەتكەن ءجون. سەرىك بەكتۇرعانوۆ كەلتىرگەن دەرەكتەردى سارالايتىن بولساق, ادام دەنساۋلىعىنىڭ ون پروتسەنتى عانا مەديتسينالىق قىزمەتتەرگە تاۋەلدى, قالعانى ءوزىنىڭ ءومىر ءسۇرۋ داعدىسىنا بايلانىستى. بيىلعى جولداۋدا بۇل جاي اتاپ كورسەتىلگەن. سوندىقتان, ازاماتتاردىڭ جەكە جاۋاپكەرشىلىگى دەگەن ماسەلەنى ۇمىتپاعان ءجون.
كوميتەت مۇشەلەرى باقىت جۇماعۇلوۆ, مۇرات باقتيار ۇلى, دينار نوكەتاەۆالار جولداۋدىڭ جىلداعى مەرزىمنەن ەرتەرەك جاسالۋى ونداعى مىندەتتەردى ورىنداۋعا نەگىز بولاتىن بيۋدجەتتى قالىپتاستىرۋ ۇردىسىنە بايلانىستى ەكەندىگىن جانە ونىڭ قايتارىمى ۇنەمى باقىلاۋدا بولاتىندىعىن, بۇگىنگى كۇنى ەل تۇرعىندارىنىڭ 72,5 پايىزىنىڭ ءومىر جاعدايى جاقسارعاندىعىن, ۇستاز مارتەبەسى تۋرالى زاڭنىڭ ماڭىزدىلىعىن, «جاستار جىلىن» جاريالاۋدىڭ ءمانىن, اگروونەركاسىپتەگى كووپەراتيۆتىك قوزعالىس پەن قايتا وڭدەۋ سالاسىن, جالپى باسەكەلەستىكتىڭ مازمۇنىن تۇسىندىرۋگە باعىتتالدى. وسى ورايدا, جەرگىلىكتى كاسىپكەر ۆالەري سيمچۋك اقكول اۋدانىندا جالپىعا ورتاق ەڭبەك قوعامىن قالىپتاستىرۋداعى يگى باستامالاردىڭ جۇزەگە اسىرىلىپ جاتقاندىعى تۋرالى بايانداپ بەردى. وبلىستىق ءماسليحاتتىڭ دەپۋتاتى رەتىندە وسى ماسەلەگە وراي ءوزىنىڭ دە قانشالىقتى ەڭبەك ءسىڭىرىپ وتىرعاندىعى تۋرالى مالىمدەدى. اۋدان اكىمى تەمىرجان ەدىگەنوۆتىڭ, وبلىستىق اتقارۋشى ورگانداردىڭ پارلامەنت سەنات دەپۋتاتتارىنىڭ سۇراقتارىنا تولىمدى جاۋاپ قايتارۋى دا جولداۋدا كەڭىنەن ورىن العان مىندەتتەردىڭ تاپ-تۇيناقتاي ورىندالاتىنىنا زور سەنىم قالىپتاستىرادى.
سەناتورلار وسى كەزدەسۋدەن كەيىن اقكول مەن بۇلاندى اۋداندارىنىڭ ەڭبەك ۇجىمدارىندا حالىقپەن جۇزدەسىپ, جەرگىلىكتى جەردە اتقارىلىپ جاتقان يگى ىستەردىڭ بارىسىمەن تانىستى.
بايقال ءبايادىل,
«ەگەمەن قازاقستان»
اقمولا وبلىسى
