ءوز كەزەگىندە انكارا ەر-ريادتى سەرىكتەستىككە شاقىرۋدا. تۇركيانىڭ سىرتقى ىستەر ءمينيسترى مەۆليۋت چاۆۋشوگلۋ: «ساۋد ارابياسىمەن بىرلەسە جۇمىس ىستەۋىمىز كەرەك. ساۋد ارابياسى پروكۋراتۋرا قىزمەتكەرلەرى مەن ساراپشىلارعا مەملەكەت كونسۋلدىعىنىڭ اۋماعىنا كىرۋگە مۇمكىندىك بەرۋى كەرەك. جۋرناليست سوڭعى رەت قايدا كورىندى؟ كونسۋلدىقتا. دەگەنمەن, تەرگەۋ پروتسەسىنە ەشقانداي كومەك كورسەتىلىپ جاتقان جوق», دەدى.
اقش پرەزيدەنتى دونالد ترامپ ساۋد ارابياسىمەن اسكەري كەلىسىمدى جالعاستىرماق نيەتىمەن ءبولىستى. جاعداي وزگەرسە, قۇنى 110 ميلليارد دوللار بولاتىن تاپسىرىستار باسقا مەملەكەتتەرگە بۇيىرماق. دونالد ترامپ «مەن تۇركيا مەن ساۋد ارابياسىنىڭ باسشىلارىنان جاعداي تۋرالى حابار الۋ ءۇشىن قوڭىراۋ شالامىن», دەپ ءسوز بەردى.
اقش پارلامەنتى ساۋد ارابياسى بۇل وقيعاعا بايلانىستى ماگنيتسكي اكتىنا سايكەس ادام قۇقىقتارىنىڭ بۇزىلۋى بويىنشا جاۋاپ بەرۋى ءتيىس دەيدى. اقش كونگرەسىندە ەر-ريادقا وق-قارۋ تاسىمالداۋ ماسەلەسى تالقىلاندى. الايدا, امەريكا پرەزيدەنتى تاسىمالدى توقتاتۋدىڭ ەش سەبەبى جوعىن ايتتى. ساراپشىلار بۇل شەشىم امەريكا كونگرەسى مەن اق ءۇيدىڭ قارىم-قاتىناسىنا اسەر ەتۋى مۇمكىن دەيدى.
دجامال حاشوگگي ساۋد ارابياسىنىڭ قازىرگى ساياسي جاعدايىن سىناۋشى جۋرناليست رەتىندە تانىس. سوڭعى رەت 2 قازان كۇنى ىستامبۇل قالاسىنداعى ساۋد ارابياسىنىڭ كونسۋلدىعىندا كورىنەدى. تۇرىك پوليتسياسى جۋرناليست ديپلوماتيالىق ۆەدومستۆو عيماراتىندا ءولتىرىلدى دەپ كۇدىكتەنەدى. تەرگەۋ جۇمىستارى جالعاسۋدا.
