ءوتىپ بارا جاتقان جىلدىڭ ەرەكشە وقيعاسى ەل ءتاۋەلسىزدىگىنىڭ 20 جىلدىق مەرەكەسىن حالىق بولىپ تولىمدى تابىستارمەن اتاپ ءوتۋ بولدى. بۇل تۋرالى ەلباسىنىڭ قازاقستان رەسپبۋليكاسى تاۋەلسىزدىگىنىڭ 20 جىلدىعىنا ارنالعان سالتاناتتى جينالىستا سويلەگەن سوزىندە جان-جاقتى ايتىلدى.
مىسالى, العاشقى ونجىلدىقتا مىقتى ەكونوميكا مەن كۇشتى مەملەكەتىمىز قالىپتاستى. ەكىنشى ونجىلدىقتا ءوسىم مەن كۇش جيناقتاۋ كەزەڭى بولدى. ەلباسى وسى جەتىستىكتەردى ايتا كەلىپ, ەندى ءۇشىنشى جانە ءتورتىنشى ونجىلدىقتاردى ەلىمىز ءۇشىن العا تاريحي سەكىرىس ءداۋىرى بولادى دەپ تۇجىردى.
وعان, ءارينە, نەگىز بار. قازاق ەلى ءوز تاريحىندا تۇڭعىش رەت ەقىۇ-عا تابىستى توراعالىق ەتتى جانە استانادا ەقىۇ-نىڭ ءححى عاسىرداعى ءبىرىنشى جانە ازىرشە جالعىز ءسامميتىن ءوتكىزدى. قاسىم-جومارت توقاەۆتاي ازاماتىمىز بۇۇ-دا ۇيىم ءتوراعاسىنىڭ ورىنباسارى بولىپ ابىرويمەن وكىلدىك ەتۋدە. مۇنىڭ ءبارى بۇگىندە ءبىزدىڭ ەلگە الەمدىك قاۋىمداستىقتىڭ سەنىمى ارتىپ كەلە جاتقانىن كورسەتەدى.
دەيتۇرعانمەن, ەلباسى تاياۋداعى جىلداردىڭ جاۋاپكەرشىلىگىنىڭ زور ەكەنىن دە ايتىپ ءوتتى. ەلباسىنىڭ تىلىمەن ايتساق, قازاقستان – ءبىرتۇتاس جەر, ءبىرتۇتاس حالىق, ءبىرتۇتاس بولاشاق. سوندىقتان حالقىمىز تاۋەلسىز ەل بولىپ اتتاعان التىن عاسىردى ارداقتاي بىلەيىك. باسىمىزعا قونعان باقتى ءوز قولىمىزبەن ۇركىتىپ المايىق. ايتاققا ەرىپ, اتتانعا قوسىلۋدىڭ سوڭى – اداسۋ. ەلىمىزدەگى تۇراقتىلىق پەن كەلىسىم, ۇدەمەلى يندۋستريالاندىرۋ, يننوۆاتسيالىق دامۋ مەن ينتەگراتسيا باعىتىن ءبىر اتانىڭ بالاسىنداي, ءبىر قولدىڭ سالاسىنداي قورعاپ, قولداي بىلسەك قانا باقىتقا جەتەمىز.
قويان جىلىنا قوش-قوش ايتىپ, ال كەلە جاتقان ۇلۋ جىلىن قۋانا قارسى الىپ تۇرىپ, زامانداستارىما جانە جاستارعا ايتار اق تىلەگىم وسى.
باعبان تايىمبەتوۆ, جامبىل وبلىسىنىڭ پروكۋرورى.
جامبىل وبلىسى.
