بابالار اماناتىنا اسقان جاۋاپكەرشىلىكپەن قارايتىن جاس قاۋىم ساكەننىڭ ءوز قولتاڭباسى قالعان قۇندى جادىگەرلەرىن كورىپ, كوپ دۇنيەنى كوڭىلگە ءتۇيىپ قايتتى.
سادۋاقاس سەيفۋللين اتىنداعى ادەبي-مەموريالدىق مۋزەيى 1988 جىلى اشىلعان. XIX عاسىردىڭ ەكىنشى جارتىسىندا سالىنعان بۇل عيمارات بۇرىن كوپەس كازانتسەۆتىڭ اكىمشىلىك ءۇيى بولعان. 1920 جىلدارى اتالمىش عيماراتتاعى رەداكتسيادا ساكەن قىزمەت ەتكەن. مۋزەيدىڭ جانىنداعى اقىننىڭ الىپ ەسكەرتكىشى دە جاس ۇرپاقتى تاۋ تۇلعالارعا تاعزىم ەتۋگە شاقىرىپ تۇرعانداي اسەر قالدىرادى.
العاش مۋزەي اشىلعان جىلدارى قوردا جالپى 600-700-گە جۋىق جادىگەر بولسا, قازىرگى سانى 6000-عا تولىققان. ونىڭ ىشىندە 2900 باستاپقى, 3100 عىلىمي-قوسالقى قور. مۇراجايدا كورىنىس تاپقان اقىننىڭ ءوز قولجازبالارى, قولدانعان سياساۋىتى, مۇراعات, قۇجاتتارى ونىڭ جاستىق شاق, ەڭبەك جولى, قايراتكەرلىك كەزەڭىنەن باستاپ تولىق ماعلۇمات بەرەدى. مۋزەيدەگى جاس ساكەننىڭ پورترەتتەرى, كيگەن كيىمدەرى, قول ساعات, ءاتىرى كوز الدىڭا سىرباز, سىمباتتى ساكەندى ەرىكسىز الىپ كەلەدى.
ودان بولەك, مۇراجايدان اقان سەرى, ءبىرجان سال, الاشتىڭ بەس ارىس, ءۇش بايتەرەگى جايلى دا عىلىمي قۇجاتتاردى تابۋعا بولادى. قۇندى جادىگەرلەر مەن ماڭىزدى ماعلۇماتتار العان بىرلەستىك مۇشەلەرى اقىننىڭ ارابشا جازىلعان ولەڭىن ءتارجىمالاپ جارىسىپ, ونىڭ «تار جول, تايعاق كەشۋ» رومانى بويىنشا جاسالعان كارتانى قىزىعا تاماشالادى.
سونىمەن قاتار, ولار مۇراجاي مۇراعاتىنداعى ساكەننىڭ «قازاقتى قازاق دەيىك, قاتەنى تۇزەتەيىك», «كەڭسەلەردە ءىستى قازاق تىلىندە جۇرگىزۋگە كىرىسۋ», «ۇلت تەاترى تۋرالى» اتتى ماقالالارىن وقىپ, اقىن ولەڭدەرى جەلىسىندە سالىنعان كارتينالارعا ەرەكشە ىقىلاس تانىتتى.
ەكسكۋرسيا سوڭىندا مۋزەي قىزمەتكەرلەرى مۇندا ءداستۇرلى تۇردە ساكەن وقۋلارى بولىپ تۇراتىنىن, اقىنعا ارنالعان عىلىمي-كونفەرەنتسيالار وتەتىنىن تىلگە تيەك ەتتى. وسىلايشا, جاستار الاشتىڭ اياۋلى اقىنىنىڭ سىر ساندىعىنا ءۇڭىلىپ, تۇعىرداعى ەسكەرتكىشىن كورىپ قايتتى.
استانانىڭ رۋحاني ورتالىعىنىڭ بىرىنە اينالعان مۋزەي ساكەن سەيفۋللين مۇراسىن ۇرپاققا ناسيحاتتاۋدا جانە جاستار اراسىنداعى شىعارماشىلىق ينتەلليگەنتسيانى قالىپتاستىرۋدا ۇلكەن ءرول اتقارىپ تۇر.
اسەم بەكتەمىرقىزى,
ەۋرازيا ۇلتتىق ۋنيۆەرسيتەتىنىڭ ستۋدەنتى
